Iż-​Żjajjar Lura Jwasslu għal Studji tal-​Bibbja

1. Għala huma importanti ż-​żjajjar lura?

¹ Ġesù kkmanda lid-​dixxipli tiegħu mhux biss biex jippridkaw imma wkoll biex ‘jagħmlu dixxipli u jgħallmuhom.’ (Mt. 28:​19, 20) Predikatur jipproklama, iżda għalliem jagħmel iktar minn dan. Hu jistruwixxi, jispjega, u jagħti l-​provi. Mod wieħed kif ngħallmu lil oħrajn huwa billi nagħmlu ż-​żjajjar lura lil dawk l-​uħud interessati b’mira li nibdew studju tal-​Bibbja magħhom.

2. Għand min għandna nerġgħu mmorru?

² Lil min għandek iżżur lura? Kun ċert li tmur lura għand dawk kollha li aċċettaw il-​letteratura jew li mqar urew nitfa interess fl-​aħbar tajba. Jekk issib interess waqt li tkun qiegħed tagħti xiehda f’post pubbliku, ipprova ikseb l-​indirizz taʼ dik il-​persuna jew in-​numru tat-​telefon biex b’hekk tkun tistaʼ tikkultiva l-​interess. Kun ottimist dwar li tibda studji tal-​Bibbja. Ibqaʼ fittex lil dawk li lesti jaċċettaw li jibdew studju tal-​Bibbja, u wisq probabbli li se ssibhom.—Mt. 10:11.

3, 4. X’inhu involut biex tagħmel żjajjar lura effettivi?

³ Uri Interess Persunali: Il-​preparazzjoni għal żjara lura effettiva tibda mill-​ewwel darba li tkellem lil dak li jkun. Evanġelizzaturi li jirnexxu, jieħdu nota taʼ dak li jinteressa lill-​inkwilin, u jużaw dak bħala bażi għal iktar diskussjonijiet. Xi wħud isibuha taʼ għajnuna li jistaqsu mistoqsija fl-​aħħar taż-​żjara biex b’hekk iqanqlu l-​interess taʼ l-​inkwilin għal żjara oħra. L-​interess sinċier tagħna fin-​nies iġagħalna nibqgħu naħsbu dwarhom anki wara li nkunu tlaqna minn fuq il-​bieb, u jqanqalna biex nerġgħu mmorru għandhom mingħajr dewmien. Jekk ikun possibbli, ipprova erġaʼ mur meta jkun għad hemm l-​interess—forsi anki ġurnata jew tnejn wara.

⁴ Meta tkun qed tagħmel xi żjara lura, fittex li tibni fuq id-​diskussjoni taʼ qabel. Agħmilha l-​mira tiegħek biex taqsam minn taʼ l-​inqas punt Skritturali inkuraġġanti kull darba, u kun lest li tismaʼ. Sir af aħjar lill-​inkwilin. Imbagħad fid-​drabi l-​oħra meta terġaʼ tmur, aqsam il-​veritajiet mill-​Kelma t’Alla li l-​iktar jikkonċernawh.

5. X’metodu sempliċi jistaʼ jintuża biex jinbdew studji tal-​Bibbja?

⁵ Kun Konxju mill-​Opportunità li Tibda Studju tal-​Bibbja: Agħmel iż-​żjajjar lura bil-​mira li tibda studju tal-​Bibbja. Dan kif jistaʼ jsir? Semmi li tixtieq taqsam punt interessanti, u uri paragrafu mill-​ktieb Għarfien jew il-​browxer X’Jirrikjedi li taħseb li jinteressa lill-​persuna. Aqra l-​paragrafu, ikkunsidra l-​mistoqsijiet, u iddiskuti skrittura jew tnejn li huma ċitati. Dan jistaʼ jsir f’ħames jew għaxar minuti fuq l-​għatba tal-​bieb stess. Ikkonkludi billi tqajjem mistoqsija oħra u agħmel arranġamenti biex darb’oħra tkompli d-​diskussjoni.

6. Kif nistgħu nuru li napprezzaw l-​importanza taʼ li nagħmlu ż-​żjajjar lura?

⁶ Li nikkultivaw l-​interess kollu li nsibu huwa aspett vitali tal-​ministeru tagħna. Għalhekk, warrab ħin fl-​iskeda tiegħek tal-​ġimgħa biex tagħmel iż-​żjajjar lura. Jekk tagħmel hekk, il-​ministeru tiegħek se jkun iktar effettiv u se jġiblek ferħ veru.