Ippriedka u Agħti Xiehda bir-​Reqqa

¹ Bħala “mexxej u kmandant,” Ġesù ħejja lid-​dixxipli tiegħu għax-​xogħol vast taʼ l-​ippridkar li kien hemm quddiemhom. (Is. 55:​4, Karm Żammit; Lq. 10:​1-​12; Atti 1:8) L-​appostlu Pietru ddeskriva l-​inkarigu li tahom Ġesù b’dan il-​kliem: “Lilna ordnalna biex inxandruh lill-​poplu u nixhdu [“bir-​reqqa,” NW] li dan hu dak li Alla għamlu mħallef tal-​ħajjin u tal-​mejtin.” (Atti 10:42) Li wieħed jagħti xiehda bir-​reqqa x’jinvolvi?

² Nistgħu nitgħallmu ħafna billi nikkunsidraw l-​eżempju taʼ l-​appostlu Pawlu. Meta ltaqaʼ max-​xjuħ mill-​kongregazzjoni taʼ Efesu, hu fakkarhom: “Qatt ma bżajt nurikom dak li hu taʼ fejda għalikom u ngħallimkom kemm fil-​beraħ u kemm fid-​djar, u [“tajt xiehda bir-​reqqa,” “NW”] lil-​Lhud u lill-​Griegi li għandhom jindmu u jduru lejn Alla u jemmnu fil-​Mulej tagħna Ġesù.” Minkejja li ffaċċja diffikultajiet hu stess, Pawlu fittex li jilħaq kemm jistaʼ jkun nies bl-​aħbar tajba. Ma kienx sempliċement kuntent li jaqsam veritajiet bażiċi mas-​semmiegħa tiegħu, imma ried jurihom ‘dak kollu li Alla ried minnhom.’ Sabiex ikun jistaʼ jagħmel dan, hu kien lest li jagħmel ħiltu kollha u jagħmel sagrifiċċji. Hu kompla jgħid: “Iżda jien lil ħajti xejn ma nqisha għażiża għalija jekk mhux biex intemm il-​mixja tiegħi u l-​ministeru li ħadt mingħand il-​Mulej Ġesù, jiġifieri, li nagħti xhieda [“bir-​reqqa,” “NW”] taʼ l-​Evanġelju tal-​grazzja taʼ Alla.”​—Korsiv tagħna; Atti 20:​20, 21, 24, 27.

³ Kif nistgħu nimitaw l-​eżempju taʼ Pawlu llum? (1 Kor. 11:1) Dan nistgħu nagħmluh billi nfittxu lil dawk l-​individwi u familji li jistħoqqilhom, saħansitra meta aħna personalment inkunu għaddejjin minn diffikultajiet. Ukoll, irridu nagħmlu l-​aħjar li nistgħu biex nilħqu nies minn kull grupp etniku u lingwa bl-​aħbar it-​tajba, u bir-​reqqa kollha nikkultivaw l-​interess li nsibu. (Mt. 10:​12, 13) Dan jirrikjedi ħin, sforz, u mħabba għan-​nies.

⁴ Tistaʼ Taqdi Bħala Pijunier Awżiljarju? Ix-​xhur taʼ Marzu u April jistgħu jkunu opportunità mill-​aħjar għalik biex tagħti xiehda bir-​reqqa billi taqdi bħala pijunier awżiljarju. Kemm kien taʼ inkuraġġiment is-​sena l-​oħra li rajna tant uħud jagħmlu sforz speċjali biex ikunu pijunieri awżiljarji!

⁵ Oħt taʼ 80 sena b’ħafna problemi taʼ saħħa għamlet il-​qalb permezz taʼ l-​inkuraġġiment li pprovdiet l-​organizzazzjoni taʼ Jehovah. Hi kitbet: “Dan reġaʼ kebbes ix-​xrara li kelli f’qalbi għal ħafna żmien, u ġagħalni nħossni li kelli naqdi bħala pijuniera awżiljarja, imqar għal darb’oħra biss.” Hi ddeċidiet biex tagħmlu f’Marzu. “L-​ewwel ħaġa li għamilt,” qalet hi, “kienet li poġġejt bil-​qiegħda u għaddejt in-​nefqa. Tkellimt maʼ binti għax kien se jkolli bżonn l-​għajnuna tagħha. Hi ssorprendietni x’ħin ġabet applikazzjoni għaliha stess.” Matul ix-​xahar, l-​oħt anzjana qattgħet 52 siegħa fil-​ministeru. “Ħafna drabi tlabt lil Jehovah biex jerġaʼ jagħtini s-​saħħa meta ħassejtni qed negħja. Fl-​aħħar tax-​xahar, kont ferħana ħafna u sodisfatta, u rringrazzjajt lil Jehovah ħafna drabi talli għenni. Nixtieq nerġaʼ nagħmlu darb’oħra.” L-​esperjenza taʼ ferħ tagħha tistaʼ tinkuraġġixxi lil oħrajn li jixtiequ ħafna jaqdu bħala pijunieri awżiljarji minkejja l-​problemi serji taʼ saħħa.

