Kapitlu 5

Il-​Qima taʼ Min Jaċċetta Alla?

1. Mara Samaritana x’riedet tkun taf dwar il-​qima?

QATT ħsibt dwar, ‘Il-​qima taʼ min jaċċetta Alla?’ Waħda mara setgħet ħasbet dwar mistoqsija bħal din meta tkellmet maʼ Ġesù Kristu ħdejn il-​Muntanja Geriżim fis-​Samarija. Billi ġibdet l-​attenzjoni lejn id-​differenza bejn il-​qima tas-​Samaritani u dik tal-​Lhud, hi qalet: “Missirijietna kienu jaduraw lil Alla fuq din il-​muntanja; imma intom tgħidu li l-​post fejn wieħed għandu jadura lil Alla jinsab f’Ġerusalemm.” (Ġwann 4:20) Qalilha Ġesù lill-​mara Samaritana li Alla jaċċetta kull qima? Jew qalilha li affarijiet speċifiċi huma meħtiġin biex wieħed jogħġob lil Alla?

2. Fit-​tweġiba lill-​mara Samaritana, Ġesù x’qal?

² It-​tweġiba li taħsdek taʼ Ġesù kienet: “Jiġi żmien meta mhux fuq din il-​muntanja taduraw lill-​Missier, anqas f’Ġerusalemm.” (Ġwann 4:21) Is-​Samaritani kienu ilhom jibżgħu minn Jehovah u kienu qiemu allat oħrajn fuq il-​Muntanja Geriżim. (2 Slaten 17:33) Issa Ġesù Kristu qal li la dak il-​post u lanqas Ġerusalemm ma kellhom ikunu importanti fil-​qima vera.

QIM BL-​ISPIRTU U L-​VERITÀ

3. (a) Is-​Samaritani għala ma kinux jafuh tassew lil Alla? (b) Kif setgħu Lhud leali u oħrajn isiru jafu lil Alla?

³ Ġesù kompla jgħid lill-​mara Samaritana: “Intom taduraw lil dak li ma tafux; aħna naduraw lil dak li nafu, għax is-​salvazzjoni ġejja mill-​Lhud.” (Ġwann 4:22) Is-​Samaritani kellhom ideat reliġjużi foloz u aċċettaw biss l-​ewwel ħames kotba tal-​Bibbja bħala li kienu mnebbħin—u dawn unikament fir-​reviżjoni mimlija kritika tagħhom stess magħrufa bħala l-​Pentatewku Samaritan. Għalhekk, ma kinux jafuh tassew lil Alla. Madankollu l-​Lhud kienu ġew fdati b’għarfien Skritturali. (Rumani 3:1, 2) L-​Iskrittura tat lil Lhud leali u lil kulmin ried jagħti widen dak li kellhom bżonn sabiex isiru jafu lil Alla.

4. Skond Ġesù, x’kellhom bżonn jagħmlu kemm il-​Lhud u kemm is-​Samaritani jekk il-​qima tagħhom kellha tkun aċċettabbli għal Alla?

⁴ Fil-​fatt, Ġesù wera li kemm il-​Lhud u kemm is-​Samaritani kellhom jaġġustaw il-​mod tagħhom taʼ qima sabiex jogħġbu lil Alla. Hu qal: “Tiġi siegħa, anzi issa hi, meta dawk li tassew jaduraw jibdew jaduraw lill-​Missier fl-​ispirtu u l-​verità. Għax il-​Missier ukoll, nies bħal dawn ifittex li jadurawh. Alla huwa spirtu, u dawk li jadurawh għandhom jadurawh fl-​ispirtu u l-​verità.” (Ġwann 4:23, 24) Biex inqimu lil Alla “fl-​ispirtu,” irid ikollna l-​ispirtu tiegħu u niġu gwidati minn dan l-​ispirtu. Huwa possibbli li tqim lil Alla ‘bil-​verità’ billi tistudja l-​Kelma tiegħu, il-​Bibbja, u billi tqimu skond il-​verità rrivelata tiegħu. Ħerqan int li tagħmlu dak?

