Bini Tas-​Swali Tas-​Saltna Fil-​Britannja U F’Malta

¹ Meta nħarsu lejn l-​għalqa dinjija, nieħdu gost naraw iż-​żjieda grandjuża li qed tesperjenza l-​organizzazzjoni taʼ Jehovah fuq l-​art. Is-​sena l-​oħra fil-​Britannja biss, ġew ifformati 23 kongregazzjoni ġdida, fil-​waqt li żdiedu total taʼ 3,288 kongregazzjoni madwar id-​dinja. B’dan it-​tkabbir kollu, m’huwiex taʼ sorpriża li hemm bżonn t’iktar Swali tas-​Saltna.

² Ħafna aħwa rġiel u nisa juru żelu u appoġġ li jispikkaw lejn l-​organizzazzjoni taʼ Jehovah billi joffru minn jeddhom il-​ħin u l-​assi tagħhom għall-​bini tas-​Swali tas-​Saltna. Il-​15-il Kumitat taʼ Bini Reġjonali li joperaw fil-​Britannja jieħdu ħsieb tal-​bżonnijiet taʼ madwar 100 kongregazzjoni kull wieħed fir-​reġjun assenjat lilhom. Kull sena, jinbnew bejn wieħed u ieħor 23 Sala tas-​Saltna ġdida u 40 oħra jiġu rinnovati. Il-​kumitati reġjonali ġew fdati bl-​indokrar taʼ dawn il-​proġetti u xogħolhom huwa apprezzat. L-​arranġament sħiħ tal-​bini tas-​Swali tas-​Saltna jitwettaq permezz taʼ l-​ispirtu Kristjan taʼ li nagħtu u li nissagrifikaw lilna nfusna​—l-​oppost taʼ l-​ispirtu soltu muri fid-​dinja.​—2 Tim. 3:​2, 4.

³ Biex tgħin ħalli s-​Swali tas-​Saltna jkunu taʼ l-​istess livell, is-​Soċjetà pprovdiet lill-​kumitati reġjonali Pakkett Taʼ Pjanti u Bini Taʼ Swali Tas-​Saltna Iktar Sempliċi. Dan se jgħin biex jiffranka kemm il-​ħin u kemm ir-​riżorsi tal-​ħaddiema volontieri. Se jgħin ukoll fl-​amministrar għaqli tal-​Fond Tas-​Soċjetà Għas-​Swali Tas-​Saltna. L-​anzjani issa jagħmlu l-​għażla tagħhom minn dawn il-​pjanti bażiċi. Wara li rċieva din l-​għodda ġdida, Kumitat Reġjonali tal-​Bini stqarr: “Konna ferħanin u fil-​fatt eċċitati ħafna li nirċievu l-​pakkett taʼ pjanti. . . . Aħwa esperjenzati fl-​arkitettura u fl-​inġinerija kkalkulaw madwar 50 sa 60 fil-​mija tnaqqis fil-​ħin billi jintużaw dawn il-​pjanti ġodda. B’dan il-​pakkett f’idejna se jirnexxilna niksbu livelli għas-​Swali tas-​Saltna iktar uniformi u konsistenti.” Hekk kif il-​kongregazzjonijiet jikkoperaw f’li jappoġġjaw il-​bini tas-​Swali tas-​Saltna fuq l-​istess livell, nantiċipaw li t-​tagħbija tal-​ħafna periti, inġiniera, u kuntratturi dedikati li minn jeddhom joffru l-​għajnuna tagħhom se teħfief b’mod konsiderevoli. Dawn il-​pjanti forsi ma jgħoddux għal Malta minħabba l-​ammont limitat disponibbli t’art u t-​tip taʼ materjal użat fil-​bini. Madankollu, dawn l-​iżviluppi se jinteressawkom peress li jeffettwaw lill-​għalqa dinjija.

