Għodod li Jedukaw, Iqanqlu u Jsaħħu
1 Dawn għandhom qawwa biex jedukaw lin-nies dwar il-Bibbja u x-Xhieda taʼ Jehovah. Qanqlu lil ħafna biex jieħdu waqfa soda għall-verità. Saħħew il-fidi u l-apprezzament tan-nies dedikati t’Alla. X’inhuma dawn? Il-vidjos magħmulin mill-organizzazzjoni taʼ Jehovah. Rajthom l-għaxra li huma? Ilek li rajthom? Tużahom fil-ministeru tiegħek? Fil-konvenzjoni distrettwali ġie mħabbar li ħareġ il-11-il vidjo, Our Whole Association of Brothers. Int ordnajtu? Kif tistaʼ tikseb iktar benefiċċji minn dawn l-għodod meraviljużi?
2 L-artiklu tat-Torri taʼ l-Għassa taʼ l-1 taʼ Lulju, 1999, “Studjaw Regolarment il-Kelma t’Alla Bħala Familja,” irrikkmanda li ‘twarrbu ftit mill-ħin taʼ l-istudju biex taraw xi silta minn wieħed mill-vidjos istruttivi tas-Soċjetà . . . u mbagħad tiddiskutuha.’ Fi qbil maʼ dan il-parir mill-aħjar, se jiġi diskuss vidjo differenti waqt il-Laqgħa tas-Servizz darba kull xahrejn. Ninkuraġġixxu lil kulħadd fil-kongregazzjoni biex jara l-vidjo d-dar qabel ma jkun se jiġi diskuss fil-Laqgħa tas-Servizz.
3 Dan ix-xahar se nibdew bl-ewwel vidjo li ħriġna, Jehovah’s Witnesses—The Organization Behind the Name. Ara u ismaʼ x’inhuma t-tweġibiet għal dawn il-mistoqsijiet:
◼ Għalxiex huma l-iktar magħrufin ix-Xhieda taʼ Jehovah?
◼ Kulma jsir ġewwa Betel huwa konness maʼ liema skrittura?
◼ Liema xena Biblika rajt waqt li kienu qed jirreċtawha, jiħdulha ritratt, u jpinġuha sabiex tintuża fil-pubblikazzjonijiet?
◼ Liema ħaġa timpressjonak dwar il-mod kif tiġi preparata l-letteratura tagħna?
◼ Mill-1920 sa l-1990, kemm-il letteratura differenti ġiet stampata mis-Soċjetà?
◼ Min fost in-nies t’Alla għandu b’mod speċjali jimmira għas-servizz taʼ Betel?—Prov. 20:29.
◼ Il-familja taʼ Betel b’liema modi tagħti eżempju eċċellenti lix-Xhieda taʼ Jehovah kollha?
◼ Liema ħaġa timpressjonak dwar ix-xogħol li jsir ġewwa Betel sabiex jintlaħqu kemm jistaʼ jkun nies bl-aħbar tajba?
◼ Kif jiġi finanzjat ix-xogħol madwar id-dinja kollha?
◼ Liema attività nistgħu nappoġġaw b’mod żeluż, u b’liema spirtu?—Ġw. 4:35; Atti 1:8.
◼ Kif tħossok dwar l-organizzazzjoni li hemm wara isimna?
◼ Kif tistaʼ tuża dan il-vidjo fil-ministeru?
F’Diċembru se nirrevedu l-vidjo The Bible—Accurate History, Reliable Prophecy.