Il-​Bini Internazzjonali tas-​Swali tas-​Saltna f’Xi Pajjiżi Ewropej

¹ F’dawn l-​aħħar għaxriet taʼ snin, ix-​xogħol tax-​Xhieda taʼ Jehovah f’għadd taʼ pajjiżi fl-​Ewropa, inkluż l-​Ewropa tal-​Lvant, ġie ristrett. Fil-​biċċa l-​kbira mill-​każi, ir-​restrizzjonijiet kienu kefrin mhux ħażin. Kien diffiċli biex isiru l-​laqgħat bil-​libertà, u kien kważi impossibbli li jattendu għalihom f’xi Sala tas-​Saltna. Madankollu, f’dawn l-​aħħar snin, Jehovah kien ‘kbir f’għemilu magħna! U aħna bil-​ferħ imtlejna.’​—Salm 126:​3.

² Mill-​1983, il-​qabda ħarxa max-​Xhieda taʼ Jehovah bdiet tintreħa. Sa l-​1989, il-​Polonja u l-​Ungerija bdew jirrikonoxxu legalment lix-​Xhieda taʼ Jehovah. Fl-​1991, ix-​Xhieda taʼ Jehovah ġew rikonoxxuti legalment fir-​Russja. Minn dak iż-​żmien ’l hawn, ix-​xogħol fir-​Russja u f’dawk li qabel kienu r-​repubbliki taʼ l-​Unjoni Sovjetika kiber ħafna. Bejn Marzu taʼ l-​1996 u Ottubru taʼ l-​1998, il-​Ġemgħa li Tiggverna tat l-​approvazzjoni biex jiġu mislufa flus għal 359 Sala tas-​Saltna minn uffiċċji tal-​fergħa li jieħdu ħsieb 11-il pajjiż differenti fl-​Ewropa.

³ Hekk kif tħares lejn l-​istampi f’din l-​insert, irrifletti dwar l-​affarijiet kbar u meraviljużi li Jehovah għamel għan-​nies tiegħu. (Salm 136:4) Se tieħu pjaċir tkun taf li l-​kontribuzzjonijiet taʼ l-​aħwa minn madwar id-​dinja qegħdin jintużaw bl-​aħjar mod fi qbil mal-​kliem li qal Ġesù fi Ġwann 13:35: “Minn dan jagħraf kulħadd li intom dixxipli tiegħi, jiġifieri, jekk ikollkom l-​imħabba bejnietkom.”

⁴ Fost il-​pajjiżi fl-​Ewropa li bbenefikaw mill-​arranġament għall-​għajnuna fil-​bini tas-​Swali tas-​Saltna f’artijiet b’riżorsi limitati hemm ir-​Rumanija, fejn inbnew 36 Sala tas-​Saltna minn Lulju tas-​sena 2000. Billi ntuża l-​istess pjan għal kważi s-​Swali tas-​Saltna kollha, fis-​sena 2001 fl-​Ukraina nbnew 61, u l-​mira tagħhom għall-​2002 kienet li jibnu 76 oħra. Permezz tal-​flus li ġew kontribwiti lill-​Fond għas-​Swali tas-​Saltna, inbnew mijiet taʼ Swali tas-​Saltna fil-​Bulgarija, fil-​Kroazja, fil-​Maċedonja, fil-​Moldova, fir-​Russja, u fis-​Serbja u Montenegro.

⁵ Il-​bini tas-​Swali tas-​Saltna f’xi pajjiżi ma kienx faċli, u jrid isir ħafna sforz qabel il-​bini propju jkun jistaʼ jinbena. Ħafna drabi, il-​proċess jieħu ħafna żmien. Ukoll, l-​ispejjeż biex tibni Sala tas-​Saltna f’dik in-​naħa taʼ l-​Ewropa huma ħafna akbar minn kemm jiswew f’bosta nħawi fl-​Afrika u l-​Amerika t’Isfel. Madankollu, minħabba ż-​żjieda kbira taʼ dawk li jaqdu lil Jehovah, għad hemm bżonn taʼ mijiet taʼ Swali tas-​Saltna f’pajjiżi fl-​Ewropa fejn hemm riżorsi limitati!

⁶ Kemm hija xi ħaġa meraviljuża li tara żjieda daqshekk malajr fil-​bini taʼ dawn is-​Swali tas-​Saltna! Bħalma juru ħafna esperjenzi, ngħatat xiehda eċċellenti lill-​ġirien fejn kien qed isir il-​bini. F’xi nħawi, l-​awtoritajiet lokali huma impressjonati bil-​kooperazzjoni li ntweriet biex jiġu osservati l-​linji taʼ gwida għall-​bini.

⁷ B’mod xieraq, Isaija pprofetizza dwar iż-​żjieda fil-​qima vera f’dan iż-​żmien. Permezz tal-​profeta, Alla ħabbar: “L-​iżgħar fostkom isir tribù u l-​iċken isir ġens qawwi. Jien il-​Mulej, li nfittex nagħmel dan kollu f’waqtu.” (Is. 60:22) Bla dubju, dawn l-​aħħar għaxar snin taw prova li kien iż-​żmien taʼ Jehovah għal żjieda fl-​Ewropa tal-​Lvant. Jalla Jehovah ikompli jsawwab il-​barka għanja tiegħu fuq l-​isforzi tagħna biex inħaffu l-​bini tas-​Swali tas-​Saltna f’ħafna postijiet hekk kif nagħtu iktar appoġġ lill-​Fond għas-​Swali tas-​Saltna! Dan se jirriżulta fi żjieda taʼ iktar Swali tas-​Saltna f’artijiet b’riżorsi limitati. Se jikkontribwixxi għat-​tkabbir fil-​qima pura f’ħafna partijiet taʼ l-​Ewropa u għal xiehda akbar mogħtija “sa truf l-​art.”​—Atti 13:47.

[Stampi f’paġna 3]

Kumpless taʼ Sala tas-​Saltna

Moska, Russja

[Stampi f’paġni 4-6]

Swali tas-​Saltna Ġodda fl-​Ewropa tal-​Lvant

Strumica, Maċedonja

Daruvar, Kroazja

Bitola, Maċedonja

Sokal, Distrett taʼ Lviv, Ukraina

Sofia, Bulgarija

Krasnooktyabrskiy, ir-​Reġjun taʼ Maykop, Russja

Bački Petrovac, Serbja u Montenegro

Plovdiv, Bulgarija

Tlumach, Distrett taʼ Ivano-Frankivsk, Ukraina

Rava-Ruska, Distrett taʼ Lviv, Ukraina

Stara Pazova, Serbja u Montenegro

Zenica, Bosnia u Ħerzegovìna

Sokal, Distrett taʼ Lviv, Ukraina

Zhydachiv, Distrett taʼ Lviv, Ukraina