Kun Effettiv fil-​Ministeru Tiegħek

¹ Is-​sema jiddallam, u ħoss li jwaħħax ikompli jiżdied fil-​volum sakemm isir tkarwita li ttarrxek. Imbagħad tinżel sħaba qisha duħħan. Din x’inhi? Armata taʼ miljuni taʼ ġradijiet li ġejja biex iġġib ħerba sħiħa fuq l-​art! Din ix-​xena deskritta mill-​profeta Ġoel għandha twettiq illum il-​ġurnata fix-​xogħol taʼ l-​ippridkar tal-​qaddejja midlukin t’Alla u taʼ sħabhom, il-​folla l-​kbira.

² It-​Torri taʼ l-​Għassa taʼ l-​1 taʼ Mejju, 1998, paġna 12, paragrafu 19, jinnota: “L-​armata tal-​ġradijiet t’Alla taʼ żmienna tat xiehda bir-​reqqa fil-​‘belt’ tal-​Kristjaneżmu. (Ġoel 2:​9, KŻ) . . . Xorta għadhom jegħlbu l-​ostakli koll­ha u jidħ­lu f’miljuni taʼ djar, javviċinaw lin-​nies fit-​triqat, ikellmuhom bit-​telefon, u jikkuntattjawhom bi kwalunkwe mod possibbli hekk kif jiddikjaraw il-​messaġġ taʼ Jehovah.” M’huwiex privileġġ grandjuż li tieħu sehem f’dan ix-​xogħol li qabbadna nagħmlu Alla?

³ Kuntrarju għall-​ġradijiet litterali, li l-​uniku objettiv tagħhom huwa li jitimgħu lilhom infushom, aħna bħala qaddejja taʼ Jehovah jimpurtana ħafna mill-​ħajjiet taʼ dawk li mmorru nipp­ridkawlhom. Irridu ngħinu lil oħrajn jitgħallmu l-​veritajiet glorjużi li fiha l-​Kelma t’Alla u jiġu mmotivati biex jieħdu passi li jwasslu għas-​salvazzjoni eterna tagħhom. (Ġw. 17:3; 1 Tim. 4:16) Għaldaqstant, irridu nkunu effettivi fil-​mod kif inwettqu l-​ministeru tagħna. Hu x’inhu l-​mod taʼ ppridkar li nużaw, għandna nikkunsidraw jekk aħniex qegħdin nagħmluh b’tali manjiera u f’ħin li jrendu l-​aqwa riżultati. Ladarba “x-​xena taʼ din id-​dinja qiegħda tinbidel,” nagħmlu tajjeb jekk nanalizzaw il-​metodi li nużaw u l-​mod kif navviċinaw lin-​nies sabiex niżguraw li qed niffaċċjaw l-​isfida taʼ li nkunu produttivi kemm jistaʼ jkun.​—1 Kor. 7:31, New World Translation.

⁴ Fil-​waqt li nistinkaw biex nilħqu lin-​nies b’diversi modi, ix-​xogħol minn dar għal dar xorta għadu s-​sinsla tal-​ministeru tagħna. Issib int li n-​nies taʼ spiss m’humiex id-​dar jew inkella ssibhom reqdin meta żżurhom? Xi dwejjaq, peress li ma tkunx tistaʼ taqsam magħhom il-​messaġġ taʼ l-​aħbar tajba! Kif tistaʼ tiffaċċja din l-​isfida?

⁵ Kun Flessibbli u Raġunevoli: F’Iżrael taʼ l-​ewwel seklu, is-​sajjieda kienu jistadu bil-​lejl. Għala bil-​lejl? Għalkemm dan ma kienx l-​iktar ħin konvenjenti għalihom, dan kien l-​aħjar ħin biex jaqb­du l-​iktar ħut. Kien l-​iktar ħin produttiv. Fil-​kummenti tiegħu rigward din id-​drawwa, It-​Torri taʼ l-​Għassa tal-​15 taʼ Settembru, 1992, stqarr: “Aħna wkoll għandna nistudjaw it-​territorju tagħna sabiex immorru nistadu, bħal li kieku, meta l-​maġġoranza tan-​nies ikunu d-​dar u lesti li jilqgħuk.” Osservazzjoni bir-​reqqa tad-​drawwiet soċjali wriet li f’ħafna komunitajiet fis-​subborgi taʼ l-​ibliet u fi nħawi residenzjali, in-​nies x’aktarx li jkunu d-​dar meta nżuruhom kmieni s-​Sibt jew il-​Ħadd fil-​għodu imma ġeneralment ma tantx jilqgħuna f’dawk il-​ħinijiet. Jekk dan huwa l-​każ fejn toqgħod int, tistaʼ tbiddel il-​ħin u tagħmel iż-​żjajjar tiegħek iktar tard fil-​għodu jew saħansitra wara nofsinhar? Dan huwa mod mill-​aħjar kif inżidu l-​effettività tal-​ministeru tagħna u kif ukoll nuru konsiderazzjoni lejn il-​ġirien tagħna, li huwa evidenza taʼ l-​imħabba Kristjana vera.​—Mt. 7:12.

