Kampanja Speċjali mis-​16 t’Ottubru sat-​12 taʼ Novembru!

¹ “It-​Tmiem tar-​Reliġjon Falza Huwa fil-​Qrib!” Dan huwa t-​titlu tal-​fuljett Aħbar tas-​Saltna Nru. 37, li se jibda jitqassam madwar id-​dinja mix-​xahar id-​dieħel. Matul l-​ewwel nofs t’Ottubru, se noffru r-​rivisti t-​Torri taʼ l-​Għassa u l-​Awake! B’seħħ mit-​Tnejn 16 t’Ottubru sal-​Ħadd 12 taʼ Novembru, se nieħdu sehem fit-​tqassim intensiv tal-​fuljett Aħbar tas-​Saltna Nru. 37. Fis-​Sibtijiet u l-​Ħdud taʼ matul il-​kampanja se noffruh flimkien mal-​ħarġiet kurrenti tar-​rivisti.

² Min Jistaʼ Jieħu Sehem: Dawk kollha li qed jippridkaw l-​aħbar tajba b’mod attiv se jkunu jridu jieħdu sehem bis-​sħiħ. Xi wħud se jkunu jistgħu jaqdu bħala pijunieri awżiljarji. Għandek int tfal jew studenti tal-​Bibbja li qed jagħmlu progress spiritwali? Għinhom sabiex javviċinaw lill-​anzjani ħalli jaraw jekk jikkwalifikawx bħala pubblikaturi mhux mgħammdin. L-​anzjani għandhom jieħdu l-​inizjattiva biex jitkellmu mal-​pubblikaturi li m’humiex attivi sabiex jinkuraġġuhom ħalli jipparteċipaw, forsi billi jaħdmu maʼ pubblikaturi taʼ l-​esperjenza.

³ Se tintbagħat provvista tal-​fuljett Aħbar tas-​Saltna Nru. 37 lill-​kongregazzjonijiet kollha sabiex il-​pubblikaturi u l-​pijunieri jkunu jistgħu jieħdu minn taʼ l-​inqas 50 kopja. Uħud interessati li għadhom m’humiex pubblikaturi jistgħu jingħataw ħames kopji sabiex ikunu jistgħu jqassmuhom lil tal-​familja u lill-​ħbieb. Kulħadd għandu jżomm nota taʼ l-​ammont li jkun qassam u jiktbu fuq in-​naħa taʼ wara tar-​rapport tas-​servizz taʼ l-​għalqa fl-​aħħar t’Ottubru u taʼ Novembru. Is-​segretarju se jagħmel lista tat-​total għall-​kongregazzjoni u jagħmel rapport lill-​uffiċċju tal-​fergħa fl-​aħħar taʼ kull xahar. Kwalunkwe kopja mill-​fuljett Aħbar tas-​Saltna li jifdal wara li l-​kampanja tispiċċa tistaʼ tintuża fi kwalunkwe aspett tal-​ministeru.

⁴ X’Nistgħu Ngħidu: Żomm il-​preżentazzjoni tiegħek qasira għax b’hekk jitħalla iktar ħin biex jitqassam il-​messaġġ. Tistaʼ tgħid: “Bħala servizz pubbliku qed nieħu sehem fi tqassim taʼ messaġġ importanti li qed isir madwar id-​dinja. Din hija l-​kopja tiegħek u hija b’xejn. Jekk jogħġbok aqraha.” Forsi jkun aħjar jekk ma ġġorrx basket miegħek minn bieb għal bieb. Agħmel ċert li żżomm nota taʼ kull interess li ssib.

⁵ Kif Tkopri t-​Territorju Tiegħek: Minflok ma tqassam il-​fuljett Aħbar tas-​Saltna fl-​għoti taʼ xiehda fit-​toroq, iffoka fuq li tkopri kemm jistaʼ jkun mit-​territorju tiegħek minn dar għal dar u mit-​territorju taʼ negozju. Żomm nota taʼ dawk li ma ssibx id-​dar, u pprova mur lura f’ħin differenti jew f’xi ġurnata differenti tal-​ġimgħa. Mit-​Tnejn 6 taʼ Novembru ’l quddiem tistaʼ titħalla kopja fejn ma jinstab ħadd id-​dar. Madankollu, jekk il-​kongregazzjoni għandha iktar territorju milli tistaʼ tkopri matul iż-​żmien tal-​kampanja, l-​anzjani għandhom mnejn jiddeċiedu li l-​fuljett Aħbar tas-​Saltna għandu jitħalla fejn ma jinstabux in-​nies matul il-​kampanja kollha.

⁶ Il-​qerda taʼ “Babilonja l-​Kbira” qed tersaq malajr. In-​nies għandhom bżonn joħorġu minnha qabel ma tinqered kompletament. (Riv. 14:8; 18:8) Agħmel pjanijiet issa biex tieħu sehem sħiħ f’din il-​kampanja li se ssir madwar id-​dinja sabiex kulħadd ikun jaf li t-​tmiem tar-​reliġjon falza hu fil-​qrib!