5. (a) Il-​“qima” xi tfisser? (b) X’irridu nagħmlu aħna jekk irridu li Alla jaċċetta l-​qima tagħna?

⁵ Ġesù enfasizza li Alla jrid il-​qima vera. Dan juri li hemm forom taʼ qima li m’humiex aċċettabbli għal Jehovah. Li tqim lil Alla jfisser li tagħtih unur reverenti u li tagħti servizz sagru lilu. Li kieku ridt turi unur lil ħakkiem potenti, x’aktarx li kont tkun ħerqan li taqdih u tagħmel dak li jkun jogħġob lilu. Żgur, allura, li aħna rridu nogħġbu lil Alla. Minflok ma sempliċement ngħidu, ‘Ir-​reliġjon tiegħi togħġobni,’ aħna għalhekk għandna bżonn naċċertaw erwieħna li l-​qima tagħna tilħaq il-​ħtiġijiet t’Alla.

NAGĦMLU R-​RIEDA TAL-​MISSIER

6, 7. Ġesù għala ma jirrikonoxxix lil xi wħud li jsostnu li huma dixxipli tiegħu?

⁶ Ejjew naqraw Mattew 7:21-23 u naraw jekk nistgħux niżolaw fattur kruċjali li jiddetermina jekk kull qima hijiex aċċettabbli għal Alla. Ġesù qal: “Mhux kull min jgħidli, ‘Mulej, Mulej,’ jidħol fis-​Saltna tas-​Smewwiet, iżda min jagħmel ir-​rieda taʼ Missieri li hu fis-​smewwiet! F’dak il-​jum ikun hemm ħafna li jgħiduli, ‘Mulej, Mulej, mhux f’ismek ħabbarna aħna? u mhux f’ismek keċċejna x-​xjaten [ħlejjaq spirti mill-​agħar] u f’ismek għamilna ħafna mirakli?’ Imbagħad jien ngħidilhom, ‘Lilkom qatt ma kont nafkom! Warrbu minn quddiemi, intom li tagħmlu l-​ħażen!’”

⁷ Li nirrikonoxxu lil Ġesù Kristu bħala Mulej huwa essenzjali fil-​qima vera. Imma xi ħaġa kellha tkun nieqsa fil-​qima taʼ ħafna minn dawk li qegħdin isostnu li huma dixxipli taʼ Ġesù. Hu qal li xi wħud kellhom iwettqu “mirakli,” bħalma huwa t-​taparsi fejqan mirakoluż. Madankollu, kellhom jonqsu li jagħmlu dak li Ġesù qal li huwa vitali. Ma kellhomx ikunu qegħdin ‘jagħmlu r-​rieda taʼ Missieru.’ Jekk irridu nogħġbu lil Alla, irridu nitgħallmu x’inhi r-​rieda tal-​Missier u mbagħad nagħmluha.

GĦARFIEN EŻATT—PROTEZZJONI

8. Jekk aħna se nagħmlu r-​rieda t’Alla, x’inhu meħtieġ, u liema opinjonijiet żbaljati rridu nevitaw?

⁸ Li nagħmlu r-​rieda t’Alla jirrikjedi għarfien eżatt kemm dwar Jehovah u kemm dwar Ġesù Kristu. Għarfien bħal dan iwassal għall-​ħajja taʼ dejjem. Żgur, allura, li lkoll kemm aħna nkunu rridu nieħdu bis-​serjetà l-​kwistjoni taʼ li niksbu għarfien eżatt mill-​Kelma t’Alla, il-​Bibbja. Xi wħud jgħidu li m’hemmx bżonn għal tħassib sakemm inkunu sinċieri u żelużi fil-​qima tagħna. Oħrajn isostnu, ‘Inqas ma taf, inqas huwa mistenni minnek.’ Madankollu, il-​Bibbja tinkuraġġina biex inżidu fl-​għarfien dwar Alla u dwar l-​iskopijiet tiegħu.—Efesin 4:13; Filippin 1:9; Kolossin 1:9.