⁶ F’Filippin 4:​5, l-​appostlu Pawlu jfakkarna li għandna nħallu ‘l-​ħlewwa [“ir-​raġunevolezza,” NW] tagħna ssir magħrufa mal-​bnedmin kollha.’ Fi qbil maʼ din id-​direzzjoni mnebbħa, jeħtieġ li nkunu bbilanċjati u raġunevoli fil-​metodi tagħna hekk kif inwettqu l-​inkarigu tagħna taʼ l-​ippridkar biż-​żelu u bl-​entużjażmu. Ma rridux inżommu lura milli ‘ngħallmu kemm fil-​beraħ u kemm fid-​djar,’ imma rridu nkunu ċerti li nwettqu l-​ministeru tagħna minn dar għal dar f’ħinijiet li huma raġunevoli u produttivi. (Atti 20:20) Bħal dawk is-​sajjieda f’Iżrael taʼ l-​ewwel seklu, l-​iskop tagħna huwa li ‘nistadu’ x’ħin nistgħu nkunu produttivi l-​iktar, mhux x’ħin ikun l-​iktar konvenjenti għalina.

⁷ X’tibdiliet jistgħu jsiru? Fil-​biċċa l-​kbira, nhar taʼ Sibt u Ħadd, il-​laqgħat għas-​servizz taʼ l-​għalqa jsiru fid-​9.00 jew fid-​9.30 taʼ fil-​għodu, u minnufih wara, il-​grupp imur mill-​ewwel fuq it-​territorju biex jibda x-​xogħol minn bieb għal bieb. Madankollu, xi ġemgħat t’anzjani għamlu arranġamenti biex il-​grupp jieħu sehem f’forom oħrajn tal-​ministeru, bħalma huma l-​għoti taʼ xiehda fit-​toroq, it-​territorju tan-​negozju, jew iż-​żjajjar lura, qabel ma jmur minn bieb għal bieb fi nħawi residenz­jali. Kongregazzjonijiet oħrajn irranġaw il-​ħinijiet tal-​laqgħat għas-​servizz taʼ l-​għalqa għal iktar tard fil-​għodu​—fl–10:00 taʼ fil-​għodu, fil–11:00 taʼ fil-​għodu, jew f’nofsinhar. Wara, il-​grupp imur direttament fuq ix-​xogħol minn bieb għal bieb u jibqaʼ barra fis-​servizz sa kmieni wara nofsinhar. F’xi territorji, għandu mnejn li l-​aħjar ħin biex jiltaqgħu għas-​servizz taʼ l-​għalqa huwa kmieni wara nofsinhar, iktar milli fil-​għodu. Tibdiliet bħal dawn x’aktarx li se jżidu l-​produttività fix-​xogħol minn bieb għal bieb.

⁸ Uri Għaqal u Tattika: Hekk kif nikkuntattjaw lin-​nies minn bieb għal bieb, aħna niltaqgħu maʼ diversi reazzjonijiet għall-​messaġġ tagħna. Xi inkwilini jilqgħuna, oħrajn huma indifferenti, u xi ftit jistgħu jaqilgħu xi argumenti jew ikunu ostili. Fil-​każ taʼ dawn taʼ l-​aħħar, f’paġna 7 tar-​Reasoning From the Scriptures, niġu mfakkrin li m’huwiex l-​iskop tagħna li “‘nirbħu l-​argumenti’ maʼ nies li ma juru ebda rispett lejn il-​verità.” Jekk l-​inkwilin ikun ostili, ikun aħjar għalina jekk nitilqu. Qatt m’għandna nħaqquha man-​nies billi ninsistu li għandhom jiddiskutu magħna jew jaċċettaw l-​opinjoni tagħna. Aħna ma nisforzawx il-​messaġġ tagħna fuq in-​nies. Din ma tkunx xi ħaġa raġunevoli u tistaʼ toħloq problemi għal Xhieda oħrajn u għax-​xogħol in ġenerali.

