“Dan Ifisser Il-​Ħajja Taʼ Dejjem”

¹ Il-​kliem taʼ Ġesù rrekordjat fi Ġwann 17:3 għandu jittieħed bis-​serjetà. Hu kien ċert minn dak li qal​—li wieħed jieħu għarfien dwar Alla u dwar Kristu jfisser il-​ħajja taʼ dejjem! Imma huwa sempliċement billi jkollna għarfien dwar Jehovah u Ġesù li aħna se niġu ppremjati b’ħajja eterna? Le. L-​Israeliti kienu jafu li Jehovah kien Alla tagħhom, imma l-​korsa taʼ ħajjithom ma rriflettietx dak it-​twemmin. Bħala riżultat, tilfu l-​favur tiegħu. (Ħos. 4:​1, 2, 6) Illum miljuni taʼ nies forsi “għandhom żelu għal Alla, imma mhux skond l-​għarfien eżatt.” (Rum. 10:2) Hemm bżonn li jsiru jafu lil Jehovah, “l-​uniku Alla veru,” u li jitgħallmu jaqduh kif jixraq. Għal dan l-​għan, matul Novembru se noffru l-​ktieb Għarfien Li Jwassal Għall-​Ħajja Taʼ Dejjem. X’metodu se tuża int biex toffri l-​ktieb Għarfien? Hawn ftit suġġerimenti li jistgħu jgħinuk.

² Peress li l-​idea li jgħixu għal dejjem fuq l-​art hija ġdida għall-​biċċa l-​kbira tan-​nies, din l-​introduzzjoni tistaʼ tattira l-​interess tagħhom:

◼ “Qegħdin nistaqsu lill-​ġirien tagħna mistoqsija. Li kieku kellek tiġi mistieden biex tgħix għal dejjem f’dinja bħal din, taċċettaha int l-​istedina? [Uri l-​istampa f’paġni 4-5 fil-​ktieb Għarfien. Agħti ħin għal tweġiba.] Din tistaʼ tassew issir l-​esperjenza hienja tiegħek fil-​ħajja. Imma x’taħseb li jkollok tagħmel biex tara li din issir realtà fil-​każ tiegħek? [Agħti ħin għal tweġiba.] Innota liema azzjoni hija meħtieġa skond Ġwann 17:3. [Aqra.] Dan il-​ktieb qiegħed jgħin lil ħafna biex jiksbu dan it-​tip speċjali t’għarfien. Tixtieq li jkollok kopja persunali biex taqraha? [Agħti ħin għal tweġiba.] Fiż-​żjara tiegħi li jmiss, nistgħu niddiskutu għala huwa raġonevoli li nemmnu li nistgħu naslu li ngħixu għal dejjem sewwa sew hawn fuq l-​art.”

³ Meta tmur lura biex iżżur lil dawk li magħhom tkun iddiskutejt ġwann 17:​3, tistaʼ tissokta b’dan il-​mod:

◼ “Matul l-​aħħar żjara tiegħi, qrajtlek il-​kliem affaxxinanti taʼ Ġesù li hemm fi Ġwann 17:​3, fejn hu assigurana illi li nieħdu għarfien dwar Alla u dwaru jfisser il-​ħajja taʼ dejjem. Imma ħafna nies jemmnu li ħajja aħjar tistaʼ tinkiseb biss fis-​sema. Kif tħossok int dwar dan? [Agħti ħin għal tweġiba.] Jekk il-​ktieb li ħallejtlek huwa fil-​qrib, nixtieq nurik xi ftit versi mill-​Bibbja li jagħtu prova li l-​Ġenna għandha tiġi rrestawrata fuq l-​art. [Iddiskuti paragrafi 11-16 f’paġni 9-10 fil-​ktieb Għarfien.] Meta nerġaʼ niġi, nixtieq nurik għala int tistaʼ tafda f’dawn il-​wegħdi misjubin fil-​Bibbja. Sadattant, forsi tistaʼ taqra kapitlu 2 fil-​kopja tiegħek tal-​ktieb.”

