L-Effett tal-Vidjos li Jagħtu Xiehda
1 “It-tifel ilu jara dan il-vidjo minn qabel ma beda jimxi. Jarah għal darba wara l-oħra. Kemm hu meraviljuż il-fatt li għandna għodod li jnaqqxu l-imħabba lejn Jehovah f’uliedna!” Dwar liema vidjo kien qed jitkellem dan il-ġenitur Kristjan? Dak li jismu Noah—He Walked With God (Noè—Hu Mexa m’Alla). Omm li m’hijiex Xhud u li binha kien ra dan il-vidjo għand ħaddieħor bagħtet donazzjoni taʼ xi Lm40 lill-uffiċċju tal-fergħa u staqsiet dwar jekk għandniex iktar vidjos għat-tfal. Il-vidjos maħruġin mill-organizzazzjoni taʼ Jehovah qed iħallu effett qawwi kemm fuq iż-żgħar kif ukoll fuq il-kbar.
2 Fil-Familja: Wara li familja taʼ Xhieda raw il-vidjo Jehovah’s Witnesses Stand Firm Against Nazi Assault (Ix-Xhieda taʼ Jehovah Jieqfu Sodi Kontra l-Attakki tan-Nazi), l-omm qalet: “Ilni nimmedita l-ġurnata kollha fuq kif Jehovah għen lil nies ordinarji jissaportu affarijiet straordinarji! Jien u naħseb dwar dan ftakart kemm m’huma xejn il-problemi tiegħi meta nqabbilhom maʼ tagħhom. Il-fatt li rajna dan il-vidjo m’uliedna għenhom jifhmu aħjar kemm għandhom bżonn jistrieħu fuq Jehovah. Billi wara ddiskutejnieh m’uliedna l-bniet, stajna ngħinuhom ikunu iktar imħejjijin biex jiffaċċjaw kwalunkwe pressjoni u persekuzzjoni li jistgħu jħabbtu wiċċhom magħhom.”
3 Fl-Iskola: F’parti minn rapport, adolexxent li hu Xhud setaʼ juri ftit mill-vidjo Stand Firm lill-klassi. Qabel ma għamel hekk, l-għalliema kienet qalet li ma kellhiex grazzja max-Xhieda. Wara li rat il-vidjo, hi qalet: “Dan il-vidjo biddilli kompletament il-ħarsa li kelli lejn ix-Xhieda taʼ Jehovah. Inwiegħed li la jerġgħu jiġu għandi, se nismagħhom u se nibda nistudja l-Bibbja magħhom!” X’bidlilha l-ħarsa tagħha lejna? Hi qalet li kienu “l-imħabba u l-lealtà vera” li għandna.
4 Fil-Ministeru: Waħda oħt iltaqgħet maʼ mara li ma riditx taċċetta l-letteratura, għalkemm kellha xi mistoqsijiet dwarna u dwar it-twemmin tagħna. L-oħt marret lura bil-vidjo Jehovah’s Witnesses—The Organization Behind the Name (Ix-Xhieda taʼ Jehovah—L-Organizzazzjoni Wara l-Isem) u wrietu lill-mara u lil żewġha. It-tnejn li huma baqgħu impressjonati ferm u qablu li jistudjaw il-Bibbja. Bħala riżultat tax-xiehda tajba li ngħatatilhom, huma bdew iġibu ħajjithom fi qbil mar-rieda t’Alla.
5 Qiegħed tuża l-vidjos tagħna b’tali mod li joħroġ il-ġid kollu li fihom?