‘Agħmel il-​Wisaʼ għal Dan’

¹ Darba, waqt li Ġesù kien qiegħed jitkellem mad-​dixxipli tiegħu dwar iż-​żwieġ, hu rrefera għall-​istat li wieħed ma jkunx miżżewweġ bħala “rigal.” Imbagħad hu qal: “Ħalli min jistaʼ jagħmel il-​wisaʼ għal dan jagħmilha.” (Mt. 19:​10-​12, NW) Xi snin wara, l-​appostlu Pawlu kiteb dwar il-​benefiċċji taʼ li wieħed ma jkunx miżżewweġ u inkuraġġixxa lil oħrajn biex isegwu l-​eżempju tiegħu u jibqgħu ma jiżżewġux. (1 Kor. 7:​7, 38, NW) Ħafna llum ‘għamlu l-​wisaʼ’ biex ma jiżżewġux u qegħdin igawdu mill-​benefiċċji taʼ dan. X’inhuma xi ftit minn dawn il-​benefiċċji?

² Servizz “bla Tixrid taʼ Moħħ”: Pawlu fehem li l-​fatt li baqaʼ ma żżewwiġx tah l-​opportunità biex jaqdi lil Jehovah “bla tixrid taʼ moħħ,” jiġifieri, ma kien hemm xejn xi jfixklu. L-​istess illum, ħu li għadu waħdu jistaʼ japplika għall-​Iskola tat-​Taħriġ Ministerjali, u ġeneralment xi ħadd li għadu waħdu għandu iktar libertà biex jaqdi bħala pijunier, jitgħallem xi lingwa oħra, imur fejn il-​bżonn huwa akbar, jaqdi f’Betel, jew ikun disponibbli għal xi privileġġi speċjali oħra fis-​servizz. Għandu mnejn ikollu iktar ħin u opportunitajiet biex jagħmel studju persunali u jimmedita fil-​fond, u biex jitkellem maʼ Jehovah b’talb mill-​qalb. Normalment il-​persuna li mhix miżżewġa għandha iktar ċans li toffri lilha nfisha biex tgħin lil oħrajn. Dawn l-​attivitajiet kollha huma “għall-​ġid” taʼ dak li jkun.​—1 Kor. 7:​32-​35; Atti 20:35.

³ Dan is-​servizz lil Alla bla tfixkil iġib premjijiet bla tarf. Wara 27 sena fil-​Kenja, oħt li m’hijiex miżżewġa kitbet: “Kelli bosta ħbieb u ħafna xogħol! Konna nagħmlu ħafna affarijiet flimkien [u] konna nżuru lil xulxin. .  . . Stajt nuża dak il-​ftit iktar ħin u libertà li kelli peress li ma kontx miżżewġa biex nibqaʼ attiva fil-​ministeru, u dan ġabli ferħ kbir.” Hi kompliet: “Matul is-​snin ir-​relazzjoni tiegħi maʼ Jehovah saret iktar profonda.”

⁴ Kif Tagħmel il-​Wisaʼ għal Dan: Ġesù qal li l-​motiv biex wieħed jikkultiva r-​rigal taʼ li ma jkunx miżżewweġ għandu jkun “minħabba s-​Saltna tas-​Smewwiet.” (Mt. 19:12) Bħal kull rigal ieħor, l-​istat taʼ meta wieħed ma jkunx miżżewweġ għandu jintuża b’mod għaqli sabiex iġib ferħ u benefiċċji. Billi użaw tajjeb l-​opportunitajiet li ġewhom għax ma kinux miżżewġin u billi straħu fuq Jehovah għall-​għerf u s-​saħħa, ħafna wħud mhux miżżewġin waslu biex jaċċettaw il-​valur taʼ li jagħmlu wisaʼ għal dan ir-​rigal.