Se Nistudjaw Il-​Ktieb L-​Hena Fil-​Familja

Tieħdu pjaċir li ssiru tafu li mill-​ġimgħa li tibda mis-​6 t’Ottubru, 1997, se nikkunsidraw il-​ktieb Is-​Sigriet Taʼ L-​Hena Fil-​Familja fl-​Istudju tal-​Ktieb tal-​Kongregazzjoni. Ħadd m’għandu jitlef l-​istudju bħala grupp taʼ din il-​gwida Skritturali prattika għal ħajja tal-​familja hienja. L-​iskeda taʼ l-​istudju se tħalli lok għal eżaminar bir-​reqqa taʼ kull paragrafu u test Bibliku fil-​ktieb.

L-ewwel kapitlu se jiġi kkunsidrat kollu kemm hu fl-​ewwel ġimgħa taʼ l-​istudju, peress li fih ftit skritturi li m’humiex ikkwotati. Għall-​istess raġuni, kapitlu 15 se jiġi kkunsidrat f’sessjoni waħda. Madankollu, il-​kapitli l-​oħrajn kollha se jinqasmu f’żewġ partijiet, b’madwar nofs il-​kapitlu mgħoddi kull ġimgħa. B’hekk, se jkollna biżżejjed ħin biex naqraw u niddiskutu l-​iskritturi ċitati koll­ha, kif ukoll biex neżaminaw l-​applikar taʼ l-​iskritturi kwotati kollha f’kull paragrafu.

Aspett importanti taʼ l-​istudju se jkun diskussjoni tal-​materjal fil-​kaxxa tat-​tagħlim fit-​tmiem taʼ kull kapitlu. Għalhekk, għandu jitwarrab biżżejjed ħin biex jiġu kkunsidrati l-​mistoqsijiet u l-​iskritturi ċitati fil-​kaxxa.

Dawk li jikkonduċu l-​Istudju tal-​Ktieb tal-​Kongregazzjoni huma mħeġġin biex jagħtu attenzjoni speċjali għall-​preparazzjoni tagħhom taʼ l-​istudju u biex jinkuraġġixxu lil dawk kollha assenjati lill-​grupp tagħhom, inklużi wħud ġodda, biex jippreparaw tajjeb, jattendu regolarment u jipparteċipaw.​—om 74-6.