Nikkonduċu Studji tal-​Bibbja Progressivi—It-​Tieni Parti

Nippreparaw biex Nikkonduċu l-​Istudju

¹ It-​tagħlim effettiv waqt studju tal-​Bibbja jinvolvi iktar milli sempliċement niddiskutu l-​materjal u nfittxu l-​iskritturi ċitati. Irridu nippreżentaw l-​informazzjoni b’tali mod li tilħaq qalb l-​istudent. Dan jirrikjedi li nippreparaw bir-​reqqa bl-​istudent f’moħħna.​—Prov. 15:28.

² Kif Tipprepara: Ibda billi titlob lil Jehovah dwar l-​individwu u l-​bżonnijiet tiegħu. Itlob lil Jehovah biex jgħinek tilħaq qalb l-​istudent. (Kol. 1:​9, 10) Sabiex ikollok it-​tema ċara f’moħħok, ħu ftit ħin biex tikkunsidra t-​titlu tal-​kapitlu jew tal-​lezzjoni, is-​sottitli, u xi stampi li jistaʼ jkun hemm. Staqsi lilek innifsek, ‘X’inhu l-​għan ewlieni tal-​materjal?’ Dan se jgħinek tiffoka fuq il-​punti prinċipali waqt li tikkonduċi l-​istudju.

³ Irrivedi bir-​reqqa l-​materjal paragrafu paragrafu. Sib it-​tweġibiet għall-​mistoqsijiet stampati, u immarka biss il-​kliem u l-​frażijiet prinċipali. Analizza kif l-​iskritturi ċitati huma marbutin mal-​punt prinċipali tal-​paragrafu, u iddeċiedi liema minnhom se taqra matul l-​istudju. Tistaʼ ssibha t’għajnuna li tniżżel noti qosra dwar l-​iskritturi fil-​ġenb tal-​pubblikazzjoni. L-​istudent għandu jifhem b’mod ċar li dak li qed jitgħallem ġej mill-​Kelma t’Alla.​—1 Tess. 2:​13.

⁴ Addatta l-​Lezzjoni Skond l-​Individwu: Imbagħad, ikkunsidra l-​lezzjoni bl-​istudent partikulari f’moħħok. Ipprova aħseb bil-​quddiem x’mistoqsijiet se jistaqsi u liema punti għandu mnejn isibhom diffiċli biex jifhimhom jew jaċċettahom. Staqsi lilek innifsek: ‘X’għandu bżonn jifhem jew fuqiex għandu bżonn jaħdem sabiex jimxi ’l quddiem spiritwalment? Kif nistaʼ nilħaqlu qalbu?’ Imbagħad addatta t-​tagħlim tiegħek skond dan. Xi drabi, għandek mnejn tħoss il-​bżonn li tħejji xi tixbiha, spjegazzjoni, jew serje taʼ mistoqsijiet biex tgħin lill-​istudent jifhem it-​tifsira taʼ xi punt jew skrittura partikulari. (Neħ. 8:8) Imma evita li ddaħħal informazzjoni żejda li ma tkunx daqshekk neċessarja biex tiżviluppa t-​tema. Reviżjoni qasira fl-​aħħar taʼ l-​istudju se tgħin lill-​istudent jiftakar il-​punti prinċipali.

⁵ X’ferħ ikollna meta wħud ġodda jagħmlu frott ġust għat-​tifħir taʼ Jehovah! (Flp. 1:​11) Sabiex tgħinhom jilħqu din il-​mira, ipprepara sewwa kull darba li tikkonduċi studju tal-​Bibbja.