⁴ Volontieri Jappoġġjaw Xogħol Mill-​Aħjar: Is-​Soċjetà hi grata lejn il-​ħafna volontieri li jgħinu fil-​bini tas-​Swali tas-​Saltna. Hi verament xi ħaġa li tagħtik gost li tara għaxriet t’eluf taʼ volontieri joffru lilhom infushom fl-​aspetti kollha tal-​bini tas-​Swali tas-​Saltna. Is-​suċċess taʼ dan il-​programm huwa possibbli minħabba spirtu lest għax-​xogħol, ġeneruż, u koperattiv bħal dan min-​naħa tal-​ħaddiema volontieri, li jissagrifikaw ħin li jistgħu kieku jqattgħuh mal-​kongregazzjonijiet u l-​familji tagħhom. (Salm 110:​3, KŻ; Kol. 3:​23) Għal dan ir-​rispons mimli mħabba ħaqqhom il-​prosit, l-​apprezzament u l-​appoġġ sħiħ tagħna. (Rum. 12:10; Lhud 13:1) Intom esperjenzajtu dan l-​appoġġ kollu mħabba matul il-​bini tas-​Swali tas-​Saltna f’Malta u Għawdex u huwa għaxqa li tara Swali tas-​Saltna bħal dawn jintużaw biex iġibu ’l quddiem l-​interessi tas-​Saltna taʼ Jehovah.

⁵ Dawk kollha li huma kkwalifikati biex jassistu lill-​Kumitati Reġjonali tal-​Bini madwar id-​dinja jew biex jieħdu sehem fi proġetti taʼ bini taʼ Swali tas-​Saltna fejn m’hemmx Kumitati Reġjonali tal-​Bini fuq bażi regulari ġew mitlubin biex jimlew formoli tal-​Kwestjonarju Għall-​Ħaddiema Volontieri Fis-​Swali Tas-​Saltna (S-82). Il-​kongregazzjoni tibgħat dawn lill-​kumitat reġjonali jew lill-​kumitat tal-​proġett, fejn jindikaw il-​kwalifiki u d-​disponibbiltà tal-​ħaddiem. Meta jkun hemm xi tibdil fl-​istatus taʼ xi ħaddiem, bħal meta wieħed ibiddel id-​dar jew jinħatar qaddej ministerjali jew anzjan, għandhom jimtlew minnufih formoli ġodda u jintbagħtu mis-​segretarju tal-​kongregazzjoni. Jekk volontier m’għadux jikkwalifika, l-​anzjani għandhom jinformaw mill-​ewwel bil-​kitba lill-​kumitat reġjonali jew lill-​kumitat tal-​proġett. Meta jinħtieġu iktar formoli, dawn jistgħu jintalbu permezz tal-​formola għat-​Talba tal-​Letteratura taʼ kull xahar. L-​indokratur tas-​circuit ukoll hu interessat f’dawk li offrew lilhom infushom għal dan il-​qasam taʼ servizz sagru. Għalhekk, hu jirrevedi l-​file li fih il-​kopji tal-​kwestjonarji għall-​ħaddiema volontieri fis-​Swali tas-​Saltna kull darba li jżur il-​kongregazzjoni.

⁶ Kwalunkwe kuntrattur magħżul biex jagħmel xi ftit mix-​xogħol f’Sala tas-​Saltna għandu jintalab juri provi li hu kopert minn assigurazzjoni kontra kull ħsara li tistaʼ ssir fuq nies jew proprjetà.

⁷ Iżommu L-​Ispejjeż Tal-​Bini Baxxi Kemm Jistaʼ Jkun: Kumitati Reġjonali tal-​Bini u Kumitati tal-​Proġetti ntqalilhom biex jorganizzaw dipartiment tax-​xiri taħt il-​ħarsien t’anzjan kapaċi. Aħwa li jaħdmu f’dan id-​dipartiment jistudjaw il-​prezzijiet tal-​prodotti li hemm fis-​suq sabiex isibu prezzijiet tajbin billi jqabbluhom maʼ taʼ ħwienet oħrajn u jagħmlu offerti kompetittivi. B’dan il-​mod, ikunu jistgħu jiddeterminaw mingħand min għandhom jixtru u liema materjal għandu jinxtara. Xi kultant, matul ix-​xogħol fuq xi proġett taʼ Sala tas-​Saltna, aħwa kwalifikati fil-​kongregazzjoni lokali jiġu mistednin biex jgħinu f’dan id-​dipartiment.

⁸ Biex ikun ċert li l-​fondi se jintużaw b’mod ekonomiku kemm jistaʼ jkun, il-​Kumitat Reġjonali tal-​Bini jew il-​Kumitat tal-​Proġett irid japprova kull infiq mill-​fondi tal-​bini, billi ċ-​ċekkijiet jew l-​irċevuti taʼ kreditu jkollhom iktar minn firma waħda. Kulmeta xi proġett taʼ Sala tas-​Saltna, kemm jekk se jsir bini mill-​ġdid jew rinnovazzjoni, jinvolvi l-​użu t’għajnuna taʼ volontieri minn kongregazzjonijiet apparti minn dik jew dawk li se jiltaqgħu fis-​sala, il-​kumitat reġjonali jew il-​kumitat tal-​proġett se jkollu f’idejh il-​ħarsien tal-​proġett.

