Għandna Għodda Ġdida biex Nibdew Studji tal-​Bibbja!

¹ Waħda mara Amerikana kienet Kattolika Rumana devota. Kienet tiddefendi lealment it-​tagħlim tal-​knisja. Saħansitra marret fuq pellegrinaġġ lejn il-​Vatikan. U xorta waħda, meta xi ħadd mix-​Xhieda taʼ Jehovah mar għandha, din aċċettat l-​offerta għal studju tal-​Bibbja fid-​dar. Għala? Għax riedet titgħallem x’tgħid il-​Bibbja, u l-​knisja tagħha ma kinitx toffri studju tal-​Bibbja fid-​djar. X’tgħallimna din l-​esperjenza? Li qatt ma nistgħu nkunu nafu min għad jaċċetta studju tal-​Bibbja bla ħlas.—Koħ. 11:6.

² Qatt żammejt lura milli tgħid lin-​nies li aħna lesti nistudjaw il-​Bibbja maʼ kulmin hu interessat? Jaf kulmin hu fil-​komunità tiegħek li aħna noffru dan is-​servizz bla ħlas? Kif nistgħu nkunu ċerti li jsiru jafu? Billi nużaw għodda ġdida! Din hija fuljett attraenti taʼ sitt paġni li jismu Tixtieq Tkun Taf Iżjed dwar il-​Bibbja? Ejja naraw sew x’fih dan il-​fuljett, sottitlu wara sottitlu.

³ “Għala Għandek Taqraha l-​Bibbja?” Ir-​raġunijiet li jagħti l-​fuljett jiġbduk ħafna. Jispjega li l-​Bibbja fiha “tagħlim mimli mħabba mingħand Alla,” li jurina kif nistgħu nersqu lejh bit-​talb għall-​għajnuna u kif nistgħu nirċievu r-​rigal taʼ ħajja taʼ dejjem. (1 Tess. 2:13) Il-​fuljett isemmi diversi “veritajiet li jagħtuna dehen spiritwali” mill-​Bibbja, bħal x’jiġri meta mmutu u għala fid-​dinja hawn daqshekk inkwiet. Jiddeskrivi “l-​prinċipji divini tal-​Bibbja” li meta jiġu applikati jġibu benefiċċji fiżiċi u jqanqlu l-​ferħ, it-​tama, u kwalitajiet oħrajn taʼ min jixtieqhom. Il-​fuljett jagħti raġuni oħra għala għandna naqraw il-​Bibbja—il-​profeziji dwar il-​futur li juruna x’hemm jistenniena dalwaqt.—Apk. 21:3, 4.

⁴ “Għajnuna biex Tifhem il-​Bibbja”: Il-​fuljett jgħid: “Ilkoll kemm aħna għandna bżonn l-​għajnuna biex nifhmu l-​Kelma t’Alla.” Imbagħad jispjega l-​metodu tagħna kif nistudjaw il-​Bibbja: “Ġeneralment, l-​aħjar mod biex tistudja l-​Bibbja hu li tistudjaha pass pass, billi tibda mit-​tagħlim bażiku.” Filwaqt li jagħmilha ċara li “l-​Bibbja hija l-​awtorità,” il-​fuljett isemmi b’mod speċifiku l-​browxer X’Jirrikjedi bħala xi ħaġa li se tgħin lill-​istudent ‘jifhem ir-​referenzi Skritturali fuq diversi suġġetti.’ Is-​sottitlu li jmiss iqajjem mistoqsija interessanti.

⁵ “Lest li Tqattaʼ Ftit Ħin Kull Ġimgħa biex Tifhem il-​Bibbja?” Il-​fuljett jispjega li l-​istudju tal-​Bibbja jistaʼ jsir f’ħin u post konvenjenti għall-​istudent, kemm fil-​privatezza taʼ daru jew darha jew anki fuq it-​telefon. Min jistaʼ jieħu sehem fid-​diskussjoni? Il-​fuljett iwieġeb: “Il-​familja tiegħek kollha. Jistgħu jieħdu sehem ukoll xi ħbieb li tkun tixtieq tistieden. Inkella jekk tippreferi, id-​diskussjoni tistaʼ ssir miegħek biss.” Kemm għandu jdum jistudja dak li jkun? Il-​fuljett jispjega: “Xi wħud iwarrbu siegħa kull ġimgħa biex jistudjaw il-​Bibbja. Jekk tistaʼ tqattaʼ iktar ħin jew m’għandekx daqshekk ħin fil-​ġimgħa, ix-​Xhieda lesti li jirranġaw biex jgħinuk.” Hemm hu l-​qofol! Aħna lesti li naġġustaw iċ-​ċirkustanzi tagħna għal kull student.