⁴ Hawn preżentazzjoni li forsi tkun tixtieq tuża maʼ nies li huma inklinati reliġjożament:

◼ “Qegħdin nitkellmu mal-​ġirien tagħna rigward għala hawn daqstant reliġjonijiet differenti fid-​dinja. Jeżistu madwar 1,200 denominazzjoni reliġjuża fl-​Istati Uniti biss, u ’l fuq minn 10,000 mad-​dinja kollha. Madankollu, hemm biss Bibbja waħda. Fl-​opinjoni tiegħek, għala teżisti din il-​konfużjoni taʼ reliġjonijiet? [Agħti ħin għal tweġiba. Iftaħ il-​ktieb Għarfien f’kapitlu 5, u aqra paragrafu 1.] Se tirċievi tweġibiet sodisfaċenti għal dawk il-​mistoqsijiet billi taqra dan il-​kapitlu. Nieħu gost li nħallilek il-​ktieb jekk tixtieq teżaminah.” Jekk jiġi aċċettat, agħmel arranġamenti definiti biex terġaʼ tmur, u għid: “Meta nerġaʼ niġi, forsi nistgħu niddiskutu jekk ir-​reliġjonijiet kollha humiex sempliċement toroq differenti li jwasslu għall-​istess post.”

⁵ Meta tmur lura biex tkompli d-​diskussjoni dwar għala hawn daqstant reliġjonijiet, tistaʼ tgħid dan:

◼ “L-​aħħar li tkellimt miegħek, qajjimt il-​mistoqsija dwar jekk ir-​reliġjonijiet kollha humiex sempliċement toroq differenti li jwasslu għall-​istess post. X’taħseb int dwar dan? [Agħti ħin għal tweġiba.] Nixtieq nurik fil-​ktieb li ħallejtlek x’qal Ġesù f’dan ir-​rigward. [Mur f’kapitlu 5 tal-​ktieb Għarfien, u aqra paragrafi 6-7, inkluż Mattew 7:​21-23.] Forsi int tistaʼ titħasseb għala huwa daqshekk importanti li nkunu nafu eżattament x’inhi r-​rieda t’Alla. Se ssib li l-​paragrafi li jmiss huma informattivi ħafna. Jekk jogħġbok aqra l-​bqija taʼ dan il-​kapitlu. Meta nerġaʼ niġi, nieħu gost ħafna jekk nistaʼ nurik il-​valur taʼ li jkollna għarfien Bibliku eżatt.”

⁶ Metodu dirett huwa spiss taʼ suċċess f’li nibdew studji tal-​Bibbja. Hawn introduzzjoni ssuġġerita f’paġna 12 tal-​ktieb “Reasoning”:

◼ “Qiegħed inżurek biex noffrilek kors fuq il-​Bibbja b’xejn f’darek. Jekk nistaʼ, nixtieq nieħu ftit minuti biss biex nurik kif nies f’madwar 200 pajjiż jiddiskutu l-​Bibbja fid-​dar bħala gruppi tal-​familja. Nistgħu nużaw kwalunkwe wieħed minn dawn is-​suġġetti bħala bażi għal diskussjoni. [Uri l-​werrej fil-​ktieb Għarfien.] Liema wieħed jinteressak b’mod speċjali?” Stenna lill-​persuna biex tagħmel għażla. Mur fil-​kapitlu li jintgħażel, u ibda l-​istudju fl-​ewwel paragrafu.

⁷ Hawn hu metodu dirett ieħor taʼ suċċess li tistaʼ tipprova biex tibda studji:

◼ “Jien nagħti lezzjonijiet mill-​Bibbja bla ħlas u għandi post fl-​iskeda tiegħi għal iktar studenti. Dak li nużaw hija din l-​għajnuna għal studju mill-​Bibbja. [Uri l-​ktieb Għarfien.] Il-​kors idum ftit xhur biss u jipprovdi tweġibiet għal mistoqsijiet bħalma huma: Alla għala jippermetti s-​sofferenza? Għala nixjieħu u mmutu? X’jiġrilhom il-​maħbubin mejtin tagħna? U kif nistgħu nersqu qrib lejn Alla?” Imbagħad staqsi: “Nistaʼ nurik kif isir l-​istudju?” Jekk l-​offerta għal studju tiġi rrifjutata, staqsi lill-​individwu jekk jixtieqx jieħu l-​ktieb Għarfien biex jaqrah waħdu. Jekk iwiegħed li jaqrah, ħallilu kopja.

⁸ X’teżor huwa l-​għarfien eżatt dwar Alla u Kristu għal kulmin jippossedih! Li wieħed jieħu dak l-​għarfien ifisser verament ħajja taʼ dejjem f’kundizzjonijiet perfetti. Ejjew nużaw kull opportunità matul Novembru biex naqsmu m’oħrajn l-​għarfien li jwassal għall-​ħajja taʼ dejjem.