9. L-​għarfien eżatt kif jipproteġina, u għala għandna bżonn protezzjoni bħal din?

⁹ Għarfien bħal dan huwa protezzjoni kontra l-​kontaminazzjoni tal-​qima tagħna. L-​appostlu Pawlu tkellem dwar ċertu ħlejqa spirtu li jagħmel taʼ bir-​ruħu li huwa “anġlu tad-​dawl.” (2 Korintin 11:14) Taħt travestiment bħal dan, dan il-​ħlejqa spirtu—Satana—jipprova jiżvijana f’li nagħmlu affarijiet kuntrarji għar-​rieda t’Alla. Ħlejjaq spirti oħrajn assoċjati maʼ Satana wkoll kienu u għadhom iniġġsu l-​qima tan-​nies, għax Pawlu qal: “[I]s-sagrifiċċji li joffru l-​pagani, lid-​demonji joffruhom u mhux lil Alla.” (1 Korintin 10:20) X’aktarx, ħafna ħasbu li kienu qegħdin iqimu bil-​mod xieraq, għalkemm ma kinux qegħdin jagħmlu dak li ried Alla. Kienu qegħdin jiġu żvijati għal ġo qima falza mhix nadifa. Aħna se nitgħallmu iktar dwar Satana u d-​demonji iktar ’il quddiem, imma dawn l-​għedewwa t’Alla definittivament kienu u għadhom iniġġsu l-​qima taʼ l-​umanità.

10. X’kont tagħmel int li kieku xi ħadd ivvalenalek apposta l-​provista taʼ l-​ilma tiegħek, u l-​għarfien eżatt tal-​Kelma t’Alla x’se jarmana biex nagħmlu?

¹⁰ Li kieku kont taf li xi ħadd ivvalenalek apposta l-​provista taʼ l-​ilma tiegħek, kont int tkompli tixrob minnu? Żgur li kont tieħu azzjoni immedjata biex issib sors taʼ ilma bla periklu u pur. Sewwa, għarfien eżatt tal-​Kelma t’Alla jarmana biex nidentifikaw il-​vera reliġjon u biex nirrifjutaw impuritajiet li jagħmlu l-​qima mhix aċċettabbli għal Alla.

KMANDI TAL-​BNEDMIN BĦALA DUTTRINI

11. X’kien hemm ħażin fil-​qima taʼ bosta Lhud?

¹¹ Meta Ġesù kien fuq l-​art, ħafna Lhud m’aġixxewx fi qbil maʼ l-​għarfien eżatt dwar Alla. Huma għalhekk tilfu l-​opportunità li jkollhom waqfa nadifa quddiem Jehovah. Dwarhom, Pawlu kiteb: “Jien xhud għalihom li huma għandhom iż-​żelu għal Alla, iżda dan iż-​żelu mhux mibni fuq il-​għerf veru [“għarfien eżatt,” NW].” (Rumani 10:2) Huma ddeċidew għalihom infushom kif iqimu lil Alla minflok ma taw widen għal dak li qal.

12. X’ikkontamina l-​qima taʼ Iżrael, u b’liema riżultat?

¹² L-​Iżraeliti oriġinalment ipprattikaw reliġjon pura mogħtija minn Alla, imma din saret ikkontaminata bit-​tagħlim u l-​filosofiji tal-​bnedmin. (Ġeremija 8:8, 9; Malakija 2:8, 9; Luqa 11:52) Għalkemm il-​mexxejja reliġjużi Lhud magħrufin bħala Fariżej ħasbu li l-​qima tagħhom kienet aċċettabbli għal Alla, Ġesù qalilhom: “Sewwa ħabbar Isaija fuqkom, ja nies taʼ wiċċ b’ieħor, bħal ma hu miktub, ‘Dan il-​poplu bix-​xofftejn biss jagħtini ġieh, imma qalbhom hija ’l bogħod minni. Fiergħa hi l-​qima li jagħtuni; igħallmu dottrina li m’hiex għajr preċetti tal-​bnedmin.’”—Mark 7:6, 7.

