Suġġerimenti taʼ Preżentazzjonijiet għas-​Servizz taʼ l-​Għalqa

Uża dawn is-​suġġerimenti biex jgħinuk tipprepara xi preżentazzjonijiet biex tintroduċi l-​letteratura li tkun se tiġi offruta f’dak ix-​xahar.

Ersaq Qrib Lejn Jehovah

“Ħafna nies li jemmnu f’Alla jixtiequ li jħossuhom iktar qrib tiegħu. Kont taf li Alla jistidinna biex nersqu qrib lejh? [Aqra Ġakbu 4:8.] Dan il-​ktieb ġie magħmul apposta biex jgħin lin-​nies jużaw il-​Bibbja tagħhom stess ħalli jersqu qrib lejn Alla.” Aqra paragrafu 1 f’paġna 16.

“Illum l-​inġustizzja tinsab kullimkien. Huwa preċiż kif jiddeskrivi hawnhekk. [Aqra Koħèlet 8:9b.] Ħafna jiddubitaw jekk saħansitra Alla jimpurtahx. [Aqra lewwel żewġ sentenzi taʼ paragrafu 4 f’paġna 119.] Dan il-​kapitlu jiddiskuti għala Alla ppermetta l-​inġustizzja għal xi żmien.”

Is-​Sigriet Taʼ L-​Hena Fil-​Familja

“Innotajt li ħafna familji qegħdin isibuha diffiċli biex jissaportu l-​pressjonijiet tal-​ħajja? [Agħti ċans għal tweġiba.] Rapporti jindikaw li ħafna nies iġarrbu xi diffikultajiet fid-​dar. X’taħseb li jistaʼ jgħin lill-​familji biex isibu iktar stabbilità u hena? [Agħti ċans għal tweġiba.] Peress li Alla stabbilixxa l-​arranġament tal-​familja, ma taħsibx li jkun raġunevoli li neżaminaw il-​gwida li ħallielna? [Aqra t-​2 Timotju 3:​16, 17.] Tagħlim taʼ benefiċċju bħal dan jinsab imniżżel f’dan il-​ktieb, Is-​Sigriet Taʼ L-​Hena Fil-​Familja.” Imbagħad staqsi lill-​individwu liema problema jħoss li hija komuni fil-​familji, urih il-​kapitlu li jiddiskuti din il-​problema, u offrilu l-​ktieb.

“Għalkemm kulħadd jixtieq ikollu lkuntentizza u s-​sodisfazzjon, jidher li ħafna familji ma tantx irnexxielhom f’din il-​ħaġa. X’taħseb li jistaʼ jgħinhom isibu l-​veru hena? [Agħti ċans għal tweġiba.] Żmien twil ilu, il-​Bibbja wriet x’tip taʼ problemi konna se naraw fil-​familji llum. [Aqra t-​2 Timotju 3:​1-3.] Madankollu, il-​Bibbja tgħid ukoll lill-​familji xi jridu jagħmlu biex isolvu dawn il-​problemi u biex jiksbu hena dejjiemi. Il-​prinċipji tagħha huma preżentati f’dan il-​ktieb, Is-​Sigriet Taʼ L-​Hena Fil-​Familja.” Imbagħad uri l-​kaxxa tar-​reviżjoni fit-​tmiem taʼ xi kapitlu addattat, aqraha, u offri l-​ktieb.

Iż-​Żgħażagħ Jistaqsu—Tweġibiet Prattiċi għall-​Mistoqsijiet Tagħhom

“Mhux faċli li tkun qed tikber f’dawn iż-​żminijiet taʼ inkwiet. Iż-​żgħażagħ jiffaċċjaw ħafna sitwazzjonijiet li jirrikjedu minnhom li jieħdu deċiżjonijiet serji. ‘Għandi nixrob jew nieħu d-​drogi? Liema kondotta hi xierqa mas-​sess oppost?’ Meta ż-​żgħażagħ jistaqsu dwar dawn il-​kwistjonijiet bażiċi, spiss jingħataw ruxxmata tweġibiet differenti. Fejn taħseb li ħafna minnhom imorru għall-​pariri? [Agħti ċans għal tweġiba.] Dan il-​ktieb, Iż-​Żgħażagħ Jistaqsu​—Tweġibiet Prattiċi għall-​Mistoqsijiet Tagħhom, jipprovdi informazzjoni u għajnuna. [Iġbed l-​attenzjoni lejn il-​werrej u uri kemm jiġu diskussi suġġetti differenti.] Iż-​żgħażagħ għandhom bżonn tweġibiet li huma diretti u prattiċi. It-​tweġibiet f’dan il-​ktieb għandhom l-​appoġġ taʼ dak li tgħid il-​Bibbja.”

