Il-​Konvenzjonijiet​—Żmien biex Nifirħu!

¹ Il-​konvenzjonijiet tax-​Xhieda taʼ Jehovah huma okkażjonijiet taʼ ferħ kbir. Għal iktar minn mitt sena, dawn il-​laqgħat taw spinta liż-​żjieda li qed isseħħ fl-​organizzazzjoni tagħna. Minn meta kellna bidu żgħir, dejjem rajna l-​barkiet għonja taʼ Jehovah fuq ix-​xogħol globali tagħna. Fl-​ewwel konvenzjoni tagħna taʼ żmienna, li saret f’Chicago, Illinios, fl-​1893, mit-​360 li attendew kien hemm total taʼ 70 li tgħammdu biex jissimbolizzaw id-​dedikazzjoni tagħhom lejn Jehovah. Fis-​serje taʼ Konvenzjonijiet Distrettwali “Nagħmlu Dak li Tgħid il-​Kelma t’Alla” li saru s-​sena l-​oħra kien hemm total t’attendenza globali taʼ 9,454,055 persuna u kien hemm 129,367 li tgħammdu. X’raġuni meraviljuża għalxiex nifirħu!

² Minn żminijiet Bibliċi, il-​laqgħat tal-​poplu t’Alla pprovdew mezz li jispikka taʼ kif tingħata l-​istruzzjoni mingħand Jehovah. Fi żmien Esdra u Neħemija, il-​poplu qagħad jismaʼ l-​qari tal-​Liġi “mis-​sebħ sa nofsinhar.” (Neħ. 8:​2, 3) Il-​poplu esperjenza “ferħ kbir” peress li f’dik l-​okkażjoni kiseb fehma aħjar tal-​Liġi. (Neħ. 8:​8, 12) Aħna wkoll nifirħu bil-​konvenzjonijiet li jipprovdulna opportunità mill-​isbaħ biex nirċievu istruzzjoni tajba u ikel spiritwali “fil-​ħin” mingħand Jehovah permezz taʼ l-​ilsir leali u diskret. (Mt. 24:45) Peress li Ġesù qal li l-​bniedem irid jgħix “b’kull kelma li toħroġ minn fomm Alla,” il-​konvenzjonijiet huma vitali għas-​saħħa spiritwali tagħna.​—Mt.4:4.

³ Vallapena Nagħmlu Kull Sforz Sabiex Nattendu: Ilkoll kemm aħna għandna nagħmluha l-​mira persunali tagħna li nkunu preżenti għall-​Konvenzjoni Distrettwali kollha taʼ din is-​sena “Għalliema tal-​Kelma t’Alla.” Għandna nippjanaw li naslu kmieni kuljum u li nibqgħu sakemm flimkien ningħaqdu biex ngħidu “Amen!” għat-​talba taʼ l-​għeluq. Biex inwettqu dan għandu mnejn ikollna bżonn naġġustaw l-​iskeda tagħna. Biex nieħdu l-​leave mix-​xogħol sabiex nattendu għall-​konvenzjoni nistgħu niffaċċjaw xi diffikultajiet. Hemm bżonn li nieħdu waqfa soda, u ma nħallux l-​affarijiet mingħajr ma nippjanawhom bil-​quddiem. Jekk għandna bżonn taʼ fejn noqogħdu u/jew trasport, għandna nagħmlu l-​arranġamenti minn kmieni. Kwalunkwe sforz li se jkollna nagħmlu se jkun vallapena!

⁴ Il-​poplu taʼ Jehovah ma joqgħodx ikejjel il-​barkiet li jiġu milli jattendi għall-​konvenzjoni b’kemm se jiswielu flus. Innota l-​eżempji taʼ wħud li kienu determinati li jattendu għall-​Assemblea Internazzjonali tax-​Xhieda taʼ Jehovah Rieda Divina li saret fl-​1958 fil-​Belt taʼ New York. Ħu kellu jagħlaq il-​kumpanija tal-​bini tiegħu għal ħmistax sabiex joffri l-​għajnuna tiegħu bħala volontier u jattendi għall-​assemblea. Ħu ieħor fil-​Virgin Islands biegħ 20.235 kilometru kwadru rabaʼ biex il-​familja kollha tiegħu taʼ sitta min-​nies setgħu jattendu. Koppja żagħżugħa biegħu d-​dgħajsa li kellhom biex b’hekk setgħu jieħdu lit-​tlett itfal tagħhom għall-​assemblea, bl-​etajiet taʼ bejn xahrejn u sebgħa snin. Lil tlett irġiel, aħwa mid-​demm, minn Kalifornja ntqalilhom li jekk ma jmorrux għax-​xogħol, ma kinux se jsibuh meta jmorru lura. Madankollu, dan ma żammhomx milli jmorru għal dik l-​assemblea memorabbli.

⁵ Jehovah Jippremja l-​Isforz Ħerqan Tagħna: Jehovah jara u jbierek l-​isforzi tal-​poplu tiegħu. (Lhud 6:10) Per eżempju, fl-​Assemblea li kien jisimha Żjieda tat-​Teokrazija fl-​1950, dawk li kienu qed jattendu semgħu t-​taħdita sinifikanti “Sistema Ġdida t’Affarijiet.” Ħuna Frederick Franz qajjem u qanqal l-​interess taʼ kulħadd meta staqsa: “Dawk li qed jattendu din l-​assemblea internazzjonali jieħdu pjaċir jekk ikunu jafu li hawnhekk, illejla, fostna, hawn numru taʼ prinċpijiet prospettivi taʼ l-​art il-​ġdida?” Iktar minn 50 sena wara, għadna nifirħu b’din il-​fehma li ġiet iċċarata taʼ Salm 45:17 [45:​16, NW].

⁶ Wara li attenda għall-​konvenzjoni distrettwali tas-​sena l-​oħra, kap taʼ familja mimli bl-​apprezzament qal dan: “Ħuti, lanqas biss tafu kemm kienet taʼ salvazzjoni għal ħajjitna din il-​konvenzjoni. Jien u l-​familja tiegħi morna noqogħdu ġol-​belt minħabba x-​xogħol, u dan wassal biex bdejna mmajnaw spiritwalment. . . . Ittraskurajna l-​obbligi Kristjani tagħna. Saħansitra waqafna għalkollox milli nattendu l-​laqgħat u nieħdu sehem fis-​servizz taʼ l-​għalqa. . . . Din il-​konvenzjoni reġgħet saħħitna, u għal darb’oħra erġajna qed inpoġġu miri spiritwali u qed norganizzaw ruħna biex nilħquhom.”

⁷ Jehovah jipprovdilna l-​ikel spiritwali li għandna bżonn. Hu jifrex mejda abbundanti fil-​konvenzjonijiet tagħna. Bl-​apprezzament li għandna għal dan il-​provvediment suppost se nkunu nistgħu ngħidu dak li qal Kornelju meta l-​appostlu Pietru mar iżuru: “Issa aħna qegħdin hawn ilkoll quddiem Alla, biex nisimgħu dak kollu li l-​Mulej iridek tgħidilna.” (Atti 10:33) Ejja nagħmluha l-​mira tagħna li nkunu preżenti “quddiem Alla” għal kull sezzjoni tal-​Konvenzjoni Distrettwali taʼ din is-​sena “Għalliema tal-​Kelma t’Alla” u nifirħu!