13. Kif nistgħu nagħmlu bħalma għamlu l-​Fariżej?

¹³ Huwa possibbli li aħna nistgħu nagħmlu bħalma għamlu l-​Fariżej? Dan jistaʼ jiġri jekk insegwu tradizzjonijiet reliġjużi mgħoddijin lilna minflok ma neżaminaw dak li Alla qal dwar il-​qima. Billi wissa dwar dan l-​istess periklu reali, Pawlu kiteb: “L-​Ispirtu jgħidha ċar li fl-​aħħar taż-​żminijiet xi wħud jitbiegħdu mill-​fidi u jagħtu widen għal spirti qarrieqa u għal tagħlim tax-​xjaten.” (1 Timotju 4:1) Mela m’huwiex biżżejjed sempliċement li nassumu li l-​qima tagħna togħġob lil Alla. Bħall-​mara Samaritana li ltaqgħet maʼ Ġesù, nistgħu nkunu writna l-​mod tagħna taʼ qima mingħand il-​ġenituri tagħna. Imma għandna bżonn inkunu ċerti li qegħdin nagħmlu affarijiet li għandhom l-​approvazzjoni t’Alla.

OQGĦOD GĦASSA LI MA TOFFENDIX LIL ALLA

14, 15. Saħansitra jekk għandna xi għarfien dwar ir-​rieda t’Alla, għala għandna bżonn noqogħdu attenti?

¹⁴ Jekk ma nkunux attenti, nistgħu nagħmlu xi ħaġa li mhix aċċettabbli għal Alla. Per eżempju, l-​appostlu Ġwanni nxteħet f’riġlejn anġlu ‘biex jagħtih qima.’ Imma l-​anġlu wissa: “Hekk le! Jiena qaddej bħalek u bħal ħutek li għandhom ix-​xhieda taʼ Ġesù. Il-​qima lil Alla tagħtiha.” (Apokalissi 19:10) Tara int għalhekk il-​bżonn li taċċerta ruħek li l-​qima tiegħek m’hijiex ikkontaminata minn kwalunkwe xorta taʼ idolatrija?—1 Korintin 10:14.

¹⁵ Meta xi Kristjani bdew jipprattikaw drawwiet reliġjużi li ma kinux jogħġbu lil Alla, Pawlu staqsa: “Kif erġajtu lura lejn l-​elementi bla saħħa u bla siwi, u tridu terġgħu taqduhom biex tħarsu l-​jiem, ix-​xhur, l-​istaġuni u s-​snin? Qiegħed nibżaʼ li t-​taħbit li tħabatt għalikom kien kollu taʼ xejn.” (Galatin 4:8-11) Dawk l-​individwi kienu kisbu għarfien dwar Alla imma iktar tard żbaljaw billi osservaw drawwiet reliġjużi u ġranet taʼ festa li ma kinux aċċettabbli għal Jehovah. Bħalma qal Pawlu, għandna bżonn li ‘[‘nibqgħu,’ NW] infittxu li naraw dak li jogħġob lill-​Mulej.’—Efesin 5:10.

16. Ġwann 17:16 u 1 Pietru 4:3 kif jgħinuna niddeċiedu jekk xi btajjel u drawwiet jogħġbux lil Alla?