⁹ Qabel ma nibdew naħdmu f’xi territorju, ikun għaqli li niċċekkjaw il-​karta tat-​territorju għal xi notamenti taʼ indirizzi fejn ir-​residenti jkunu qalulna biex ma nħabbtulhomx. Jekk hemm indirizzi bħal dawn, kull pubblikatur li jkun qed jaħdem f’dik it-​triq irid jiġi mgħarraf fejn m’għandux iħabbat. Ħadd m’għandu jaqbad iżur dawn id-​djar jekk ma jingħatax id-​direzzjoni mill-​indokratur tas-​servizz biex jagħmel hekk.​—Ara l-​Kaxxa għall-​Mistoqsija fl-​Our King­dom Ministry taʼ Ġunju 1994.

¹⁰ Nistgħu nżidu l-​effettività tagħna billi nkunu għaqlin aħna u naħdmu minn dar għal dar. Ħares madwarek int u toqrob lejn dar. Jinsab kullimkien magħluq bil-​purtieri jew bil-​blinds? M’hemm l-​ebda ħoss t’attività? Dan jistaʼ jindika li n-​nies tad-​dar huma reqdin. X’aktarx, ikollna konversazzjoni iktar produttiva maʼ l-​inkwilin jekk nerġ­għu ngħaddu iktar tard. Forsi jkun aħjar jekk għalissa din id-​dar naqbżuha u nieħdu nota tan-​numru tal-​bieb. Tistaʼ terġaʼ tiċċekkja d-​dar qabel ma tħalli t-​territorju jew tagħmel nota biex terġaʼ tgħaddi iktar tard.

¹¹ Xorta jistaʼ jagħti l-​każ li xi darba nqajmu lil xi ħadd bla ma rridu jew intellfuh b’xi mod ieħor. Għandu mnejn li saħansitra jidher irritat jew irrabjat. Kif għandna nirreaġixxu? Proverb­ji 17:27 jagħtina l-​parir: “Min għandu l-​għaqal moħħu kalm.” Fil-​waqt li ma niskużawx ruħna minħabba l-​ministeru tagħna, nistgħu ċertament nesprimu d-​dispjaċir tagħna talli ħabbattna l-​bieb f’mument inkonvenjenti. Nist­għu bil-​pulit nistaqsuh jekk ikunx iktar komdu għalih jekk nerġgħu ngħaddu f’xi ħin ieħor. Jekk nesprimu tħassib persunali b’leħen kalm nistgħu x’aktarx nikkalmaw lil individwu bħal dan. (Prov. 15:1) Jekk xi inkwilin jinformana li hu jaħdem regolarment bil-​lejl, tistaʼ titniżżel nota mal-​karta tat-​territorju sabiex fil-​futur iż-​żjajjar ikunu jistgħu jsiru f’ħin addattat.

¹² L-​għaqal huwa daqstant xieraq hekk kif nistinkaw biex naħdmu t-​territorju tagħna bir-​reqqa. Ladarba ħafna nies ma jkunux id-​dar l-​ewwel darba li nħabbtulhom, jeħtieġ li nagħmlu iktar sforzi biex nikkuntattjawhom sabiex naqsmu magħhom il-​messaġġ taʼ salvazzjoni. (Rum. 10:13) Rapporti jindikaw li xi kultant il-​pubblikaturi jżuru l-​istess dar diversi drabi matul ġurnata waħda sabiex jipprovaw isibu n-​nies id-​dar. Dan ma jiskappalhomx lill-​ġirien. Tistaʼ tinħoloq impressjoni xejn sabiħa li x-​Xhieda taʼ Jehovah ‘dejjem iħabbtu l-​bibien’ fit-​triq tagħhom. Dan kif jistaʼ jiġi evitat?

