Pressjoni minn taʼ Madwarek u l-​Privileġġ Tiegħek li Tippriedka

¹ Il-​pressjoni minn taʼ madwarek hija influwenza qawwija—għat-​tajjeb jew għall-​ħażin. Sħabna l-​qaddejja taʼ Jehovah jeżerċitaw influwenza pożittiva li tħeġġiġna għal xogħlijiet Kristjani mill-​aħjar. (Lhud 10:24) Madankollu, membri tal-​familja li m’humiex Xhieda, sħabna tax-​xogħol u taʼ l-​iskola, il-​ġirien, jew oħrajn li nafu jistgħu jagħmlulna pressjoni sabiex nagħmlu affarijiet li jmorru kontra l-​prinċipji Kristjani. Huma jistgħu ‘jkasbru l-​imġiba tajba tagħna fi Kristu.’ (1 Pt. 3:16) Kif nistgħu nżommu d-​determinazzjoni tagħna biex nibqgħu nippridkaw minkejja l-​pressjoni negattiva li nistgħu niffaċċjaw minn taʼ madwarna?

² Il-​Membri tal-​Familja: Xi drabi, raġel miżżewweġ u missier li m’huwiex wieħed mix-​Xhieda taʼ Jehovah għandu mnejn ma jkunx irid li martu u wliedu jieħdu sehem fil-​ministeru pubbliku. Hekk kienet is-​sitwazzjoni ġewwa dar fil-​Messiku. Mara miżżewġa u s-​sebaʼ wliedha ġew fil-​verità. Għall-​ewwel ir-​raġel kien jopponi għax ma riedx li l-​membri tal-​familja tiegħu jippridkaw u joffru letteratura Biblika minn dar għal dar. Kien iħoss li dan kien xogħol baxx ħafna għalihom. Madankollu, martu u wliedu baqgħu sodi fid-​deċiżjoni tagħhom li jaqdu lil Jehovah u jkollhom sehem regulari fil-​ministeru. Maż-​żmien, ir-​raġel beda jara l-​valur f’li jaċċetta l-​arranġament t’Alla għax-​xogħol taʼ l-​ippridkar, u anki hu ddedika lilu nnifsu lil Jehovah. Dam 15-il sena biex aċċetta l-​verità, imma kien qatt se jagħmel dan il-​pass li kieku l-​familja tiegħu ma baqgħetx tippersevera fil-​privileġġ li kellha taʼ l-​ippridkar?—Lq. 1:74; 1 Kor. 7:16.

³ Sħabek tax-​Xogħol: Xi wħud minn sħabek tax-​xogħol forsi ma jiħdux pjaċir bl-​isforzi tiegħek biex tagħtihom xiehda. Waħda oħt irrakkontat kif meta qamet diskussjoni dwar l-​aħħar tad-​dinja fl-​uffiċċju, din ġiet ridikolata għax issuġġeriet biex jaqraw Mattew kapitlu 24. Madankollu, ftit jiem wara, waħda minn sħabha tax-​xogħol qaltilha li qrat dak il-​kapitlu u baqgħet impressjonata. L-​oħt ħallitilha pubblikazzjoni, u sar ftehim biex jinbeda studju tal-​Bibbja mal-​mara u maʼ żewġha. L-​ewwel studju dam sejjer sas-​sagħtejn taʼ fil-​għodu. Wara t-​tielet studju bdew jattendu għal-​laqgħat, u eżatt wara dan qatgħu l-​użu tat-​tabakk u bdew jieħdu sehem fil-​ministeru. Kien se jseħħ dan li kieku oħtna m’għamlet l-​ebda sforz sabiex taqsam it-​tama tagħha m’oħrajn?

⁴ Sħabek taʼ l-​Iskola: Hija xi ħaġa normali li x-​Xhieda żgħażagħ jesperjenzaw pressjoni minn taʼ madwarhom fl-​iskola u li jibżgħu li żgħażagħ oħrajn se jċekknuhom talli jieħdu sehem fix-​xogħol taʼ l-​ippridkar. Tfajla Kristjana fl-​Istati Uniti qalet: “Kont nibżaʼ nagħti xiehda lil żgħażagħ oħrajn għax kont nibżaʼ li se jwaqqgħuni għaċ-​ċajt.” Għalhekk, hi evitat opportunitajiet biex tagħti xiehda lil sħabha taʼ l-​iskola u fit-​territorju tagħha. Kif tistaʼ tiżviluppa s-​saħħa biex tiffaċċja bil-​qlubija l-​pressjoni minn taʼ madwarek? Afda f’Jehovah, billi tfittex it-​tbissima t’approvazzjoni tiegħu. (Prov. 29:25) Kun kuntent bil-​kapaċità tiegħek f’li tuża l-​Kelma t’Alla fil-​ministeru tiegħek. (2 Tim. 2:15) Iż-​żagħżugħa li għadha kif issemmiet bdiet titlob lil Jehovah biex jgħinha tikkultiva x-​xewqa li titkellem maʼ sħabha taʼ l-​iskola. Hi bdiet tagħti xiehda informali fl-​iskola, kellha riżultati tajbin, u fi ftit żmien bdiet titkellem maʼ kulmin kienet taf. Hi kkonkludiet: “Dawn iż-​żgħażagħ għandhom bżonn u jixtiequ tama għall-​futur, u Jehovah qed jużana biex ngħinuhom.”

⁵ Il-​Ġirien: Forsi għandna xi ġirien jew uħud oħrajn li nafuhom li jiddejqu bina għall-​fatt li aħna Xhieda taʼ Jehovah u minħabba t-​twemmin tagħna. Jekk int tibżaʼ minn dak li jaħsbu huma, staqsi lilek innifsek: ‘Jafuha huma l-​verità li twassal għall-​ħajja taʼ dejjem? X’nistaʼ nagħmel biex nilħqilhom qalbhom?’ Indokratur tas-​circuit osserva li riżultati tajbin jinkisbu meta nagħtu xiehda lill-​ġirien naqra naqra. Itlob bil-​ħniena lil Jehovah għas-​saħħa u l-​għerf meħtiġin sabiex tkompli tfittex lil dawk l-​uħud taʼ qalb onesta.—Flp. 4:13.

⁶ Il-​fatt li nċedu għall-​pressjoni negattiva minn taʼ madwarna jistaʼ jogħġob lil dawk li jopponu, imma li nagħmlu dan se jkun għall-​aħjar interessi tagħhom—jew tagħna? Lil Ġesù kienu jopponuh in-​nies tal-​komunità tiegħu stess. Hu saħansitra ssaporta kummenti li jweġġgħu taʼ ħutu mill-​omm. Imma kien jaf li setaʼ jgħinhom biss billi jibqaʼ leali f’li jwettaq dak kollu li Alla poġġielu quddiemu. B’hekk, Ġesù “qagħad għal oppożizzjoni hekk kbira min-​naħa tal-​midinbin.” (Lhud 12:2,3) Aħna rridu nagħmlu l-​istess ħaġa. Kun determinat li tagħmel l-​aħjar li tistaʼ fil-​privileġġ tiegħek biex tippriedka l-​messaġġ tas-​Saltna. Billi tagħmel dan, “issalva lilek innifsek u lil dawk li jisimgħuk.”—1 Tim. 4:16.