Il-Ħajjiet Jinsabu fil-Periklu!
1 Il-Bibbja tagħmilha ċara li r-rieda taʼ Jehovah hi “li l-bnedmin kollha jsalvaw.” Madankollu, huwa minnu wkoll li jekk il-miljuni taʼ nies fuq l-art jgħixux jew le jiddependi mill-attitudni li huma għandhom lejn Alla Jehovah u s-Saltna tiegħu permezz taʼ Ġesù Kristu. Attitudni xierqa tistaʼ tkun ibbażata biss fuq li “jagħrfu l-verità.” (1 Tim. 2:3, 4) Għandna nħabbru li l-art dalwaqt se titnaddaf mill-ħażen kollu biex minflokha jkun hawn id-dinja ġdida t’Alla taʼ tjieba. Sadanittant, aħna ġejna inkarigati wkoll inwettqu xogħol vitali li jsalva l-ħajjiet.—Mt. 24:14; 28:19, 20; Rum. 10:13-15.
2 Għala Daqshekk Urġenti? Ġesù ta t-twissija dwar “diqa [jew, tribulazzjoni] kbira li mill-bidu tad-dinja sa issa għadu qatt ma kien hawn bħalha.” (Mt. 24:21) Din it-tribulazzjoni se tilħaq il-quċċata tagħha f’Armageddon. (Apk. 16:16) In-nies kollha li se jiffaċċjaw qerda totali jekk kemm-il darba jonqsu li jwieġbu għall-aħbar tajba jinkludu, il-qraba tagħna li ma jemmnux, il-ġirien, sħabna tax-xogħol u taʼ l-iskola, u lil dawk kollha li nafu. Imma l-interess tagħna hu li nilħqu lill-“bnedmin kollha” bħalma għamel Alla, li wera mħabbtu għad-dinja kollha taʼ bnedmin billi ta lil Ibnu, Ġesù Kristu, biex il-prezz tal-fidwa jitħallas għal kulħadd. (Ġw. 3:16) Aħna rridu nistinkaw b’mod żeluż biex nistiednu lil kulħadd jaħrab lejn il-post taʼ sigurtà provdut minn Alla. Billi nwettqu bis-sħiħ ix-xogħol taʼ l-ippridkar nistgħu nevitaw il-ħtija tad-demm.—Eżek. 33:1-7; 1 Kor. 9:16.
3 X’Inhu l-Iskop Tagħna? Il-Kelma t’Alla tenfasizza l-importanza tax-xogħol taʼ l-ippridkar. Bħalma esprima l-appostlu Pawlu, “l-imħabba taʼ Kristu ġġegħelna” ngħixu fi qbil mal-mogħdijiet t’Alla. (2 Kor. 5:14) Iżjed minn hekk, It-Torri taʼ l-Għassa taʼ spiss jenfasizza l-obbligu tagħna biex nippridkaw. Il-Ministeru tas-Saltna l-ħin kollu jipprovdilna direzzjoni fuq kif għandna nwettqu x-xogħol taʼ l-ippridkar. L-anzjani jorganizzaw ix-xogħol u jinkuraġġuna biex nieħdu sehem fih. Il-pubblikaturi sħabna jistidnuna biex nieħdu sehem magħhom fil-ministeru. Nisimgħu ħafna dwar kif nistgħu nippreparaw il-preżentazzjonijiet tagħna, noffru r-rivisti u letteratura oħra, nagħmlu ż-żjajjar lura, nikkonduċu l-istudji tal-Bibbja u nużaw kull opportunità biex nagħtu xiehda. Dan kollu jgħinna nwettqu l-iskop taʼ li nsalvaw il-ħajjiet.—1 Kor. 9:22, 23; Efes. 1:13.