Il-​Programm tal-​Bini tas-​Swali tas-​Saltna Jimxi ’l Quddiem

¹ Fl-​1986, fil-​Konvenzjonijiet Distrettwali fil-​Britannja, ġie mħabbar li kien se jitwaqqaf fond speċjali biex fil-​pajjiż ikunu jistgħu jinbnew Swali tas-​Saltna ġodda u oħrajn jiġu rranġati. Fond li jixbah lil dan twaqqaf fl-​Istati Uniti u fil-​Kanada tliet snin qabel. Dakinhar bilkemm intbaħna x’barkiet kienu se jirriżultaw minn dan il-​bidu daqshekk żgħir. Bdejna nesperjenzaw iktar bis-​sħiħ dak li jistqarr b’mod tant xieraq Salm 92:5 (92:​4, NW): “Għax inti, Mulej, ferraħtni b’għemilek; għal għemil idejk jien ngħanni bil-​ferħ.”

² Issa aħna nifirħu bil-​kbir b’dak li qed jitwettaq. Illum għaddej programm mgħaġġel tal-​bini tas-​Swali tas-​Saltna, u lkoll kemm aħna għandna l-​privileġġ li nieħdu sehem f’din l-​attività. Dan nagħmluh billi nagħmlu kontribuzzjonijiet żgħar jew kbar taʼ flus biex ngħinu fil-​finanzi tal-​bini taʼ iktar postijiet għall-​qima madwar id-​dinja. Ħafna aħwa wkoll joffru l-​użu tat-​tagħmir tagħhom kif ukoll il-​ħin, l-​abbiltajiet, u s-​snajjaʼ li għandhom għal proġetti bħal dawn. L-​arranġament kollu qed jirnexxi minħabba l-​gwida, l-​appoġġ, u l-​barkiet għonja taʼ Jehovah fuq l-​isforzi li nagħmlu lkoll flimkien.—Salm 127:1.

³ Fis-​Swali tas-​Saltna kollha tagħna, hemm kaxxa li fiha l-​pubblikaturi jitfgħu l-​kontribuzzjonijiet tagħhom għall-​Fond tas-​Swali tas-​Saltna. Fl-​Istati Uniti, Il-​Ministeru tas-​Saltna għal Marzu 1997 ħabbar aġġustament f’dan il-​programm. Dan stqarr: “Minn mindu twaqqaf il-​Fond tas-​Swali tas-​Saltna tas-​Soċjetà fl-​1983, l-​aħwa kkontribwew b’mod ġeneruż, u b’hekk setaʼ jsir self għall-​bini tas-​Swali tas-​Saltna. F’dan il-​pajjiż diġà bbenefikaw 2,700 kongregazzjoni minn dan l-​arranġament. Ħafna kongregazzjonijiet bl-​ebda mod ma setgħu jibnu Swali tas-​Saltna ġodda jew jirrestawraw dawk li kellhom bżonn it-​tiswija. Issa hemm bżonn urġenti li jintużaw xi wħud minn dawn il-​fondi kontribwiti biex isir self lill-​kongregazzjonijiet f’pajjiżi li għaddejjin minn kriżi ekonomika. L-​appoġġ kontinwu tagħkom għal dan l-​arranġament huwa apprezzat ħafna mis-​Soċjetà u minn dawk il-​kongregazzjonijiet li qed jibbenefikaw mill-​kontribuzzjonijiet tagħkom.” (Fil-Britannja iktar minn 300 kongregazzjoni bbenefikaw bl-​istess mod minn dan l-​arranġament.)

⁴ Dak l-​avviż serva taʼ stedina biex wieħed jieħu sehem fil-​programm mgħaġġel tal-​bini tas-​Swali tas-​Saltna. Il-​Fond tas-​Swali tas-​Saltna kellu jikber biex jinkludi l-​bżonnijiet taʼ ħutna f’pajjiżi oħrajn, filwaqt li jkompli jipprovdi self għall-​bini tas-​Swali tas-​Saltna lokalment. Xi sentejn ilu l-​kongregazzjonijiet fil-​Britannja indikaw li kienu fi qbil dwar li l-​fondi diġà kontribwiti jintużaw b’dan il-​mod iktar mifrux. Matul l-​aħħar tas-​sena taʼ servizz biss, ġew ifformati 3,288 kongregazzjoni ġdida. Ħafna minn dawn il-​kongregazzjonijiet jinsabu fl-​Afrika, fl-​Amerika Ċentrali u t’Isfel, fl-​Asja, u fl-​Ewropa tal-​Lvant.”

