Pijunieri Jgħinu lil Oħrajn

¹ Ġesù qal: “Il-​ħsad huwa kbir, imma l-​ħaddiema ftit. Itolbu mela lil Sid il-​ħsad biex jibgħat ħaddiema għall-​ħsad tiegħu.” Peress li l-​ħassada taʼ l-​ewwel seklu kienu ftit fl-​għadd u kellhom ħafna territorju x’ikopru, kieku ried Ġesù setaʼ dderiġiehom biex jilħqu kemm jistaʼ jkun nies bl-​aħbar tajba billi bagħathom wieħed wieħed. Minflok, hu “bagħathom tnejn tnejn.” (Lq. 10:​1, 2) Għala tnejn tnejn?

² Dawk id-​dixxipli kienu ġodda u bla esperjenza. Billi jaħdmu flimkien setgħu jitgħallmu minn xulxin u jinkuraġġixxu lil xulxin. Bħalma qal is-​sultan Salamun, “tnejn min-​nies aħjar minn wieħed waħdu.” (Koħ. 4:​9, 10) Saħansitra wara li tferraʼ l-​ispirtu qaddis f’Pentekoste tas-​sena 33 E.K., Pawlu, Barnaba, u oħrajn akkumpanjaw lil kredenti sħabhom fil-​ministeru. (Atti 15:35) Min jaf xi privileġġ kien għal xi wħud li jkunu mħarrġin personalment minn irġiel kapaċi bħal dawn!

³ Programm taʼ Taħriġ mill-​Aħjar: Il-​kongregazzjoni Kristjana moderna, bħall-​pariġġ tagħha taʼ l-​ewwel seklu, hija organizzazzjoni taʼ ppridkar. Tipprovdilna t-​taħriġ ukoll. Bħala individwi, ix-​xewqa tagħna mill-​qalb għandha tkun li nippreżentaw l-​aħbar tajba b’mod effettiv kemm jistaʼ jkun. Sabiex iktar pubblikaturi jkunu jistgħu jitjiebu fl-​effettività tagħhom, hemm l-​għajnuna disponibbli għalihom.

⁴ Fl-​Iskola tal-​Ministeru tas-​Saltna li kellna dan l-​aħħar, is-​Soċjetà ħabbret programm għall-​pijunieri biex jgħinu lil oħrajn fil-​ministeru taʼ l-​għalqa. Hemm ħtieġa għal dan? Iva, hemm. Iktar minn miljun pubblikatur tgħammdu f’dawn l-​aħħar tliet snin, u ħafna minn dawn għandhom bżonn it-​taħriġ biex isiru iktar effettivi fix-​xogħol taʼ l-​ippridkar. Min jistaʼ jintuża biex jimla dak il-​bżonn?

⁵ Pijunieri full-time jistgħu jgħinu. L-​organizzazzjoni taʼ Jehovah tipprovdilhom ħafna pariri u taħriġ. Fl-​Iskola tas-​Servizz taʼ Pijunier li ddum ġimagħtejn, il-​pijunieri jirċievu istruzzjonijiet imfasslin għall-​bżonnijiet tagħhom. Jibbenefikaw ukoll mil-​laqgħat li jkollhom maʼ l-​indokraturi tas-​circuit u tad-​distrett, kif ukoll minn gwida mill-​anzjani. Għalkemm mhux il-​pijunieri kollha għandhom l-​esperjenza li kellhom Pawlu u Barnaba, huma rċevew taħriġ prezzjuż, li huma ferħanin li jaqsmuh maʼ ħaddieħor.

⁶ Min Se Jibbenefika? Hija l-​parteċipazzjoni f’dan il-​programm ristretta biss għal pubblikaturi ġodda jew uħud mgħammdin ġodda? Dażgur li le! Hemm uħud iżgħar u ixjeħ li ilhom jafu l-​verità imma li japprezzaw l-​għajnuna f’ċerti aspetti tal-​ministeru. Xi wħud jagħmlu xogħol eċċellenti fit-​tqassim tal-​letteratura imma jsibu diffikultà biex jagħmlu ż-​żjajjar lura jew biex jibdew studji tal-​Bibbja. Oħrajn għandhom mnejn isibuha faċli li jibdew studji tal-​Bibbja imma jinnotaw li l-​istudenti tagħhom ma jagħmlux progress. X’qed iżommhom lura? Pijunieri taʼ l-​esperjenza jistgħu jiġu mitlubin li joffru għajnuna f’dan ir-​rigward. Ċerti pijunieri huma effettivi f’li jikkultivaw l-​interess, jibdew studji tal-​Bibbja, u jidderieġu lil studenti ġodda lejn l-​organizzazzjoni. L-​esperjenza tagħhom se tkun t’għajnuna f’dan il-​programm il-​ġdid.

⁷ Issib int li l-​iskeda tiegħek ma tippermettilekx li tappoġġa l-​laqgħat regulari tal-​kongregazzjoni għas-​servizz taʼ l-​għalqa daqs kemm tkun tixtieq? Xi pijunier għandu mnejn ikun jistaʼ jaħdem miegħek f’ħinijiet meta pubblikaturi oħrajn ma jkunux disponibbli.

⁸ Tinħtieġ Kooperazzjoni Tajba: Darbtejn fis-​sena, l-​anzjani se jiftiehmu biex il-​pubblikaturi li jixtiequ għajnuna persunali jieħdu sehem fil-​programm Pijunieri Jgħinu lil Oħrajn. Jekk taqbel li tirċievi għajnuna bħal din, iltaqaʼ mal-​pubblikatur pijunier li ġie inkarigat biex jgħinek, ipprepara skeda prattika għas-​servizz, u żomm magħha. Żomm kull appuntament. Hekk kif taħdmu flimkien, osserva l-​modi effettivi kif tippreżenta l-​aħbar tajba. Analizza għala ċerti preżentazzjonijiet huma effettivi. Ikkunsidra s-​suġġerimenti li l-​pubblikatur pijunier jistaʼ joffrilek biex ittejjeb il-​preżentazzjoni tiegħek. Waqt li tapplika l-​affarijiet li titgħallem, il-​progress tiegħek fil-​ministeru se jsir evidenti, kemm għalik u kemm għal oħrajn. (Ara l-​1 Timotju 4:15.) Aħdmu flimkien spiss kemm jistaʼ jkun, billi tieħdu sehem fl-​aspetti kollha tal-​ministeru, inkluż l-​għoti taʼ xiehda informali imma iffokaw fuq kwalunkwe aspett partikulari li fih int ikollok bżonn assistenza persunali.

⁹ L-​indokratur tas-​servizz huwa interessat fil-​progress li se jsir. Minn żmien għal żmien, se jiċċekkja maʼ dak li jikkonduċi l-​Istudju tal-​Ktieb tal-​Kongregazzjoni biex jara kif int qed tibbenefika mill-​programm. L-​indokratur tas-​circuit se jgħinek bl-​istess mod meta jżur il-​kongregazzjoni.

¹⁰ Jehovah jrid li l-​poplu tiegħu jkun imħarreġ u “mħejji għal kull ħidma tajba.” (2 Tim. 3:17) Qis l-​arranġament Pijunieri Jgħinu lil Oħrajn bħala provvediment mill-​aħjar biex jgħin lil dawk li jixtiequ jtejbu l-​abbiltà tagħhom f’li jippridkaw il-​kelma. Jekk għandek il-​privileġġ li tieħu sehem fih, agħmel dan bi gratitudni, umiltà, u ferħ.