“Iż-​żgħażagħ jiffaċċjaw ħafna pressjonijiet illum u jeħtieġu l-​għajnuna biex jegħlbuhom. Ma nkunux irridu xi ħaġa li tipprovdi gwida prattika meta nkunu qed nagħmlu minn kollox biex ngħinuhom? [Agħti ċans għal tweġiba.] Xi wħud mill-​iktar pressjonijiet qawwija jiġu mingħand żgħażagħ oħra, dawk taʼ mparhom. Innota l-​istampi f’paġni 76 u 77 taʼ dan il-​ktieb. [Iġbed l-​attenzjoni għall-​kitba taʼ ħdejn dawn l-​istampi u għall-​paragrafi miktubin bil-​korsiv f’paġna 77.] Il-​paġni l-​oħrajn f’dan il-​kapitlu jagħtu tweġibiet onesti u prattiċi.”

Ibqaʼ Għassa!

“Ħafna nies huma konċernati dwar il-​problemi serji u l-​ġrajjiet tal-​biżaʼ li huma komuni llum. [Semmi eżempju magħruf lokalment.] Kont taf li dawn l-​affarijiet huma parti minn sinjal globali li juri li l-​gvern t’Alla dalwaqt se jieħu f’idejh it-​tmexxija taʼ l-​art? [Agħti ċans għal tweġiba. Imbagħad aqra skrittura addattata, bħal Mattew 24:​3, 7, 8; Luqa 21:​7, 10, 11; jew it-​2 Timotju 3:​1-5.] Dan il-​browxer jiddiskuti għala huwa urġenti speċjalment issa li toqgħod attent għas-​sinifikat taʼ dawn il-​ġrajjiet.”

“Ħafna llum huma mnikktin minħabba l-​ġrajjiet tal-​biżaʼ li qed iseħħu jew minħabba xi traġedja persunali. Xi wħud jistaqsu għala Alla ma jagħmilx xi ħaġa biex dawn l-​affarijiet ma jiġrux. Il-​Bibbja tiżgurana li Alla dalwaqt se jaġixxi biex iġib serħan lill-​bnedmin mis-​sofferenzi. [Aqra Rivelazzjoni 14:​6, 7.] Innota x’se jkun ifisser għall-​bnedmin il-​ġudizzju t’Alla. [Aqra t-​2 Pietru 3:​10, 13.] Dan il-​browxer jagħtik iktar informazzjoni dwar dan is-​suġġett importanti.”

Għarfien Li Jwassal Għall-​Ħajja Taʼ Dejjem

“Li kieku tiġi mistieden biex tgħix f’xi post sabiħ bħal dan, kont taċċetta l-​istedina? [Uri l-​istampa f’paġni 4-5 u agħti ċans għal tweġiba.] Innota x’tgħid il-​Kelma t’Alla dwar x’inhu l-​mezz prinċipali biex ingawdu din il-​kwalità taʼ ħajja għal dejjem. [Aqra Ġwanni 17:3.] Dan il-​ktieb jgħinek tikseb l-​għarfien li jwassal għall-​ħajja taʼ dejjem.” Ftiehem biex fiż-​żjara li jmiss tiddiskutu flimkien l-​ewwel ħames paragrafi taʼ kapitlu 1.