⁶ Wieħed ħu li waqaf mix-​xogħol bla mistenni, ħa vantaġġ mis-​sitwazzjoni biex jagħmel ix-​xogħol taʼ pijunier awżiljarju. Hekk kif gerbeb ix-​xahar, hu kompla jimtela biż-​żelu għax-​xogħol taʼ l-​ippridkar, u sa l-​aħħar tax-​xahar, beda studju tal-​Bibbja ġdid. Hu u jaħseb dwar din l-​esperjenza, hu qal: “X’xahar kien dak!” Kemm kien ferħan li kellu d-​direzzjoni u l-​għajnuna taʼ Jehovah! Iva, Jehovah sawwab barka kbira fuq dan il-​ħu għall-​isforz kbir li għamel fil-​ministeru, u se jagħmel l-​istess miegħek ukoll.​—Mal. 3:​10.

⁷ Għal ħafna pubblikaturi, m’huwiex faċli li jaqdu bħala pijunieri awżiljarji. Safrattant, minkejja responsabbiltajiet sekulari u tal-​familja kif ukoll sfidi persunali, għadd sabiħ t’aħwa rġiel u nisa kienu kapaċi jagħmluh dan. Li nagħtu xiehda bir-​reqqa ħafna drabi jinvolvi li nissagrifikaw ftit mill-​ħin u l-​enerġija prezzjuża tagħna, imma l-​barkiet huma bil-​wisq akbar.​—Prov. 10:22.

⁸ Ix-​xhur taʼ Marzu u April huma żminijiet ideali biex nagħmlu x-​xogħol taʼ pijunier. Hemm ħames Sibtijiet u Ħdud matul Marzu. Jekk nieħdu vantaġġ minn dawn u nużaw il-​ħin taʼ fil-​għaxija tajjeb, anki xi wħud li jaħdmu full-time jkunu jistgħu jaqdu bħala pijunieri awżiljarji. Ukoll, forsi tkun tistaʼ tieħu vantaġġ mill-​vaganzi matul ix-​xahar t’April. Xi wħud jistaʼ ma jkollhomx skola jew xogħol f’ċerti ġranet, u b’hekk dan jgħinhom biex ilaħħqu mal-​ħtieġa tal-​50 siegħa. Sabiex tippjana l-​50 siegħa fil-​ministeru waqt ix-​xahar taʼ Marzu jew April, tistaʼ tuża waħda mill-​iskedi suġġeriti għall-​pijunieri awżiljarji li hawn inklużi maʼ dan l-​artiklu? Tkellem dwar l-​iskeda tiegħek m’oħrajn; żgur li xi wħud se jkunu inkuraġġiti biex jissieħbu miegħek fil-​ministeru. Jekk ma tistax tkun pijunier awżiljarju, agħmel mira speċjali għal dawn ix-​xhur, u għin lil dawk li se jkunu pijunieri. Ippjana minn issa biex iżżid is-​servizz tiegħek matul ix-​xhur taʼ Marzu u April.

⁹ Uri Apprezzament għat-​Tifkira: Kull sena matul l-​istaġun tat-​Tifkira tal-​Mewt taʼ Ġesù, l-​apprezzament għas-​sagrifiċċju tal-​fidwa qanqal lil eluf t’aħwa biex ‘jixtru ż-​żmien’ ħalli jaqdu bħala pijunieri awżiljarji. (Efes. 5:​15, 16, NW) F’Malta, tliet snin ilu kien hemm 130 pijunier awżiljarju f’April. Ejja nagħmlu mira biex nipprovaw inżidu dak in-​numru u nagħmluha l-​aħjar sena li qatt kellna. Iż-​żmien tat-​Tifkira huwa opportunità oħra mill-​aħjar biex nuru l-​apprezzament sinċier tagħna għas-​sagrifiċċju taʼ fidwa taʼ Kristu billi nżidu fl-​attività tal-​ministeru taʼ l-​għalqa.

¹⁰ Hekk kif joqrob is-​16 t’April, aħseb dwar xi tfisser it-​Tifkira għalik. Ikkunsidra l-​avvenimenti li wasslu għall-​mewt taʼ Kristu u l-​ħsibijiet li taqqlulu moħħu u qalbu. Irrifletti wkoll fuq il-​ferħ li Ġesù kellu quddiemu u kif dan għenu biex jissaporti trattament ħażin bħal dan. Aħseb dwar il-​pożizzjoni tiegħu bħalissa bħala Kap tal-​kongregazzjoni, filwaqt li jindokra x-​xogħol taʼ l-​ippridkar u taʼ li nagħmlu dixxipli. (1 Kor. 11:3; Lhud 12:2; Apk. 14:​14-​16) Imbagħad uri l-​apprezzament tiegħek għal dak kollu li għamel Kristu billi tieħu sehem bis-​sħiħ fix-​xogħol taʼ l-​ippridkar skond ma jippermettulek iċ-​ċirkustanzi.