⁶ “Stedina biex Titgħallem”: Kulmin għandu kopja tal-​fuljett se jsib kupun li bih jistaʼ jitlob għall-​browxer X’Jirrikjedi jew għal żjara sabiex nispjegawlu l-​programm taʼ l-​istudju tal-​Bibbja bla ħlas. Il-​faċċata tal-​browxer X’Jirrikjedi tidher bil-​kulur. Tistaʼ tara għala dan il-​fuljett se jħeġġeġ lil iktar uħud taʼ qalb onesta biex jaċċettaw l-​għajnuna tagħna? Issa, kif nistgħu nużaw bl-​aħjar mod din l-​għodda l-​ġdida?

⁷ Lil Min Tistaʼ Toffri l-​Fuljett? Il-​fuljett jistaʼ jingħata lin-​nies direttament jew jitħalla meta ma jkunux id-​dar. Jistaʼ jitqassam minn dar għal dar, fit-​toroq, u f’territorju taʼ negozju. Offrih lin-​nies kemm jekk jaċċettaw il-​letteratura u kemm jekk jirrifjutawha. Poġġih fir-​rivisti jew f’pubblikazzjonijiet oħrajn li tqassam. Daħħlu maʼ l-​ittri li tkun qed tikteb. Offri li tibagħtu bil-​posta lil dawk li tkellimhom bit-​telefon. Dejjem żomm kopji tiegħu miegħek sabiex tqassamhom meta tkun qed tixtri, meta tuża t-​trasport pubbliku, u meta tkun qed tagħti xiehda informali. Agħtih lil kulmin jiġi jħabbat il-​bieb tad-​dar. Offrih lill-​qraba, lill-​ġirien, lil sħabek tax-​xogħol, lil sħabek taʼ l-​iskola, u lil oħrajn li taf. Stinka biex tħalli dan il-​fuljett maʼ kulmin tiltaqaʼ! Imbagħad x’jiġri?

⁸ Jekk Dak li Jkun Jaċċetta mill-​Ewwel: Xi individwi se jaċċettaw mill-​ewwel billi jgħidu li jkunu jridu studju tal-​Bibbja. Minħabba dan il-​fatt, meta tkun qed tieħu sehem fis-​servizz taʼ l-​għalqa, kun ċert li dejjem ikollok fuqek żewġ kopji tal-​browxer X’Jirrikjedi—wieħed għall-​istudent u wieħed għalik. Jekk il-​persuna tkun tixtieq, ibda l-​istudju dak il-​ħin stess. Iftaħ il-​qoxra fuq ġewwa, u aqra “Kif Għandek Tuża Dan il-​Browxer.” Imbagħad mur mill-​ewwel f’lezzjoni numru 1, u uri kif isir l-​istudju. Jistaʼ jkun iktar faċli minn hekk?

⁹ Jekk is-​Semmiegħ Tiegħek Għandu Bżonn iż-​Żmien biex Jaħseb dwar Dan: Qabel ma jgħaddi ħafna żmien, agħmel ħiltek biex terġaʼ tikkuntattjah. Meta tagħmel dan, kun ċert li jkollok il-​browxer X’Jirrikjedi miegħek. Urih il-​werrej fil-​parti taʼ ġewwa tal-​qoxra. Ħallih jagħżel is-​suġġett li jinteressah l-​iktar. Sib il-​paġna, u ibda iddiskuti l-​lezzjoni li jkun għażel.