⁹ Għajnuna Fejn Ikun Hemm Il-​Bżonn F’Fergħat Jew F’Pajjiżi Oħrajn: Jeżistu okkażjonijiet fejn fergħat jew pajjiżi oħrajn ikunu jinħtieġu l-​għajnuna. Għajnuna bħal din hija taʼ spiss neċessarja biex tissewwa l-​ħsara wara xi diżastru jew biex jiġi pprovdut l-​appoġġ fejn ix-​xogħol tas-​sengħa li jkun bżonnjuż ma jkunx jistaʼ jlaħħaq maʼ l-​ammont taʼ xogħol involut fil-​proġett. Hija verament espressjoni taʼ mħabba meta aħwa responsabbli minn pajjiż wieħed huma lesti li jivvjaġġaw minn buthom biex jgħinu f’pajjiż ieħor. Dan kien il-​każ fil-​proġett tal-​Mosta fejn ġiet ipprovduta b’mod ġeneruż l-​għajnuna f’forma taʼ materjal u xogħol kemm mill-​fergħa fil-​Britannja u kemm minn dik fl-​Italja.

¹⁰ Minħabba t-​talba li dejjem tiżdied għal Swali tas-​Saltna f’artijiet oħrajn, hemm bżonn li l-​fondi eżistenti jintużaw bil-​għaqal kemm jistaʼ jkun. Il-​kongregazzjonijiet ġew inkuraġġiti biex jekonomizzaw kemm jistaʼ jkun fil-​bini taʼ Swali tas-​Saltna ġodda jew fir-​rinnovazzjoni taʼ wħud eżistenti. Din it-​talba ntlaqgħet b’koperazzjoni mill-​aħjar. B’hekk iktar fondi tas-​Soċjetà setgħu jintużaw biex jappoġġjaw ix-​xogħol tas-​Saltna f’artijiet oħrajn fejn hemm riżorsi limitati jew problemi ekonomiċi estremi.

¹¹ Il-​bżonn taʼ iktar Swali tas-​Saltna f’ċerti artijiet huwa enfasizzat fin-​1997 Yearbook. Per eżempju, tissemma l-​Ukranja, fejn s’issa nbnew 47 Sala tas-​Saltna u għaddej il-​bini taʼ 56 oħra. Il-​bżonn f’dawk il-​pajjiżi huwa evidenti ħafna. Ir-​rapport jgħid: “Huma meħtieġa ħafna iktar Swali tas-​Saltna fir-​Russja. Iż-​żjieda fl-​għadd taʼ Xhieda hemmhekk hi mgħaġġla ħafna, imma madwar 85 fil-​mija tal-​kongregazzjonijiet taħt il-​fergħa fir-​Russja m’għandhomx postijiet permanenti fejn jiltaqgħu. F’Żimbabwe, fejn hemm mat-​800 kongregazzjoni, ħafna minnhom ikollhom jiltaqgħu barra fil-​miftuħ. Dan ġiegħel lil xi wħud ġodda li wrew interess li jżommu lura milli jattendu.” Sitwazzjonijiet simili jeżistu f’pajjiżi oħrajn fl-​Ewropa tal-​Lvant, fl-​Afrika, u fl-​Amerka Latina.

¹² Għalkemm l-​imħabba tal-​biċċa l-​kbira tal-​bnedmin birdet f’dawn l-​aħħar jiem, in-​nies t’Alla jkomplu juru evidenza taʼ l-​imħabba tagħhom lejn xulxin, imħabba li tisboq kull fruntiera razzjali u territorjali. (Matt. 24:12) Billi nimitaw lil Missierna tas-​sema, jalla nibqgħu nuru mħabba bħal din bl-​appoġġ minn jeddna fil-​bini tas-​Swali tas-​Saltna fil-​Britannja, f’Malta u barra. Li nagħmlu hekk se jġib il-​barka u l-​approvazzjoni għanja taʼ Jehovah.​—Mal. 3:​10; Lhud 6:​10.