Ibqgħu Tkellmu L-​Verità

 ¹ L-​appostli ddikjaraw: “Ma nistgħux nieqfu milli nitkellmu dwar l-​affarijiet li rajna u smajna.” (Atti 4:20) Illum aħna wkoll irridu nibqgħu nitkellmu l-​verità. Għalkemm it-​tqassim taʼ It-​Torri Taʼ L-​Għassa bil-​Malti u bl-​Ingliż u l-​Awake! huwa mezz biex insibu lil dawk li se jisimgħu, irridu nerġgħu mmorru lura jekk irridu ngħallmu lil uħud interessati iktar dwar il-​verità.

 ² Meta nkunu se mmorru lura fejn ħallejna “l-​Awake!” speċjali t’April bis-​suġġett “When Wars Will Be No More” (Meta L-​Gwerer M’humiex Se Jkunu Iktar), tistaʼ tintroduċi studju tal-​Bibbja billi tistaqsi:

◼ “L-​aħħar darba, tkellimna dwar il-​gwerer tal-​ġnus u s-​sehem tar-​reliġjon fihom. Kont indunajt li ġrajjiet bħal dawn jagħtu prova ċara li qegħdin ngħixu fiż-​żmien li l-​Bibbja ssejjaħlu l-​aħħar jiem? [Uri l-​ktieb Tgħix Għal Dejjem. Mur f’Kapitlu 18 u uri s-​sinjali mniżżlin f’paġni 150-153. Aqra paragrafu 6.] Dan il-​ktieb jispjega dan is-​suġġett flimkien maʼ ħafna oħrajn imniżżlin hawn fil-​werrej. [Uri paġni 5 u 6.] Liema minn dawn is-​suġġetti jinteressawk b’mod partikulari? [Agħti ħin għal tweġiba - mur f’dak il-​kapitlu partikulari.] Jekk nistaʼ, nixtieq nurik kif dan il-​ktieb jistaʼ jgħinek tikseb fehma taʼ dan is-​suġġett Bibliku importanti.” Jekk iħalluk, ibda studju f’dak il-​kapitlu partikulari.

 ³ Jekk wegħedt li terġaʼ tmur lura u tispjega kif inhu possibbli li ngawdu ħajja fis-​sigurtà issa, tistaʼ forsi tgħid xi ħaġa bħal din:

◼ “Meta ltqajna l-​ewwel darba, qsamt miegħek silta mill-​Bibbja li tagħtina raġuni għalfejn inkunu ottimisti dwar il-​futur tal-​bniedem. Illum nixtieq niġbed l-​attenzjoni tiegħek lejn xi ħaġa li turi min hu dak li jistaʼ jagħtina sens taʼ sigurtà issa stess.” Aqra Salm 4:8. Mur f’paragrafu 11, paġna 10, fil-​ktieb Tgħix Għal Dejjem. Aqra l-​ewwel żewġ sentenzi. Uri l-​istampi f’paġni 11-13. Kompli aqra l-​bqija taʼ paragrafu 11. Imbagħad staqsi: “Tieħu gost jekk ikollok studju tal-​Bibbja fid-​dar b’xejn li juri ċar kif int ukoll tistaʼ ssib dan it-​tip t’hena u sigurtà fil-​ħajja tiegħek?” Jekk it-​tweġiba hija iva, ibda fil-​bidu taʼ kapitlu 1.

 ⁴ Biex iżżid mar-​rotta bir-​rivisti tiegħek lil dawk li magħhom ħallejt l-​“Awake!” tat-​22 taʼ Mejju tistaʼ tipprova din l-​introduzzjoni:

◼ “Kont tidher ħerqana mhux ħażin biex taqra r-​rivista Awake! li ħallejtlek fuq is-​suġġett taʼ meta wieħed jiġi ttantat sesswalment fuq il-​post tax-​xogħol. Sibtu xejn interessanti l-​materjal? [Stenna tweġiba.] Nies li regolarment jaqraw l-​Awake! taʼ spiss jgħidu kemm japprezzaw kif dan jittratta b’mod imparzjali u bir-​reqqa suġġetti importanti bħal dawn. Naħseb li se ssib li dan huwa minnu wkoll dwar din l-​aħħar ħarġa. [Irreferi fil-​qosor għall-​istorja konnessa maʼ l-​istampa taʼ quddiem.] Tixtieq taqraha?”

 ⁵ Tistaʼ tagħmel offerta diretta taʼ studju fuq iż-​żjara lura billi tgħid:

◼ “Aħna nqassmu r-​rivisti tagħna madwar id-​dinja biex ninformaw lin-​nies maʼ kullimkien dwar dak li tgħallem il-​Bibbja. Jekk l-​individwi japprezzaw dak li jitgħallmu, noffru studju tal-​Bibbja fid-​dar b’xejn. [Irreferi għall-​kaxxa ‘Tieħu Gost Bi Żjara?’ fuq il-​qoxra taʼ wara taʼ It-​Torri Taʼ L-​Għassa.] Aħna nużaw dan il-​ktieb, Int Tistaʼ Tgħix Għal Dejjem Fil-​Ġenna Fuq L-​Art, bħala gwida. Ħalli nurik fil-​qosor kif isir studju.”

 ⁶ Jekk nibqgħu nitkellmu l-​verità, nistgħu nkunu ċerti li se jkun hemm xi ftit li se jisimgħu u jwieġbu b’mod favorevoli.​—Mark 4:20.