¹⁶ Irridu nkunu ċerti li nevitaw btajjel reliġjużi u drawwiet oħrajn li jmorru kontra l-​prinċipji t’Alla. (1 Tessalonkin 5:21) Per eżempju, Ġesù qal dwar is-​segwaċi tiegħu: “Huma m’humiex tad-​dinja, bħalma jiena m’iniex tad-​dinja.” (Ġwann 17:16) Hija r-​reliġjon tiegħek involuta f’ċerimonji u btajjel li jmorru kontra l-​prinċipju taʼ newtralità mill-​affarijiet taʼ din id-​dinja? Jew dawk li jħaddnu r-​reliġjon tiegħek xi kultant jieħdu sehem fi drawwiet u festi li jistgħu jinvolvu kondotta bħal dik deskritta mill-​appostlu Pietru? Hu kiteb: “Biżżejjed li fl-​imgħoddi kontu tagħmlu r-​rieda tal-​pagani u tgħixu ħajja żienja f’passjoni bla lġiem, f’sokor, fi tbahrid sfrenat, f’xorb żejjed u fl-​idolatrija moqżieża taʼ l-​allat.”—1 Pietru 4:3.

17. Għala għandna nevitaw kwalunkwe ħaġa li tirrifletti l-​ispirtu tad-​dinja?

¹⁷ L-​appostlu Ġwanni enfasizza l-​ħtieġa li nevitaw kwalunkwe prattiċi li jirriflettu l-​ispirtu tad-​dinja taʼ mingħajr Alla taʼ madwarna. Ġwanni kiteb: “Tħobbux id-​dinja u anqas dak li hemm fiha. Jekk xi ħadd iħobb id-​dinja, l-​imħabba tal-​Missier ma tgħammarx fih. Kull ma fiha d-​dinja, jiġifieri l-​ġibda tal-​ġi[s]em u l-​ġibda tal-​għajnejn u l-​kburija tal-​ħajja, dan m’huwiex ġej mill-​Missier imma mid-​dinja. U d-​dinja bil-​ġibdiet tagħha tgħaddi, iżda min jagħmel ir-​rieda t’Alla jibqaʼ għal dejjem.” (1 Ġwann 2:15-17) Innotajt int li dawk li ‘jagħmlu r-​rieda t’Alla’ se jibqgħu għal dejjem? Iva, jekk nagħmlu r-​rieda t’Alla u nevitaw attivitajiet li jirriflettu l-​ispirtu taʼ din id-​dinja, nistgħu jkollna t-​tama taʼ ħajja taʼ dejjem!

ŻOMM IL-​LIVELLI GĦOLJIN T’ALLA

18. Xi Korintin kif kienu żbaljati dwar il-​kondotta, u x’għandna nitgħallmu minn dan?

¹⁸ Alla jrid bħala adoraturi tiegħu lil dawk li jimxu mal-​livelli morali għoljin tiegħu. Xi wħud f’Korintu tal-​qedem ħasbu b’mod żbaljat li Alla kien se jittollera mġiba immorali. Nistgħu naraw kemm kienu żbaljati billi naqraw 1 Korintin 6:9, 10. Jekk irridu li nqimu lil Alla b’mod aċċettabbli, irridu nogħġbuh bil-​kliem u bil-​għemil. Qiegħda l-​forma taʼ qima tiegħek tgħinek biex tagħmel dak?—Mattew 15:8; 23:1-3.

19. Il-​qima vera kif teffettwa l-​mod kif nittrattaw lil oħrajn?

¹⁹ L-​aġir tagħna maʼ nies oħrajn għandu wkoll jirrifletti l-​livelli t’Alla. Ġesù Kristu inkuraġġiena biex nittrattaw lil oħrajn bħalma kieku nixtiquhom jittrattaw lilna, għax dan huwa parti mill-​qima vera. (Mattew 7:12) Innota x’qal ukoll dwar li nuru l-​imħabba taʼ l-​aħwa: “Minn dan jagħraf kulħadd li intom dixxipli tiegħi, jiġifieri, jekk ikollkom l-​imħabba bejnietkom.” (Ġwann 13:35) Id-​dixxipli taʼ Ġesù jridu jħobbu lil xulxin u jagħmlu l-​ġid lil adoraturi sħabhom u lil oħrajn.—Galatin 6:10.

