Ixxandar Int is-​Saltna Regolarment?

¹ Aħna lkoll fraħna meta sirna nafu li Malta laħqet l-​ogħla quċċata li qatt kellha taʼ 552 pubblikatur f’Mejju taʼ l-​1998. Tassew sforz magħqud u determinat! Evidentement, fix-​xhur taʼ wara, xi wħud minn dawn il-​pubblikaturi kellhom xi diffikultà biex ikunu proklamaturi regulari tas-​Saltna, għax minn dakinhar ’l hawn il-​medja tax-​xahar kienet madwar 523. Dan jindika li medja taʼ madwar 29 pubblikatur ma rrapportawx is-​sehem li kellhom fil-​ministeru kull xahar. Aħna nemmnu li l-​inkuraġġiment li se nagħtu hawn, jistaʼ jgħin biex tissolva s-​sitwazzjoni.

² Apprezza l-​Privileġġ: Għandu jkollna apprezzament profond għall-​privileġġ li għandna illi naqsmu l-​aħbar tajba tas-​Saltna m’oħrajn. Din l-​attività tferraħ qalb Jehovah u tgħin lil uħud taʼ qalb onesta jitgħallmu t-​triq tal-​ħajja. (Prov. 27:11; 1 Tim. 4:16) L-​għoti taʼ xiehda regulari jkabbrilna l-​esperjenza tagħna fil-​ministeru u jirriżulta f’sens taʼ ferħ u twettiq.

³ Irrapporta l-​Attività: Xi wħud li jieħdu sehem fis-​servizz taʼ l-​għalqa jonqsu li jirrapportaw l-​attività tagħhom fil-​ħin eżatt. Qatt m’għandna nħossuna li l-​isforz tagħna ma kienx taʼ siwi biżżejjed biex nirrapportawh. (Qabbel Mark 12:​41-44.) Ċertament, aħna għandna nirrapportaw dak li nkunu għamilna! Li jkollok xi proċedura d-​dar, bħal li tuża kalendarju biex tniżżel il-​ħin li tkun qattajt fil-​ministeru, se jservi bħala tfakkira kontinwa biex tagħti rapport eżatt u minnufih fl-​aħħar taʼ kull xahar.

⁴ Agħti l-​Għajnuna Meħtieġa: Forsi hemm bżonn li jsir titjib fl-​arranġamenti lokali biex jiġu megħjunin dawk li jeħtieġu l-​għajnuna f’li jkollhom sehem regulari fil-​ministeru. Is-​segretarju tal-​kongregazzjoni u dawk li jikkonduċu l-​istudju tal-​ktieb għandhom isibu pubblikaturi bl-​esperjenza biex jagħtu daqqa t’id. Jekk it-​tfal tiegħek jew oħrajn li jistudjaw il-​Bibbja miegħek huma pubblikaturi mhux mgħammdin, ħarriġhom biex jirrapportaw l-​attività tagħhom kull xahar.

⁵ Ftakar fil-​bijografija, “Grateful for a Long Life in Jehovah’s Service” (Grata għal Ħajja Twila fis-​Servizz taʼ Jehovah), fil-​Watchtower taʼ l-​1 t’Ottubru, 1997. Oħtna Ottilie Mydland minn Norway saret pubblikatriċi regulari taʼ l-​aħbar tajba qabel ma tgħammdet fl-​1921. Sitta u sebgħin sena wara, fl-​età taʼ 99 sena, qalet: “Jien ferħana li għadni nistaʼ nkun pubblikatriċi regulari.” X’attitudni meraviljuża hi din biex jimitawha l-​qaddejja kollha taʼ Jehovah!