¹³ Kun għaqli. Meta terġaʼ żżur dar fejn ma sibt lil ħadd, hemm xi indikazz­jonijiet li issa hemm xi ħadd id-​dar? Jekk il-​kaxxa taʼ l-​ittri hija mimlija posta u fuljetti, x’aktarx li l-​individwu għadu ma wasalx id-​dar u għalxejn terġaʼ tħabbat. Jekk l-​individwu ma jistax jiġi kkuntatt­jat wara diversi attentati f’ħinijiet differenti tal-​ġurnata, bħal per eżempju fil-​għaxija, jistaʼ jkun possibbli li tikkuntattja lill-​inkwilin bit-​telefon. Jekk le, tistaʼ bil-​prudenza tħalli xi fuljett jew volantin fil-​bieb, speċjalment jekk it-​territorju jinħadem taʼ spiss. Jistaʼ jkun li fl-​aħħar mill-​aħħar l-​individwu jiġi kkuntattjat meta jinħadem it-​territorju d-​darba taʼ wara.

¹⁴ Għandna nevitaw konversazzjonijiet twal fuq il-​bieb meta l-​inkwilin ikun espost għal temp ikrah ferm. Meta tiġi mistieden tidħol ġewwa, oqgħod attent li ma tħammiġx l-​art. Uża l-​għaqal meta tiġi wiċċ imbwiċċ maʼ kelb li jkun qed jinbaħ. Meta tkun qed taħdem f’bini bl-​appartamenti, tkellem b’leħen baxx u evita li tagħmel ħsejjes li jdejqu lir-​residenti u li bihom kulħadd ikun jaf li qiegħed hemm.

¹⁵ Żomm l-​Ordni u d-​Dinjità: B’organizzazzjoni tajba nistgħu nevitaw li nifformaw gruppi kbar u li jagħtu fl-​għajn meta naslu fit-​territorju. Xi inkwilini jistgħu jħossuhom mhedda meta jaraw grupp kbir taʼ pubblikaturi jaslu bil-​karozzi u l-​vannijiet quddiem l-​għatba tad-​dar tagħhom. Ma rridux nagħtu l-​impressjoni li qegħdin “ninvadu” lill-​inħawi residenzjali. L-​aħjar huwa li l-​arranġamenti biex jinħadem it-​territorju jsiru waqt il-​laqgħat għas-​servizz taʼ l-​għalqa. Gruppi żgħar taʼ pubblikaturi, bħal per eżempju familja waħda, ma jgerrxux lill-​inkwilini daqstant malajr u jkollhom bżonn taʼ ftit riorganizzazzjoni waqt li jinħadem it-​territorju.

¹⁶ L-​ordni tirrikjedi li l-​ġenituri jieħdu ħsieb bir-​reqqa l-​kondotta taʼ wliedhom waqt li jkunu qed jaħdmu fit-​territorju. It-​tfal għandhom iġibu ruħhom sewwa meta jkunu mal-​kbar fuq il-​bieb. Iż-​żgħar m’għandhomx jitħallew jilagħbu jew iduru ’l hawn u ’l hemm, billi jiġb­du l-​attenzjoni bla bżonn tar-​residenti jew taʼ min ikun għaddej.

¹⁷ Il-​bilanċ huwa meħtieġ ukoll meta niġu biex nieqfu għall-​kafè. L-​Our King­dom Ministry taʼ Ġunju 1995, paġna 3, qalet: “Meta nkunu fis-​servizz taʼ l-​għalqa, nistgħu nitilfu ħin prezzjuż meta nieqfu għall-​kafè. Madankollu, meta jkun temp ikrah ħafna, waqfa bħal din tiffriskana u tgħinna nkomplu. Ħafna, iżda, jippreferu jibqgħu għaddejjin jippridkaw lin-​nies u jżommu lura milli jassoċjaw maʼ l-​aħwa li jieqfu għall-​kafè waqt il-​ħin li jkun tħalla għall-​ministeru.” Għalkemm li tieqaf għal xi xarba hija deċiżjoni persunali, ġie nnotat li xi drabi, gruppi kbar taʼ aħwa rġiel u nisa jiltaqgħu f’ħanut tat-​tè jew restorant. Minbarra l-​ammont taʼ ħin li jdumu biex jisservew, il-​preżenza taʼ ċorma nies tistaʼ tgerrex lill-​klijenti l-​oħrajn. Xi kultant, jiġu diskussi fil-​miftuħ esperjenzi li jkunu ġraw matul is-​servizz taʼ l-​għalqa f’dik l-​għodwa, u dan jistaʼ jnaqqas mid-​dinjità tal-​ministeru tagħna u jdgħajjef l-​effettività tiegħu. Billi jużaw l-​għaqal, il-​pubblikaturi jistgħu jevitaw li jinġabru kollha fl-​istess stabbiliment u jaħlu ħin żejjed mill-​ministeru.