⁵ X’kienu r-​riżultati minn dak iż-​żmien ’l hawn? It-​2001 Yearbook irrapporta: “B’dan l-​arranġament, fi 30 pajjiż, s’issa tlestew 453 Sala tas-​Saltna, u qed jinbnew 727 binja oħra. Ġie enfasizzat li għal kull pajjiż isiru pjanti għal Swali tas-​Saltna taʼ l-​istess tip li fihom jintużaw il-​materjali u l-​metodi lokali għall-​bini. Fil-​Kenja jintuża ġebel maqtugħ mill-​barrieri, f’Togo huwa komuni li jintuża l-​briks, u fil-​Kamerun huma popolari l-​blokok tal-​konkos li mbagħad jitkaħħlu. B’dan il-​mod l-​aħwa lokali malajr ikunu jistgħu jitgħallmu s-​snajjaʼ meħtieġa biex iwettqu l-​irwoli importanti tagħhom fil-​programm nazzjonali.”

⁶ Il-​barkiet taʼ Jehovah fuq dan il-​programm jidhru biċ-​ċar mill-​kontinent kbir taʼ l-​Afrika. Hekk kif tagħti daqqa t’għajn lejn l-​istampi taʼ xi wħud mis-​Swali tas-​Saltna li nbnew, immaġina l-​effett li dan ix-​xogħol tal-​bini kellu fuq ix-​xogħol tax-​Xhieda taʼ Jehovah! Dan huwa minnu fi tliet oqsma differenti—l-​għaqda tal-​fratellanza dinjija tagħna, l-​effett fuq il-​komunità lokali, u ż-​żjieda fl-​attendenza tal-​laqgħat tal-​kongregazzjoni. Filwaqt li f’dan l-​insert jispikkaw is-​Swali tas-​Saltna mibnijin fl-​Afrika, iktar ’il quddiem ħarġiet taʼ Il-​Ministeru tas-​Saltna se jiffokaw fuq kif il-​programm tal-​bini tas-​Swali tas-​Saltna jinsab miexi ’l quddiem fi nħawi oħra tad-​dinja.

⁷ B’mod ċar, ħafna minnkom tassew weġġaħtu lil Jehovah b’ġidkom u żgur li se tiksbu sodisfazzjon kbir meta taraw x’qed jitwettaq fl-​ipproklamar taʼ l-​aħbar tajba madwar id-​dinja.—Prov. 3:​9, 10.

[Stampi f’paġna 3]

REPUBBLIKA AFRIKANA ĊENTRALI

Bimbo, Bangui

Begoua, Bangui

[Stampa f’paġna 4]

Ukonga, it-​Tanzanija

[Stampa f’paġna 4]

Accra, il-​Gana

[Stampa f’paġna 4]

Salala, il-​Liberja

[Stampa f’paġna 4]

Karoi, Żimbabwe

[Stampi f’paġna 4, 5]

Allada, il-​Benin​—Sala tas-​Saltna taʼ qabel

Allada, il-​Benin​—Sala tas-​Saltna ġdida

[Stampa f’paġna 5]

Kpeme, it-​Togo

[Stampa f’paġna 5]

Sokodé, it-​Togo

[Stampi f’paġna 4, 5]

Fidjrosse, il-​Benin

[Stampa f’paġna 6]

Lyenga, iz-​Zambja​—Sala tas-​Saltna taʼ qabel

[Stampa f’paġna 6]

Lyenga, iz-​Zambja​—Sala tas-​Saltna ġdida

[Stampa f’paġna 6]

Kinshasa, il-​Kongo

[Stampa f’paġna 6]

Musambira, l-​Irwanda