Qima Vera Qed Tespandi fl-Ewropa tal-Lvant
1 Il-Kristjani taʼ l-ewwel seklu kienu jippridkaw dwar is-Saltna biż-żelu. Huma ferħu meta l-kongregazzjonijiet kienu “jiżdiedu fl-għadd kuljum.” (Atti 16:5) Bl-ippridkar qalbieni tagħhom, il-qima vera waslet fl-Asja, fl-Afrika, u fl-Ewropa, u dan irriżulta fi ħsad abbundanti taʼ wħud li emmnu.
2 F’dan iż-żmien tat-tmiem, il-qima vera tkompli tespandi, partikolarment fil-pajjiżi taʼ l-Ewropa tal-Lvant. F’pajjiżi fejn sal-bidu tas-snin 90 konna taħt restrizzjonijiet taʼ gvernijiet, issa qed nesperjenzaw żjieda taʼ l-għaġeb. In-1999 Yearbook jurina li żewġ pajjiżi minn dawn, ir-Russja u l-Ukraina, kull wieħed irrapportaw iktar minn 100,000 pubblikatur li jieħu sehem fil-ministeru pubbliku. Fil-15-il territorju taʼ dik li qabel kienet l-Unjoni Sovjetika, mill-1991 iktar minn 220,000 individwu ddedika lilu nnifsu lil Jehovah u tgħammed! B’din iż-żjieda mgħaġġla nħass il-bżonn li jinbnew ħafna Swali tas-Saltna u Swali taʼ l-Assembleat ġodda kif ukoll li jiġu mkabbrin għadd taʼ faċilitajiet tal-fergħa.
3 Porzjon mill-Fond tas-Soċjetà għas-Swali tas-Saltna issa qed jintuża biex jipprovdi self lill-kongregazzjonijiet f’pajjiżi fejn hemm ħtieġa urġenti ħafna għal iktar Swali tas-Saltna, imma fejn hemm riżorsi limitati u problemi ekonomiċi ħorox. Bejn Marzu taʼ l-1996 u Ottubru taʼ l-1998, is-Soċjetà approvat 359 rikjesta taʼ self għal Swali tas-Saltna minn uffiċċji tal-fergħa li jieħdu ħsieb 11-il pajjiż fl-Ewropa tal-Lvant. Fondi kkontribwiti qed jintużaw biex jinxtraw l-art u l-materjal għall-bini taʼ Swali tas-Saltna ġodda u biex jgħinu lill-kongregazzjonijiet ħalli jirranġaw mill-ġdid l-istrutturi tal-faċilitajiet li diġà jeżistu. L-istampi murijin hawnhekk jagħtuna ħjiel taʼ kif ħutna fl-Ewropa tal-Lvant ibbenefikaw mill-kontribuzzjonijiet li saru lill-Fond tas-Soċjetà għas-Swali tas-Saltna f’diversi pajjiżi.
4 Matul l-1998, il-Bulgarija esperjenzat żjieda taʼ 12 fil-mija, u l-aħwa kienu eċċitati meta ġiet dedikata l-ewwel Sala tas-Saltna f’April taʼ dik is-sena. Il-Kroazja gawdiet żjieda taʼ 4 fil-mija, u bħalissa l-aħwa qed jibnu iktar Swali tas-Saltna, biex javanzaw il-qima vera. Fl-Ungerija 144 kongregazzjoni qed jużaw madwar 80 Sala tas-Saltna. Dan ifisser li 61 fil-mija tal-235 kongregazzjoni f’dak il-pajjiż għandhom il-post taʼ qima tagħhom stess. Fil-Maċedonja l-programm tal-bini tas-Swali tas-Saltna lesta żewġ swali ġodda, u għad iridu jinbnew iktar. Fis-sajf taʼ l-1999, tlestiet Sala tas-Saltna doppja fil-belt kapitali taʼ Skopje. Minn taʼ l-inqas sitt kongregazzjonijiet jistgħu jużaw din is-sala.
5 Is-sena l-oħra fir-Russja, bejn wieħed u ieħor, kienu jitgħammdu iktar minn 260 ruħ fil-ġimgħa! Billi segwiet l-eżempju wżat minn pajjiżi oħrajn, il-fergħa tar-Russja issa organizzat 12-il Kumitat Reġjonali tal-Bini mat-territorju vast tagħha, biex tappoġġa l-proġetti futuri tal-bini taʼ Swali tas-Saltna. Fin-naħa taʼ fuq taʼ San Pietruburgu għaddej xogħol taʼ bini taʼ l-ewwel Sala taʼ l-Assemblea f’dak il-pajjiż, li se tesaʼ 1,600 ruħ. Il-faċilità se tinkludi wkoll ħames Swali tas-Saltna b’200 post kull wieħed. Biex jiġu sodisfati l-bżonnijiet spiritwali taʼ ħutna u taʼ ħafna wħud li qed juru interess fl-Ukrajna, tlestew 84 Sala tas-Saltna u qed jinbnew 80 oħra.
6 Ma tferraħilniex qalbna din iż-żjieda fl-Ewropa tal-Lvant? Ngħixu fejn ngħixu, l-espansjoni tal-qima vera tfakkarna li Alla mhux parzjali u li l-paċenzja tiegħu se tfisser salvazzjoni għal “kotra kbira.” (Apk. 7:9; 2 Pt. 3:9) Kemm hu taʼ privileġġ li għandna sehem żgħir f’li nikkontribwixxu lejn it-tkabbir spiritwali t’oħrajn, anki taʼ dawk f’pajjiżi fil-bogħod! Proverbji 28:27 jiżgurana li “min jagħti lill-fqir ma jkun jonqsu xejn.” Id-disponibbiltà tagħna biex ngħinu f’dawn l-ispejjeż tirriżulta f’li l-affarijiet materjali jiġu “ndaqs.” B’hekk, kulħadd ikun jistaʼ jgawdi l-hena li tiġi milli nagħtu u l-ferħ li jirriżulta milli naraw il-qima vera tespandi mad-dinja kollha.—2 Kor. 8:14, 15; Atti 20:35.
[Stampa f’paġna 3]
Săcele, Rumanija
[Stampa f’paġna 3]
Maardu, Estonja
[Stampa f’paġna 3]
Sevnica, Slovenja
[Stampa f’paġna 3]
Tiszavasvári, Ungerija
[Stampa f’paġna 4]
Jūrmala, Latvja
[Stampa f’paġna 4]
Taurage, Litwanja
[Stampa f’paġna 4]
Tallinn, Estonja
[Stampa f’paġna 5]
Prievidza, Slovakkja
[Stampa f’paġna 5]
Mátészalka, Ungerija
[Stampa f’paġna 5]
Belgrad, Jugoslavja
[Stampa f’paġna 6]
Ruma, Jugoslavja
[Stampa f’paġna 6]
Vranov nad Topl’ou, Slovakkja
[Stampa f’paġna 6]
Tornakalns, Latvja