Ninkuraġġixxu lil Xulxin fil-​Ministeru

¹ Ilkoll kemm aħna napprezzaw meta ħaddieħor jinkuraġġina b’xi “kelma li tingħad f’waqtha.” (Prov. 25:11) Meta naħdmu m’oħrajn fil-​ministeru, kif nistgħu nkunu ċerti li l-​konversazzjoni tagħna tinkuraġġixxi lil dawk li jkunu magħna?

² Konversazzjoni Inkuraġġanti: Kemm hu inkuraġġanti li ninkludu affarijiet spiritwali fil-​konversazzjoni tagħna waqt li nieħdu sehem fix-​xogħol taʼ l-​ippridkar! (Salm 37:30) Nistgħu nitkellmu dwar il-​preżentazzjoni tagħna jew nirrakkontaw xi esperjenzi inkuraġġanti li gawdejna reċentement fis-​servizz taʼ l-​għalqa. (Atti 15:3) Sibna xi punt interessanti fil-​qari persunali tal-​Bibbja, fir-​rivisti reċenti, jew f’xi laqgħa tal-​kongregazzjoni? Nistgħu forsi niddiskutu punti minn xi taħdita pubblika li smajna dan l-​aħħar fis-​Sala tas-​Saltna.

³ Għandna mnejn inħossuna skuraġġiti meta xi inkwilin iqajjem xi oġġezzjoni li ma nkunux nistgħu nwieġbu għaliha. Ikun taʼ benefiċċju għalina jekk wara li nitilqu minn quddiem il-​bieb nieħdu ftit minuti biex nikkunsidraw flimkien maʼ seħibna fil-​ministeru kif nistgħu nittrattaw sitwazzjoni simili fil-​futur, forsi billi nużaw il-​ktieb Reasoning. U jekk għoġobna xi punt mill-​preżentazzjoni taʼ dak li qed naħdmu miegħu, nistgħu ninkuraġġuh b’kelma taʼ tifħir ġenwina.

⁴ Ħu l-​Inizjattiva: Hemm xi wħud fil-​grupp taʼ l-​istudju tal-​ktieb tagħna li ilna ftit ma naħdmu magħhom? Stedina lil xi ħadd biex joħroġ magħna fil-​ministeru se tirriżulta f’li “ninkuraġġixxu lil xulxin.” (Rum. 1:12) Pijunieri regulari u awżiljarji jieħdu pjaċir ikollhom oħrajn li jaħdmu magħhom, speċjalment kmieni fil-​għodu jew tard wara nofsinhar, meta jistaʼ jkun hemm inqas pubblikaturi fil-​ministeru. Aħna nistgħu nappoġġaw lill-​pijunieri billi nagħmlu lilna nfusna disponibbli. Hemm xi pubblikatur marid u li minħabba saħħa batuta jinsab limitat f’dak li jistaʼ jagħmel fil-​ministeru? Jekk nagħmlu pjanijiet biex lil dawn l-​uħud noħorġuhom magħna, forsi fuq xi studju tal-​Bibbja, jistaʼ jkun taʼ benefiċċju kemm għalihom u kemm għalina.—Prov. 27:17.

⁵ Tifħir u espressjonijiet t’apprezzament huma dejjem inkuraġġanti, anki f’affarijiet żgħar. Għandna nżommu dan f’moħħna meta nkunu qed naħdmu m’oħrajn fil-​ministeru, ladarba rridu ‘nibqgħu nibnu lil xulxin.’—1 Tess. 5:11.