¹⁰ Meta Tmur Lura Għand Min Tħallilu r-​Rivisti: Jekk ħallejt il-​fuljett flimkien maʼ żewġ rivisti, tistaʼ tmur lura b’dan il-​mod: “L-​aħħar darba li ġejt, ħadt pjaċir inħallilek kopja tar-​rivista It-​Torri taʼ l-​Għassa. Forsi indunajt li t-​titlu sħiħ tal-​ġurnal huwa It-​Torri taʼ l-​Għassa Jħabbar is-​Saltna taʼ Jehovah. Illum xtaqt nispjegalek x’inhi din is-​Saltna u x’se tagħmel għalik u għall-​familja tiegħek.” Imbagħad iftaħ il-​browxer X’Jirrikjedi f’lezzjoni numru 6. Billi tibda bl-​ewwel paragrafu, aqra u iddiskuti skond kemm l-​inkwilin ikollu ħin. Imbagħad agħmel arranġamenti biex terġaʼ tmur lura ġurnata oħra u tispiċċa l-​lezzjoni.

¹¹ Ara li Ma Tispiċċax bla Fuljetti: L-​indokratur tas-​servizz u l-​aħwa li jieħdu ħsieb il-​provvista tal-​letteratura għandhom iżommu provvista biżżejjed tal-​fuljett Kun Af il-​Bibbja dejjem lesta fil-​kongregazzjoni. Żomm ftit fil-​but jew fil-​basket, fil-​karozza, fejn taħdem, l-​iskola, ħdejn il-​bieb taʼ barra—kulfejn issibhom malajr. M’għandniex xi ngħidu, għandek iġġorr ftit fil-​basket li tuża għall-​ministeru għal meta tiltaqaʼ maʼ xi ħadd li tistaʼ titkellem miegħu dwar il-​Bibbja.

¹² Jalla Jehovah Ibierek l-​Isforzi Tagħna: Mira li kull Kristjan jixtieq jilħaq hi li jgħallem il-​verità lil xi ħadd ieħor. (Mt. 28:19, 20) Qiegħed tikkonduċi studju tal-​Bibbja fid-​dar maʼ xi ħadd bħalissa? Jekk qed tagħmel dan, tistaʼ ssib il-​ħin għal studju ieħor fl-​iskeda tal-​ġimgħa tiegħek? Jekk m’intix qed tikkonduċi studju bħalissa, żgur li tixtieq li kont qed tagħmel hekk. Itlob lil Jehovah biex ibierek l-​isforzi tiegħek ħalli ssib lil xi ħadd maʼ min tistudja. Imbagħad aħdem fi qbil maʼ dak li titlob.—1 Ġw. 5:14, 15.

¹³ Għandna għodda ġdida biex nibdew l-​istudji tal-​Bibbja! Sir af sew dak li tgħid. Qassam kopji tagħha kemm tiflaħ. Agħmel dak kollu li tistaʼ biex ‘tagħmel il-​ġid, tistagħna b’opri tajba, tkun ġeneruż u taqsam maʼ oħrajn’ dak li tgħallimt dwar il-​Kelma t’Alla.—1 Tim. 6:18.

[Kaxxa f’paġna 4]

OPPORTUNITAJIET BIEX INQASSMU L-​FULJETT

◼ Fil-​konversazzjonijiet taʼ kuljum

◼ Meta xi ħadd jaċċetta l-​letteratura tagħna

◼ Meta ma jkun hemm ħadd id-​dar

◼ Meta nagħmlu ż-​żjajjar lura

◼ Meta niltaqgħu maʼ xi ħadd waqt li nagħtu xiehda fit-​toroq

◼ Meta nkunu qed nagħtu xiehda f’territorju taʼ negozju

◼ Meta nkunu qed nagħtu xiehda informali

◼ Meta niktbu l-​ittri

◼ Meta nużaw it-​trasport pubbliku

◼ Meta xi ħadd jiġi jħabbtilna l-​bieb tad-​dar

◼ Meta nkunu qed nitkellmu mal-​qraba, mal-​ġirien, maʼ sħabna tax-​xogħol, maʼ sħabna taʼ l-​iskola, u maʼ nies oħra li nafu