QIMA B’RUĦNA KOLLHA

20, 21. (a) Alla liema xorta taʼ qima jirrikjedi? (b) Jehovah għala rrifjuta l-​qima taʼ Iżrael fi żmien Malakija?

²⁰ F’qalbek, tistaʼ tkun trid li tqim lil Alla b’mod aċċettabbli. Jekk inhu hekk, irid ikollok il-​ħarsa taʼ Jehovah dwar il-​qima. Id-​dixxiplu Ġakbu enfasizza li hija l-​opinjoni t’Alla li hija importanti, mhux tagħna. Ġakbu qal: “Quddiem Alla u Missierna t-​tjieba [‘l-​forma taʼ qima,’ NW] safja u bla tebgħa hija din: iżżur l-​iltiema u r-​romol fil-​hemm tagħhom, u żżomm ruħek bla tinġis ’il bogħod mid-​dinja.” (Ġakbu 1:27) B’xewqa biex nogħġbu lil Alla, kull wieħed minna jeħtieġ li jeżamina l-​qima tagħna biex ikun żgur li m’hijiex ikkontaminata bi prattiċi m’humiex qaddisin jew li m’aħniex inħallu barra xi ħaġa li hu jikkunsidra vitali.—Ġakbu 1:26.

²¹ Qima nadifa b’ruħna kollha biss togħġob lil Jehovah. (Mattew 22:37; Kolossin 3:23) Meta l-​ġens taʼ Iżrael ta lil Alla inqas minn dak, hu qal: “L-​iben iweġġaħ lil missieru, u l-​qaddej lil sidu. Jekk mela jiena missier, fejn hu t-​tweġġiħ tiegħi? U jekk jiena sid, fejn hu l-​biżaʼ minni?” Huma kienu qegħdin joffendu lil Alla billi joffrulu annimali għomja, zopop, u morda bħala sagrifiċċju, u hu rrifjuta atti bħal dawn taʼ qima. (Malakija 1:6-8) Jehovah jixraqlu l-​forma l-​iktar pura taʼ qima u ma jaċċetta xejn inqas minn devozzjoni esklussiva.—Eżodu 20:5; Proverbji 3:9; Apokalissi 4:11.

22. Jekk irridu li Alla jaċċetta l-​qima tagħna, x’se nevitaw, u x’se nagħmlu?

²² Il-​mara Samaritana li tkellmet maʼ Ġesù kienet tidher interessata f’li tqim lil Alla bil-​mod approvat b’mod divin. Jekk dik hija x-​xewqa tagħna, se nevitaw it-​tagħlim u l-​prattiċi kkontaminati kollha. (2 Korintin 6:14-18) Minflok, se nitħabtu biex nieħdu għarfien eżatt dwar Alla u nagħmlu r-​rieda tiegħu. Se nżommu qrib mal-​ħtiġijiet tiegħu għal qima aċċettabbli. (1 Timotju 2:3, 4) Ix-​Xhieda taʼ Jehovah qegħdin jistinkaw biex jagħmlu preċiżament dak, u kordjalment iħeġġuk li taqsam magħhom f’li tqim lil Alla “fl-​ispirtu u l-​verità.” (Ġwann 4:24) Ġesù qal: “Il-​Missier ukoll, nies bħal dawn ifittex li jadurawh.” (Ġwann 4:23) Huwa ttamat li int persuna bħal din. Bħal dik il-​mara Samaritana, int bla dubju tixtieq li jkollok ħajja taʼ dejjem. (Ġwann 4:13-15) Imma int tara nies jixjieħu u jmutu. Il-​kapitlu li jmiss jispjega għala.

ITTESTJA L-​GĦARFIEN TIEGĦEK

Bħalma huwa muri fi Ġwann 4:23, 24, Alla liema qima jaċċetta?

Kif nistgħu niddeterminaw jekk Alla hux jieħu gost b’ċerti drawwiet u festi?

Liema huma xi ħtiġijiet għal qima aċċettabbli?

[Stampa taʼ paġna sħiħa f’paġna 44]