Iftaħ l-​istampa f’paġni 188-9, u billi tuża l-​kliem taʼ ħdejn l-​istampa, staqsi lill-​inkwilin: “Tittama int li tgħix fil-​Ġenna, meta l-​għarfien dwar Alla jimla l-​art? [Agħti ċans għal tweġiba. Imbagħad aqra Isaija 11:9.] Dan il-​ktieb jgħinek titgħallem dwar dak li tgħid il-​Bibbja rigward il-​Ġenna taʼ l-​art u kif nistgħu nkunu parti minnha.” Ftiehem biex fiż-​żjara li jmiss tiddiskutu flimkien paragrafi 11-​16 taʼ kapitlu 1.

Tgħallem mill-​Għalliem il-​Kbir

“Taħseb li d-​dinja tkun post aħjar jekk in-​nies jgħixu fi qbil maʼ dan il-​kliem? [Aqra Mattew 7:​12a. Imbagħad agħti ċans għal tweġiba.] Dan il-​ktieb fih ħafna lezzjonijiet mingħand l-​aqwa għalliem li qatt għex.” Iġbed l-​attenzjoni għall-​istampi u l-​kliem li hemm ħdejhom f’kapitlu 17.

“Il-​biċċa l-​kbira mill-​ġenituri jipprovaw inaqqxu valuri tajbin f’uliedhom. Tħoss li dan hu importanti? [Agħti ċans għal tweġiba. Imbagħad aqra Proverbji 22:6.] Innota li l-​ġenituri huma inkuraġġiti biex jibdew iħarrġu lil uliedhom miċ-​ċokon. Dan il-​ktieb hu mfassal biex jgħinhom jagħmlu dan.” Iġbed l-​attenzjoni għall-​istampi u l-​kliem li hemm ħdejhom f’kapitlu 15 jew 18.

“Spiss il-​ġenituri jibqgħu skantati bil-​mistoqsijiet li joħorġu bihom uliedhom. Xi wħud minn dawn il-​mistoqsijiet ikunu diffiċli biex tweġibhom, hux tassew? [Agħti ċans għal tweġiba. Imbagħad aqra Efesin 6:4.] Dan il-​ktieb jistaʼ jgħin lill-​ġenituri biex iwieġbu l-​mistoqsijiet li jistaqsu t-​tfal tagħhom illum.” Iġbed l-​attenzjoni għal xi ftit mill-​istampi u l-​kliem li hemm ħdejhom f’kapitli 11 u 12 jew 34 sa 36.

L-​Aqwa Bniedem Li Qatt Għex

“F’dan il-​perijodu ħafna nies jaħsbu dwar Ġesù. Iżda, minħabba li mad-​dinja kollha qed jiġru ħafna affarijiet tal-​biżaʼ, xi wħud forsi jiddubitaw jekk hux veru li Ġesù jimpurtah minna. Int x’taħseb dwar dan?” Agħti ċans għal tweġiba. Iftaħ kapitlu 24 u iddiskuti fil-​qosor għala Ġesù ġie fuq l-​art. Imbagħad aqra Ġwanni 15:13 u enfasizza l-​imħabba mill-​qalb li Ġesù għandu għall-​oħrajn.

“Meta xi ħadd isemmi lil Ġesù Kristu, ħafna nies iġibuh quddiem għajnejhom jew bħala tarbija jew bħala raġel qed isofri qabel ma jmut. L-​idea tagħhom dwar Ġesù tinvolvi biss it-​twelid jew il-​mewt tiegħu. L-​affarijiet meraviljużi li qal u li għamel matul ħajtu spiss jiġu injorati. Dak li wettaq jeffettwa lil kull persuna li qatt għexet fuq l-​art. Għalhekk huwa vitali li nitgħallmu kemm nistgħu dwar l-​affarijiet meraviljużi li hu għamel għalina.” Aqra Ġwanni 17:3. Iftaħ l-​ewwel paġna taʼ l-​introduzzjoni u aqra r-​rabaʼ paragrafu.

X’Inhu l-​Iskop tal-​Ħajja?—Kif Tistaʼ Ssibu?

