Nippjanaw bil-​Quddiem—Għal Liema Affarijiet?

¹ Aħna lkoll naħsbu fuq xi pjanijiet għall-​futur tagħna. Dawk li għandhom it-​tama għall-​art qed iħarsu ’l quddiem għal meta se jgħixu għal dejjem fid-​dinja l-​ġdida taʼ tjieba t’Alla. Iżda hemm ċerti influwenzi li jistgħu jisirqulna minn qalbna dik it-​tama. Jeħtieġ li nagħmlu sforz kbir biex jirnexxilna nkomplu nibnu ħajjitna madwar l-​interessi tas-​Saltna u ma nħallux lilna nfusna niġu aljenati mill-​ġibdiet li jħajru tal-​ġisem.​—1 Ġw. 2:​15-​17.

² Id-​dinja assolutament ma tistax tifhem il-​miri taʼ nies spiritwali. (1 Kor. 2:14) Filwaqt li nies oħrajn moħħhom biex jakkwistaw il-​fama, il-​poter, jew ir-​rikkezzi, aħna niġru wara teżori spiritwali. (Mt. 6:​19-​21) Jekk aħna nipprovaw inġibu l-​ħsieb tagħna fi qbil mal-​ħarsa li għandha d-​dinja dwar il-​futur, jistaʼ qatt jirnexxilna nilħqu l-​miri spiritwali tagħna? L-​affarijiet tad-​dinja kieku malajr jaħkmulna qalbna. Kif nistgħu nevitawh dan?

³ “Ilbsu lil Sidna Ġesù Kristu”: Mod wieħed kif insiru nafu jekk hux qed nibnu l-​futur tagħna madwar l-​interessi tas-​Saltna huwa billi neżaminaw il-​konversazzjoni tagħna. Qegħdin aħna l-​ħin kollu nitkellmu fuq affarijiet materjali u fuq interessi li għandhom x’jaqsmu mad-​dinja? Jekk inhu hekk, irridu naraw jekk qalbna hix qed tonqos milli tiffoka fuq valuri spiritwali. Għandna mnejn ikollna bżonn inpoġġu iktar enfasi fuq li ‘nilbsu lil Sidna Ġesù Kristu u ma nagħtux kas il-​ħsieb tal-​ġisem u l-​ġibdiet tiegħu.’​—Rum. 13:14.

⁴ Iż-​żgħażagħ jistgħu ‘jilbsu lil Kristu’ billi jippjanaw bil-​quddiem lejn dak il-​jum li jibdew fil-​ministeru full-time. Żagħżugħ li ried jaqdi bħala pijunier regulari trabba f’kultura fejn id-​drawwa komuni kienet li l-​irġiel żgħażagħ ikollhom sigurtà finanzjarja. B’hekk, hu tant involva ruħu fin-​negozju li wasal sal-​punt li l-​laqgħat u l-​ministeru saru għalih biss parti minn rutina mekkanika. Meta beda jafda fil-​kliem taʼ Ġesù li jinsab f’Mattew 6:​33 u ħareġ minn dik ir-​rutina monotona li tant kienet qed tgħejieh, hu beda karriera fis-​servizz full-time. Illum, b’kuxjenza tajba, qed jaqdi lil Jehovah, bħalma jgħid hu stess, ‘b’kulma għandu.’

⁵ Il-​Bibbja tgħid li huwa għaqli li tippjana għall-​futur. (Prov. 21:5) Jalla lkoll kemm aħna dan nagħmluh waqt li nżommu f’moħħna li r-​rieda t’Alla hija l-​iktar ħaġa importanti.​—Efes. 5:​15-​17.