Modi kif Tespandi l-​Ministeru Tiegħek

¹ Iktar minn 40 sena ilu, artiklu intitolat “Is Your Best Good Enough?” (Huwa l-​Aħjar Tiegħek Tajjeb Biżżejjed?) deher fil-​Watchtower tal-​15 taʼ Jannar, 1955. B’imħabba dan ġibed l-​attenzjoni lejn kif jistaʼ jkun possibbli għan-​nies taʼ Jehovah li jtejbu l-​isforz individwali tagħhom fil-​ministeru sabiex ikunu jistgħu jżidu l-​attività tagħhom tas-​Saltna. Dak il-​parir tajjeb japplika wkoll għal-​lum, hekk kif l-​aħjar tagħna nkomplu nagħmluh saħansitra aħjar.

² Is-​servizz kollu tagħna għandu jkun immotivat mill-​akbar kmandament: “Int għandek tħobb lill-​Mulej, Alla tiegħek, b’qalbek kollha, b’ruħek kollha, b’moħħok kollu, u bil-​qawwa tiegħek kollha.” (Mk. 12:30) Aħna nuru l-​imħabba sħiħa tagħna għal Jehovah billi nużaw bis-​sħiħ l-​opportunitajiet li jkollna disponibbli biex navanzaw ix-​xogħol tiegħu tas-​Saltna. Ikkunsidra l-​modi li ġejjin kif tistaʼ tespandi l-​ministeru tiegħek.

³ Erfaʼ r-​Responsabbiltà Tiegħek: Aħwa ddedikati jistgħu jistinkaw biex jikkwalifikaw bħala qaddejja ministerjali u mbagħad javanzaw għal li jaqdu bħala anzjani. L-​artikli “Qiegħed Int Tirsisti?” u “Tikkwalifika Int biex Taqdi?,” fil-​ħarġa taʼ It-​Torri taʼ l-​Għassa, taʼ l-​1 taʼ Diċembru, 1990, immotivaw lil ħafna aħwa biex jagħmlu ruħhom disponibbli għal responsabbiltajiet fil-​kongregazzjoni. Staqsi lill-​anzjani lokali tiegħek għal suġġerimenti speċifiċi fuq kif tirsisti u tikkwalifika.

⁴ L-​anzjani u l-​qaddejja ministerjali mhux miżżewġin huma mistidnin jaħsbu serjament dwar li japplikaw għall-​Iskola tat-​Taħriġ Ministerjali. Tistaʼ ssir midħla taʼ din l-​iskola billi taqra r-​referenzi taħt “Ministerial Training School” fil-​Watch Tower Publications Indexes għall-​1986-​1995, l-​1996, u l-​1997. Qed tarah jinfetaħ quddiemek dak il-​‘bieb kbir fejn tistaʼ taħdem’? (1 Kor. 16:9a) Ħafna aħwa li ħadu vantaġġ minn dan il-​bieb t’opportunità qatt ma mmaġinaw il-​privileġġi kollha tas-​servizz possibbli wara l-​gradwazzjoni. Illum qed igawdu l-​privileġġ li jaqdu f’Betel jew fl-​għalqa bħala pijunieri speċjali, missjunarji, jew indokraturi tas-​circuit.

⁵ Irsisti għas-​Servizz Full-Time: Żgħażagħ li jispiċċaw l-​iskola sekondarja, nisa tad-​dar, u kulmin laħaq l-​età tal-​pensjoni għandhom jikkunsidraw serjament ix-​xogħol taʼ pijunier. Irrevedi l-​insert taʼ Il-​Ministeru tas-​Saltna taʼ Lulju 1998, imbagħad tkellem maʼ pijunieri li kellhom ċirkustanzi simili għal dawk li għandek f’ħajtek stess. Jistaʼ jkun li se titqanqal biex tespandi l-​ministeru tiegħek billi tagħmel ix-​xogħol taʼ pijunier, bħalma qed jagħmlu huma. (1 Kor. 11:1) Huwa possibbli li tespandi l-​attività tiegħek għal 70 siegħa fix-​xahar u b’hekk taqdi bħala pijunier regulari?

⁶ Iktar minn 17,000 aħwa rġiel u nisa issa jaqdu f’uffiċċji tal-​fergħa u fi djar Betel madwar id-​dinja. L-​Our Kingdom Ministry taʼ Ġunju 1995 jiddiskuti x’jinħtieġ biex wieħed japplika għal servizz bħal dan. Għala ma taqrax dak l-​artiklu u tara jekk intix wieħed li forsi tikkwalifika għal dan il-​privileġġ uniku taʼ servizz f’Betel?

⁷ Aqdi Fejn il-​Bżonn Huwa Akbar: Tgħix int f’post fejn it-​territorju jinħadem taʼ spiss ġmielu jew fejn hemm ħafna aħwa biex jaqsmu t-​tagħbija? Ġieli ħsibt dwar li tespandi l-​ministeru tiegħek billi tmur toqgħod fejn il-​bżonn huwa akbar? Forsi tistaʼ tmur f’kongregazzjoni fejn jinħtieġu iktar ħaddiema. (Mt. 9:​37, 38) Dan m’għandux isir malajr malajr. Jixraqlu konsiderazzjoni bit-​talb. (Luqa 14:​28-30) Iddiskuti s-​sitwazzjoni tiegħek maʼ l-​anzjani u l-​indokratur tas-​circuit. Se jirraġunaw miegħek dwar jekk huwiex għaqli li tagħmel ċaqliqa bħal din issa jew jekk tippreparax biex tagħmel hekk fil-​futur. Jekk tixtieq tikteb lis-​Soċjetà għal suġġeriment dwar fejn tistaʼ tmur toqgħod, l-​ittra tiegħek trid tkun akkumpanjata minn ittra ffirmata mill-​Kumitat tas-​Servizz tal-​Kongregazzjoni tiegħek.

⁸ Tejjeb il-​Kwalità tas-​Servizz Tiegħek: X’aktarx li lkoll kemm aħna nistgħu nieħdu sehem iktar bis-​sħiħ fil-​ministeru billi ntejbu l-​kwalità tas-​servizz taʼ l-​għalqa tagħna. Involut int fil-​karatteristiċi kollha taʼ dan ix-​xogħol, inkluż l-​għoti taʼ xiehda minn dar għal dar u b’mod informali, kif ukoll fix-​xogħol taʼ żjajjar lura u studji tal-​Bibbja? Jekk qed tikkonduċi studju tal-​Bibbja, tistaʼ ttejjeb l-​arti tiegħek tat-​tagħlim? Ikun tajjeb kieku tirrevedi l-​insert taʼ Il-​Ministeru tas-​Saltna taʼ Ġunju 1996 għal suġġerimenti li tistaʼ tuża biex timmotiva lill-​istudenti tiegħek biex jiddedikaw ruħhom u jitgħammdu.

⁹ Diskussjoni iktar estensiva dwar modi kif nespandu u ntejbu l-​ministeru tagħna tinstab f’kapitlu 9 tal-​ktieb Organized to Accomplish Our Ministry. Żgur li lkoll kemm aħna għandna nixtiequ li nagħmlu kemm jistaʼ jkun fis-​servizz t’Alla. Għala ma taħsibx bis-​serjetà dwar il-​miri spiritwali tiegħek? Agħmel bħalma jirrikkmanda l-​1 Timotju 4:15: “Dawn il-​ħwejjeġ ħu ħsiebhom, agħti ruħek għalihom, biex kulħadd jara li int miexi ’l quddiem.”