L-​Għarfien Mingħand Alla Jwieġeb Ħafna Mistoqsijiet

¹ Qabel ma ksibt għarfien eżatt tal-​verità, x’aktarx li int kellek ħafna mistoqsijiet li ma kontx kapaċi tweġibhom. Kemm kont hieni li tirċievi tweġibiet ibbażati fuq il-​Bibbja għal dawk il-​mistoqsijiet! Issa int kapaċi tgħin lil oħrajn biex isibu dawk l-​istess tweġibiet. (Qabbel 2 Timotju 2:2.) Tistaʼ taqsam magħhom l-​għarfien t’Alla li jwassal għall-​ħajja taʼ dejjem. (Ġwn. 17:3) Imma kif tistaʼ tgħin lil xi ħadd japprezza l-​valur taʼ dan l-​għarfien? Tajjeb, aħseb ftit dwar il-​mistoqsijiet li l-​verità tatek tweġiba għalihom. X’jixtiequ jkunu jafu dawk li qed ifittxu l-​verità? Li żżomm dan il-​ħsieb f’moħħok jistaʼ jgħinek biex toffri l-​ktieb Għarfien Li Jwassal Għall-​Ħajja Taʼ Dejjem. Is-​suġġerimenti li ġejjin jistgħu jgħinuk meta tkun qiegħed tipprepara għall-​għoti taʼ xiehda matul Ġunju.

² Peress li ħafna nies jitħassbu dwar għala hawn daqshekk sofferenza fid-​dinja, dan il-​metodu jistaʼ jkollu riżultat tajjeb:

 “Meta jfaqqaʼ xi diżastru jew jiżdiedu l-​atti taʼ kriminalità jew vjolenza, in-​nies taʼ spiss jistaqsu għala jseħħu affarijiet terribbli bħal dawn. Kieku int xi twieġeb?” Agħti ċans lill-​individwu biex iwieġeb u irrikonoxxi dak li jgħid. Imbagħad mur f’kapitlu 8 tal-​ktieb Għarfien, u iġbed l-​attenzjoni għal dak li jintqal f’paragrafu 2. Spjega li dan il-​ktieb jippreżenta l-​ispjegazzjoni tal-​Bibbja dwar għala jseħħu l-​affarijiet mill-​agħar, u għid: “Jekk twegħedni li taqrah, jien nixtieq inħallilek din il-​kopja.” Jekk il-​ktieb jiġi aċċettat u l-​inkwilin jistaqsi dwar il-​ħlas, spjega dwar l-​arranġament tad-​donazzjoni.

³ Meta tmur lura fejn tkun ħallejt il-​ktieb “Għarfien,” tistaʼ tgħid:

◼ “Ħadt interess f’dak li int ikkonkludejt dwar għala hawn daqshekk sofferenza fid-​dinja. Taqbel mat-​tweġiba tal-​Bibbja kif inhi murija fil-​ktieb?” Ħalli ħin għal tweġiba. Aqra paragrafu 17 f’paġna 77 tal-​ktieb Għarfien, u offri li taqra Rumani 9:14 mill-​Bibbja taʼ l-​inkwilin. Imbagħad għid: “L-​aħbar tajba hi li mhux Alla li jġib fuqna l-​uġigħ u s-​sofferenza b’mod inġust. Hu wiegħed li jagħtina ħajja taʼ dejjem fil-​paċi u l-​hena. L-​ewwel kapitlu f’dan il-​ktieb huwa intitolat ‘Int Jistaʼ Jkollok Futur Hieni!’ Nixtieq nispjegalek kif dan jistaʼ jkun minnu kemm għalik u kemm għall-​maħbubin tiegħek.” Mur f’kapitlu 1, u uri kif isir studju. Kopri kemm tistaʼ mill-​kapitlu skond kemm jippermettu ċ-​ċirkostanzi.

⁴ Forsi tkun tixtieq tagħżel li tuża l-​introduzzjoni li tidher f’paġna 7 tal-​fuljett “Kif Nibdew u Nkomplu Diskussjonijiet Fuq Il-​Bibbja,” taħt is-​sottitlu “Xjuħija/Mewt”:

◼ “Qatt staqsejt: ‘Tgħid il-​mewt hija t-​tmiem taʼ kollox? Jew hemm xi ħaġ’oħra wara l-​mewt?’ [Ħalli ħin għal tweġiba.] Il-​Bibbja tiċċaralna kwalunkwe mistoqsija li jistaʼ jkollna dwar il-​mewt. [Aqra Koħèlet 9:5, 10.] Turi wkoll li hemm tama reali għal dawk li għandhom il-​fidi. [Mur f’paragrafu 13 f’paġna 84 fil-​ktieb Għarfien; aqra u spjega l-​kliem taʼ Ġesù misjub fi Ġwann 11:25.] Dan il-​kapitlu kollu huwa maħsub biex iwieġeb il-​mistoqsija, X’jiġri mill-​maħbubin mejtin tagħna? Jekk tixtieq taqrah, nistaʼ nħallilek din il-​kopja.” Kulmeta tqum l-​okkażjoni, agħti lill-​inkwilin l-​opportunità li jagħmel donazzjoni.

⁵ Meta tagħmel iż-​żjara lura, tistaʼ terġaʼ tintroduċi lilek innifsek, u mbagħad tgħid:

◼ “L-​aħħar darba tkellimna dwar x’jiġri meta persuna tmut. Ħafna nies jemmnu li kwalunkwe ħajja li hemm wara l-​mewt se tkun jew fis-​sema jew fl-​infern. Imma qatt ħsibt dwar il-​possibbiltà li l-​mejtin jerġgħu jgħixu mill-​ġdid hawn fuq l-​art? [Ħalli ħin għal tweġiba.] Skond il-​Bibbja, uħud irxoxtati se jkunu fost il-​ġwejdin li jirtu l-​art. [Aqra Salm 37:​11, 29, imbagħad iddiskuti paragrafu 20 f’paġna 88 fil-​ktieb Għarfien.] Din it-​tama ġabet faraġ lil miljuni taʼ nies li kienu jibżgħu mill-​mewt. Dan il-​ktieb se jgħinek tifhem il-​kwistjoni aħjar. Nistaʼ nurik kif?”

⁶ Jekk tippreferi preżentazzjoni sempliċi, tistaʼ tipprova din:

◼ “Nixtieq nurik stampa f’dan il-​ktieb, Għarfien Li Jwassal Għall-​Ħajja Taʼ Dejjem. M’hijiex din stampa sabiħa?” Iftaħ il-​ktieb biex l-​inkwilin ikun jistaʼ jara paġni 4-5. Agħtih ċans iwieġeb. Imbagħad aqra l-​kliem f’paġna 5. Ikkonkludi billi tgħid: “Tistaʼ tieħu dan il-​ktieb biex taqrah.” Jekk l-​inkwilin jistaqsi dwar kif inhu ffinanzjat ix-​xogħol tagħna, tistaʼ ssemmi li naċċettaw donazzjonijiet żgħar għax-​xogħol tagħna taʼ madwar id-​dinja. Ara liema jkun l-​aħjar ħin biex terġaʼ tmur ħalli tkompli tibni fuq xi interess li jintwera.

⁷ Aħna għandna l-​għarfien mingħand Alla li jwieġeb il-​mistoqsijiet l-​iktar importanti fil-​ħajja. Ipprepara bil-​għaqal, u Jehovah se jbierek l-​isforzi tiegħek biex taqsam din l-​informazzjoni li tagħti l-​ħajja maʼ dawk li qegħdin ifittxu l-​verità.