¹⁸ Ħafna aħwa esperjenzaw riżultati mill-​aqwa billi avviċinaw lin-​nies kulfejn jinstabu​—fit-​toroq, fejn jippark­jaw il-​karozzi, u f’postijiet pubbliċi oħrajn. Hawnhekk, ukoll, irridu nagħtu xiehda mill-​aħjar, mhux bi kliemna biss imma bir-​raġunevolezza tagħna wkoll. Il-​pubblikaturi f’kull kongregazz­joni għandhom jagħmlu ċert li jirrispettaw il-​limiti tat-​territorju tagħhom sabiex ma jispiċċawx idejqu lin-​nies fi nħawi kummerċjali u fit-​toroq jew lil impjegati taʼ negozji, bħalma huma ċerti pompi tal-​petrol. Sabiex niżguraw li qed inwettqu l-​ministeru tagħna bl-​ordni u bid-​dinjità, għandna naħdmu biss ġewwa t-​territorju mogħti lilna sakemm ma jkunux saru xi arranġamenti speċifiċi mill-​Kumitat tas-​Servizz tal-​Kongregazzjoni taʼ xi kongregazzjoni oħra, sabiex nagħtuhom daqqa t’id.​—Qabbel it-​2 Korintin 10:​13-15.

¹⁹ Xi kongregazzjonijiet li għandhom ħafna nħawi fejn huwa possibbli li tingħata xiehda lill-​pubbliku, organizzaw dawn l-​inħawi f’territorji. Imbagħad kull pubblikatur individwali jew grupp jingħata karta bit-​territorju. B’hekk, it-​territorju jinħadem b’mod iktar effettiv u jiġi evitat li jkun hemm ħafna pubblikaturi jaħdmu l-​istess inħawi fl-​istess ħin, fi qbil mal-​prinċipju taʼ l-​1 Korintin 14:40: “Ħa jsir kollox kif imur u bl-​ordni.”

²⁰ Id-​dehra persunali tagħna għandha dejjem tkun dinjituża u tirrappreżentana tajjeb bħala ministri li nġorru isem Jehovah. Dan japplika wkoll għall-​affarijiet li nużaw. Basktijiet imqattgħin jew Bibbji maħmuġin jew bil-​paġni milwijin jistgħu jtellfu mill-​messaġġ tas-​Saltna. Intqal li l-​ilbies u l-​maxta “huma mezz taʼ komunikazzjoni mgħaġġel li jagħti informazzjoni lill-​popolazzjoni taʼ madwarek dwar min int u x’int u fejn hu postok fl-​ordni taʼ l-​affarijiet.” Għaldaqstant, id-​dehra tagħna m’għandha tkun la maħmuġa u lanqas ittraskurata, la kollha xinxilli u lanqas taʼ barra minn hawn, imma dejjem “kif jixraq lill-​Evanġelju.”​—Fil. 1:27; qabbel l-​1 Timotju 2:​9, 10.

²¹ Fl-​1 Korintin 9:​26, l-​appostlu Pawlu jistqarr: “Jien issa hekk niġri, mhux qisni bl-​addoċċ; ma nissarax bħallikieku qiegħed nagħti fil-​vojt.” Bħal Pawlu, aħna ddeterminati li jkollna ministeru effettiv u produttiv. Hekk kif nieħdu sehem żeluż fix-​xogħol taʼ l-​għoti taʼ xiehda bħala parti mill-​“armata tal-​ġradijiet” li għandu Jehovah llum, jalla nużaw ir-​raġunevolezza u l-​għaqal Kristjani f’li nwasslu l-​messaġġ tas-​salvazzjoni għand kulħadd fit-​territorju tagħna.