Konversazzjonijiet Kordjali Jistgħu Jilħqu L-​Qalb

¹ Il-​konversazzjoni tistaʼ tiġi mfissra bħala li hija “tibdil taʼ ideat bil-​fomm.” Li nibdew konversazzjonijiet kordjali fuq suġġett li jikkonċerna lil oħrajn jistaʼ jattira l-​interess tagħhom u jistaʼ jgħinna f’li nilħqu lil qlubhom bil-​messaġġ tas-​Saltna. L-​esperjenza wriet li huwa ħafna iktar effettiv li tinkludi lin-​nies f’konversazzjoni dħulija u rilassata milli tagħmlilhom priedka.

² Kif Nibdew Konversazzjoni Kordjali: Li nkunu kapaċi nitkellmu man-​nies ma jfissirx li rridu nippreżentaw xi arranġament taʼ ħsibijiet u skritturi li jimpressjonaw. Jinvolvi sempliċement li nqanqlu lill-​persuna l-​oħra titkellem magħna. Per eżempju, meta jkollna konversazzjoni taʼ ħbieb mal-​ġara li toqgħod ħdejna, il-​konversazzjoni tkun rilassata mhux riġida. M’aħniex naħsbu dwar dak li se ngħidu imma qegħdin inwieġbu b’mod naturali għall-​ideat li hi tesprimi. Jistaʼ jinkuraġġiha li tkompli titkellem magħna jekk nuru interess ġenwin f’dak li tgħid. L-​istess għandu jkun meta nkunu qegħdin nagħtu xiehda lil oħrajn.

³ Suġġetti bħalma huma l-​kriminalità, il-​problemi fiż-​żgħożija, kwistjonijiet lokali, il-​kundizzjonijiet fid-​dinja, jew saħansitra t-​temp jistgħu jintużaw biex jinbdew konversazzjonijiet kordjali. Suġġetti li jeffettwaw direttament lill-​ħajjiet tan-​nies huma effettivi ħafna f’li jqajmu interess. Ladarba tkun inbdiet konversazzjoni, nistgħu bil-​galbu nidderiġuha lejn il-​messaġġ tas-​Saltna.

⁴ Ma jfissirx li għax ikollna konversazzjoni kordjali m’hemmx bżonn taʼ preparazzjoni bil-​quddiem. Hemm bżonnha. Madankollu, m’hemmx għalfejn noħolqu xi linja taʼ ħsieb riġida jew niftakru priedka bl-​amment, għax dan jirriżulta f’konversazzjoni li ma tkunx flessibbli jew addattata għaċ-​ċirkostanzi taʼ dak il-​ħin. (Qabbel 1 Korintin 9:​20-23.) Mod eċċellenti kif nippreparaw huwa li nagħżlu xi tema Skritturali jew tnejn, bil-​għan li nibnu konversazzjonijiet madwarhom. Ikun t’għajnuna biex nagħmlu dan jekk nirrevedu s-​suġġetti fil-​ktieb Reasoning.

⁵ Kwalitajiet Essenzjali Għal Konversazzjoni Kordjali: Meta nitkellmu m’oħrajn, għandna nkunu kordjali u sinċieri. Tbissima u dehra ferriħija jgħinuna biex nirriflettu dawn il-​kwalitajiet. Aħna għandna l-​aqwa messaġġ fid-​dinja; jattira ħafna lil dawk taʼ qalb onesta. Jekk iħossuhom li l-​interess tagħna fihom huwa mqanqal minn xewqa sinċiera li naqsmu ftit aħbar tajba magħhom, forsi mbagħad iħossuhom imqanqlin li jagħtu widen.​—2 Kor. 2:17.

⁶ Li nieħdu sehem f’konversazzjoni għandha tkun esperjenza pjaċevoli. Għalhekk, għandna nuru qalb tajba u tattika meta nippreżentaw il-​messaġġ tas-​Saltna. (Gal. 5:22; Kol. 4:6) Stinka biex tħalli impressjoni favorevoli mal-​persuna l-​oħra. B’dan il-​mod, saħansitra jekk fl-​ewwel darba ma kellniex suċċess f’li nilħqulha qalbha, għandha mnejn tkun iktar lesta li tismaʼ meta d-​darba li jmiss jitkellem magħha Xhud ieħor.

⁷ Li nibdew konversazzjoni kordjali m’huwiex ir-​riżultat taʼ li nitgħallmu xi priedka komplessa. Hija sempliċement kwistjoni taʼ li nqajmu interess f’suġġett li persuna jimpurtaha minnu. Ladarba nkunu ppreparajna bil-​quddiem, se nkunu ­lesti li ninkludu lin-​nies f’konversazzjonijiet kordjali. Ħalli nistinkaw biex nilħqu l-​qlub taʼ dawk li niltaqgħu magħhom billi naqsmu magħhom l-​aqwa aħbar li wieħed jistaʼ jsib, dik taʼ barkiet dejjiema tas-​Saltna.​—2 Piet. 3:13.