“Ħafna nies jitħassbu dwar x’inhu liskop tal-​ħajja. Huma jistaqsu: ‘Għala qiegħed hawn? Fejn sejjer? Il-​futur x’għandu maħżun għalija?’ Fejn taħseb li nistgħu nsibu r-​risposta għal dawn il-​mistoqsijiet? [Agħti ċans għal tweġiba.] Innota x’tgħid il-​Bibbja. [Aqra Salm 36:10 (Salm 36:9, NW).] M’hijiex ħaġa raġunevoli li tikkonkludi li l-​Ħallieq tal-​bniedem jinsab fl-​aħjar pożizzjoni biex jispjegalna għala qegħdin hawn? [Agħti ċans għal tweġiba.] Dan il-​browxer juri l-​iskop grandjuż li Alla għandu maħżun għalina.” Iftaħ paġni 20-1, aqra l-​kliem taʼ ħdejn l-​istampa u ikkummmenta dwar l-​istampa; imbagħad offri l-​browxer. Jekk l-​inkwilin jaċċettah, staqsih: “Kif nistgħu nkunu ċerti li Alla għad għandu l-​iskop li l-​bnedmin jgħixu għal dejjem f’Ġenna fuq l-​art?” Agħmel appuntament biex terġaʼ tmur.

“Xi darba jew oħra kważi kulħadd jaħseb dwar x’inhu l-​iskop tal-​ħajja. Huwa sempliċement biex ngħixu 70 jew 80 sena, u mbagħad għal ġol-​qabar? Jew għandha iżjed x’toffri l-​ħajja? Int x’taħseb? [Agħti ċans għal tweġiba.] Hawn, f’Salm 37:​29, naraw l-​iskop sabiħ t’Alla għall-​bniedem u għall-​art.” Wara li taqra l-​iskrittura, mur fl-​istampa taʼ paġna 31 u ikkummenta iktar dwar kif se tkun il-​ħajja fil-​Ġenna taʼ l-​art.

Alla X’Jirrikjedi Minna?

“Taħseb li Alla riedna ngħixu mdawrin bi problemi bħal dawk li qed niffaċċjaw illum il-​ġurnata? [Agħti ċans għal tweġiba. Imbagħad aqra Mattew 6:​10.] Qatt ħsibt x’inhi verament is-​Saltna t’Alla?” Mur f’lezzjoni 6 u aqra l-​mistoqsijiet imqajmin fil-​bidu tal-​lezzjoni. Ibda iddiskuti l-​lezzjoni, jew ftiehem biex tagħmel dan meta terġaʼ tmur.

“Minkejja l-​avanzi li għamlet is-​soċjetà moderna, il-​mard u l-​mewt ikomplu jikkaġunaw ħafna niket u tbatija lill-​bnedmin. Taf x’se jagħmel Ġesù għall-​morda, għax-​xjuħ, u saħansitra għall-​mejtin?” Agħti ċans għal tweġiba. Jekk il-​persuna tkun trid taf it-​tweġiba, iftaħ lezzjoni 5 u aqra l-​mistoqsijiet għal paragrafi 5-6. Iddiskuti l-​paragrafi, jew ftiehem biex tagħmel dan meta terġaʼ tmur.

Qim lill-​Uniku Alla Veru

“Fejn taħseb li nistgħu mmorru għall-​għajnuna biex inkampaw mal-​pressjonijiet tal-​ħajja? [Agħti ċans għal tweġiba. Imbagħad aqra Rumani 15:4.] Innota li l-​Iskrittura ispirata tipprovdilna tagħlim, faraġ, u tama, li jistgħu jsaħħuna biex nissaportu d-​diffikultajiet. Dan il-​ktieb joffri suġġerimenti utli dwar kif nistgħu niksbu l-​akbar benefiċċju mill-​qari tal-​Bibbja.” Iġbed l-​attenzjoni lejn l-​erbaʼ punti msemmijin f’paġna 30.

“Ħafna nies ilhom jitolbu biex tiġi s-​Saltna t’Alla minn mindu Ġesù kien fuq l-​art. Qatt ħsibt x’se tkun tfisser għall-​bnedmin il-​miġja taʼ din is-​Saltna? [Agħti ċans għal tweġiba. Imbagħad aqra Danjel 2:​44.] Dan il-​ktieb jispjega x’inhi s-​Saltna t’Alla, x’se twettaq, u kif nistgħu nibbenefikaw mit-​tmexxija ġusta tagħha.” Iġbed l-​attenzjoni għall-​istampa f’paġni 92-3.