“Il-​Millennju l-​Ġdid—X’Qed Joffrilek il-​Futur?”

¹ Din il-​mistoqsija ilha ħafna fl-​imħuħ tan-​nies madwar id-​dinja. Għalkemm il-​bniedem wettaq ħafna affarijiet matul is-​sekli, in-​nies jinsabu diżappuntati għax il-​problemi bażiċi li ilhom ikiddu lill-​bnedmin għall-​millennji sħaħ għadhom jeżistu. (Ġob 14:1; Salm 90:10) Il-​bnedmin fejn jistgħu jsibu serħan?

² Matul ix-​xhur t’Ottubru u Novembru, se jkollna opportunità speċjali biex nipprovdu tweġiba għal din il-​mistoqsija lill-​ġirien tagħna. Kif? Permezz tat-​tqassim taʼ l-​Aħbar tas-​Saltna Nru. 36. Din iġġib l-​isem “Il-​Millennju l-​Ġdid—X’Qed Joffrilek il-​Futur?” Sa nofs ix-​xahar t’Ottubru se noffru r-​rivisti It-​Torri taʼ l-​Għassa u Stenbaħ! Imbagħad mit-​Tnejn, 16 t’Ottubru, sal-​Ġimgħa, 17 taʼ Novembru, se nieħdu sehem fi tqassim intensiv taʼ l-​Aħbar tas-​Saltna Nru. 36. Matul din il-​kampanja se nikkonċentraw fuq li nħallu l-​fuljett Aħbar tas-​Saltna Nru. 36 fost il-​ġimgħa. Fi tmiem il-​ġimgħa se nippreżentawh flimkien mar-​rivisti kurrenti.

³ Se Jkollok Sehem Sħiħ? L-​anzjani, il-​qaddejja ministerjali, u l-​pijunieri se jkunu jridu jagħtu l-​aqwa eżempju f’din il-​kampanja, ladarba huma minn taʼ quddiemnett fix-​xogħol. Ħafna pubblikaturi rranġaw iċ-​ċirkustanzi tagħhom biex ikunu pijunieri awżiljarji matul xahar minnhom jew inkella fix-​xahrejn tat-​tqassim. Oħrajn jippjanaw li jqattgħu iktar ħin mis-​soltu fil-​ministeru.

⁴ Dawk li jikkonduċu l-​Istudju tal-​Ktieb tal-​Kongregazzjoni jistgħu jkunu t’għajnuna f’li jinkuraġġixxu lil kull membru tal-​grupp tagħhom biex jieħu sehem sħiħ fit-​tqassim taʼ l-​Aħbar tas-​Saltna Nru. 36. Għandu mnejn hemm xi pubblikaturi li saru inattivi fix-​xogħol taʼ l-​ippridkar. L-​anzjani għandhom iżuruhom ħalli jaraw x’jistgħu jagħmlu biex jgħinuhom. Forsi jistgħu jsiru xi arranġamenti biex pubblikatur bl-​esperjenza jkun jistaʼ jaħdem maʼ kull persuna inattiva fis-​servizz taʼ l-​għalqa matul dawn ix-​xhur. Forsi dawn il-​pubblikaturi jkollhom bżonn eżatt din il-​preżentazzjoni sempliċi taʼ l-​Aħbar tas-​Saltna Nru. 36 biex jerġgħu jsiru attivi fis-​servizz taʼ l-​għalqa.

⁵ Din tistaʼ tkun opportunità tajba wkoll biex l-​istudenti tal-​Bibbja li kważi spiċċaw il-​ktieb Għarfien u li jikkwalifikaw bħala pubblikaturi mhux mgħammdin, jibdew jieħdu sehem fil-​ministeru. Saħansitra ż-​żgħar jistaʼ jkollhom sehem mill-​aħjar f’dan ix-​xogħol eċċitanti.