¹¹ Inkuraġġixxi lil Oħrajn biex Jagħtu Xiehda bir-​Reqqa: Billi jieħdu sehem fis-​servizz taʼ pijunier awżiljarju, l-​anzjani u l-​qaddejja ministerjali qegħdin f’pożizzjoni tajba biex jinkuraġġixxu lil oħrajn. Meta jaħdmu mal-​pubblikaturi fil-​ministeru taʼ l-​għalqa u meta jagħmlu żjajjar pastorali, huma nfushom għandhom opportunità mill-​aħjar biex jgħinu lil oħrajn sabiex ikollhom sehem sħiħ f’din l-​attività speċjali. Jalla lkoll kemm aħna nitolbu dwar dan, sabiex b’hekk insaħħu l-​isforzi magħqudin tagħna biex nagħtu xiehda bir-​reqqa.

¹² Filwaqt li l-​anzjani u l-​qaddejja ministerjali kollha se jikkooperaw maʼ l-​arranġamenti tal-​kongregazzjoni għal iktar attività matul ix-​xhur taʼ Marzu u April, l-​indokratur tas-​servizz, b’mod partikulari, għandu jkun konċernat biex jikkoordina l-​arranġamenti għax-​xogħol taʼ l-​evanġelizzar. Hu għandu jorganizza l-​postijiet, il-​ġranet, u l-​ħinijiet għas-​servizz taʼ l-​għalqa b’tali mod li jkunu konvenjenti għall-​maġġuranza tal-​pubblikaturi u jara li jsiru avviżi dwarhom regolarment. Jistgħu jsiru arranġamenti biex jiltaqgħu f’ħinijiet differenti tal-​ġurnata sabiex ikun hemm opportunità għal kulħadd fil-​kongregazzjoni biex jieħu sehem f’aspetti differenti tax-​xandir. Dawn jistgħu jinkludu li jaħdmu territorju tan-​negozju, jagħtu xiehda fit-​toroq, imorru minn dar għal dar, jagħmlu żjajjar lura, u jagħtu xiehda bittelefon. Ukoll, il-​ħu għandu jirranġa biex ikun hemm iktar letteratura, rivisti, u territorju matul dawn ix-​xhur.

¹³ L-​offerta għal Marzu se tkun il-​ktieb Għarfien, bil-​mira li jinbdew studji tal-​Bibbja. Suġġerimenti tajbin dwar kif jistaʼ jiġi offrut il-​ktieb Għarfien dehru fl-​insert tal-​Ministeru tas-​Saltna taʼ Jannar, 2002. Ir-​rivisti It-​Torri taʼ l-​Għassa u Stenbaħ! se jkunu l-​offerta f’April. Ipprova uża l-​preżentazzjonijiet li jkun hemm fis-​sezzjoni “X’Nistgħu Ngħidu dwar ir-​Rivisti.” Kulħadd għandu jieħu l-​ħin biex jipprepara tajjeb sabiex tingħata xiehda bir-​reqqa.

¹⁴ Kemm aħna mberkin li naħdmu taħt id-​direzzjoni tal-​Kap tal-​kongregazzjoni, Kristu Ġesù, u għandna l-​privileġġ li nieħdu sehem fix-​xandir taʼ l-​aħbar tajba m’oħrajn! Hekk kif joqorbu x-​xhur taʼ Marzu u April, ejja nerġgħu nistinkaw biex nagħmluhom l-​aħjar xhur li qatt kellna, waqt li nobdu l-​kmand taʼ Ġesù biex nippridkaw u nagħtu xiehda bir-​reqqa.

[Kaxxa f’paġna 4]

Modi Differenti Kif Tagħmel Pijunier Awżiljarju f’Marzu u April 2003

Ġurnata Sigħat

It-​Tnejn 1 2 ​— —​ 2 ​—

It-​Tlieta 1 ​— 3 —​ ​— —​

L-​Erbgħa 1 2 ​— 5 —​ ​—

Il-​Ħamis 1 ​— 3 —​ ​— —​

Il-​Ġimgħa 1 2 ​— —​ ​— —​

Is-​Sibt 5 4 3 5 6 7

Il-​Ħadd 2 2 3 2 2 3

March 56 56 54 55 50 50

April 50 50 51 53 ​— —​

Hemm xi skeda minn dawn li tgħodd għalik?