Nikkonduċu Studji tal-​Bibbja Progressivi—Ir-​Rabaʼ Parti

Inħarrġu lill-​Istudenti biex Jippreparaw

¹ Student li jaqra l-​lezzjoni minn qabel, jimmarka t-​tweġibiet, u jaħseb fuq kif jistaʼ jesprimihom fi kliemu stess, ġeneralment jagħmel progress spiritwali mgħaġġel. Għalhekk, ladarba jiġi stabbilit studju regulari, ippreparaw lezzjoni flimkien u uri lill-​istudent kif għandu jipprepara. Kif juri l-​każ taʼ ħafna studenti, jistaʼ jkun t’għajnuna jekk tippreparaw kapitlu jew lezzjoni sħiħa flimkien.

² L-​Immarkar u n-​Noti: Spjega kif issib tweġibiet diretti għall-​mistoqsijiet stampati. Uri lill-​istudent mill-​kopja persunali tiegħek tal-​pubblikazzjoni għall-​istudju li int tkun immarkajt biss il-​kliem u l-​frażijiet prinċipali. Hekk kif tkunu qed tikkunsidraw il-​materjal, hu għandu mnejn ikun irid jimita l-​eżempju tiegħek, billi fil-​kopja tiegħu jimmarka biss dak li hemm bżonn sabiex ikun jistaʼ jiftakar it-​tweġiba. (Lq. 6:40) Imbagħad staqsieh biex jgħidlek it-​tweġiba fi kliemu. Dan se jgħinek tara kemm qed jifhem sew il-​materjal.

³ Parti importanti mill-​preparazzjoni għall-​istudju taʼ l-​istudent hi li jeżamina bir-​reqqa l-​iskritturi li ma jkunux kwotati. (Atti 17:11) Għinu jara kif l-​iskritturi ċitati li m’humiex kwotati jappoġġaw il-​punt li jkun qed jinħareġ fil-​paragrafu. Urih kif jistaʼ jagħmel noti qosra fil-​ġenb tal-​pubblikazzjoni li jkun qed jistudja. Enfasizzalu l-​fatt li l-​Bibbja hija l-​bażi taʼ dak li qed jitgħallem. Inkuraġġieh juża kemm jistaʼ jkun l-​iskritturi ċitati fil-​kummenti tiegħu waqt l-​istudju.

⁴ Daqqa t’Għajn Qabel l-​Istudju u Reviżjoni: Qabel ma l-​istudent jibda jipprepara l-​materjal għall-​istudju fid-​dettall, se jkun t’għajnuna għalih jekk jagħti daqqa t’għajn minn qabel lis-​suġġett. Urih li hu jistaʼ jagħmel dan billi jeżamina fil-​qosor it-​titlu tal-​kapitlu, is-​sottitli, u l-​istampi. Spjegalu li qabel ma jispiċċa l-​preparazzjoni tiegħu jkun għaqli li jieħu l-​ħin sabiex jirrivedi l-​punti prinċipali tal-​lezzjoni, billi forsi juża l-​kaxxa għal reviżjoni, jekk ikun hemm. Din ir-​ripetizzjoni tgħinu jibqaʼ jiftakar l-​informazzjoni.

⁵ Meta tħarreġ lill-​istudent biex jipprepara sew għall-​istudju tiegħu, tkun qed tgħinu jagħmel kummenti tajbin fil-​laqgħat tal-​kongregazzjoni. Tgħinu wkoll jiżviluppa drawwiet tajbin taʼ studju li se jkunu taʼ benefiċċju għalih anki meta jitlesta l-​istudju tal-​Bibbja li qed isir għalih persunali.