⁶ Hemm bżonn biss preżentazzjoni sempliċi. Tistaʼ tgħid:

◼ “Iddeċidejt li bħala volontier nuża l-​ħin tiegħi biex ngħin fit-​tqassim taʼ dan il-​messaġġ verament importanti lil kull familja f’[l-isem tal-​post]. Din hi l-​kopja tiegħek. Jekk jogħġbok aqraha.” Ikun aħjar jekk ma ġġorrx basket miegħek meta tkun qed tqassam l-​Aħbar tas-​Saltna Nru. 36.

⁷ Laqgħat Ippjanati Sew għas-​Servizz taʼ l-​Għalqa: L-​anzjani jridu jieħdu ħsieb li l-​arranġamenti għall-​għoti taʼ xiehda jkunu kemm konvenjenti u kemm prattiċi. L-​indokratur tas-​servizz b’mod speċjali għandu jkun ċert li hemm biżżejjed territorju minn dar għal dar u tan-​negozju sabiex kulħadd ikun jistaʼ jieħu sehem bis-​sħiħ fix-​xogħol. Kulfejn ikun possibbli, għandhom jiġu organizzati laqgħat tas-​servizz għal kull ġurnata tal-​ġimgħa, għal tmiem il-​ġimgħa u għal fil-​għaxijiet. Jistgħu jsiru arranġamenti għall-​gruppi tard wara nofsinhar għall-​benefiċċju taʼ l-​istudenti taʼ l-​iskola, tal-​ħaddiema li jaħdmu bix-​xift, u t’oħrajn.

⁸ X’Nagħmlu dwar id-​Djar Fejn Ma Nsibu lil Ħadd: Il-​mira tagħna hi li nitkellmu maʼ kemm jistaʼ jkun inkwilini. Jekk meta tħabbat ma ssib lil ħadd id-​dar, ħu nota taʼ l-​indirizz u mur f’xi ħin differenti tal-​ġurnata. Jekk sa l-​aħħar ġimgħa tal-​kampanja ma jkunx irnexxielek tikkuntattja lil dawn l-​inkwilini, tistaʼ tħallilhom kopja taʼ l-​Aħbar tas-​Saltna Nru. 36 f’xi post fejn ma tkunx tidher minn dawk li jkunu għaddejjin minn hemm. L-​anzjani lokali jistgħu jistruwixxu lil dawk fil-​kongregazzjoni biex iħallu kopja taʼ l-​Aħbar tas-​Saltna Nru. 36 fl-​ewwel żjara meta ma jsibu ’l ħadd id-​dar, meta jkunu qed jinħadmu nħawi rurali u nħawi fejn ikun hemm iktar territorju milli jistaʼ jintlaħaq matul il-​kampanja.

⁹ Ejja Ħa Jkollna Ħafna X’Nagħmlu! Il-​kongregazzjonijiet għandhom jistinkaw biex ikopru t-​territorju tagħhom qabel ma tintemm il-​kampanja fis-​17 taʼ Novembru. Jekk it-​territorju tiegħek huwa kbir mhux ħażin, xi pubblikaturi jistgħu jaħdmu waħedhom fejn ikun prattiku u bla periklu. Dan l-​arranġament se jagħmilha iktar faċli biex tilħaq kemm jistaʼ jkun uħud li jixirqilhom. Kun ċert li tieħu nota sewwa taʼ kull interess li ssib.

¹⁰ L-​anzjani għandhom jantiċipaw kemm se jkollha bżonn rivisti żejda l-​kongregazzjoni u għandhom jordnaw skond il-​bżonn. L-​Aħbar Tas-​Saltna Nru. 36 m’hemmx għalfejn jiġi ordnat, peress li se tintbagħat konsenja lil kull kongregazzjoni. Il-​pijunieri speċjali, regulari, u awżiljarji se jirċievu 250 kopja kull wieħed x’iqassmu, filwaqt li l-​pubblikaturi tal-​kongregazzjoni se jingħataw 50 kopja kull wieħed. Mela, lest int u ħerqan biex ikollok ħafna x’tagħmel f’din l-​attività speċjali? Kemm aħna privileġġati li lill-​proxxmu tagħna ngħarrfuh x’wiegħed Alla għall-​futur qarib!