Il-Kelma t’Alla Hija Verità
1. Il-Bibbja liema informazzjoni importanti fiha?
1 “Is-sustanza taʼ kelmtek hija verità,” kiteb is-salmista. (Salm 119:160, NW). Permezz tal-Kelma ispirata tiegħu, Jehovah jagħtina tweġibiet sodisfaċenti għall-iktar mistoqsijiet importanti fil-ħajja. Hu joffri faraġ u tama għal dawk li jkunu għaddejjin minn xi għawġ. Jurina wkoll kif nistgħu nersqu qrib lejh. “Meta titgħallem il-verità mill-Bibbja tkun qisek qed toħroġ minn post mudlam ħafna u ikrah u tidħol f’kamra mimlija dawl ċar, qawwi, u sabiħ,” tgħid waħda mara mimlija apprezzament. Qiegħed int tħabrek biex taqsam il-verità mill-Kelma t’Alla f’kull opportunità?
2. Il-Bibbja kif ittejjeb ħajjet in-nies?
2 Għandha Qawwa li Tbiddel u Tappella għal Kulħadd: Il-verità tal-Bibbja għandha s-saħħa li tmiss il-qlub u li tbiddel ħajjet in-nies. (Lhud 4:12) Mara żagħżugħa jisimha Rosa involviet ruħha fil-prostituzzjoni, kif ukoll fl-abbuż tad-droga u l-alkoħol. “Ġurnata waħda, meta kont fi stat taʼ disprament kbir,” tgħid hi, “koppja Xhieda miżżewġa kellmuni dwar kif il-Bibbja tistaʼ tgħinna nsolvu l-problemi tagħna. Jien bdejt nistudja l-Kelma t’Alla, u sibtha interessanti għall-aħħar. Fi żmien xahar kont kapaċi nerġaʼ nibda paġna ġdida u nadifa f’ħajti. Issa li kelli skop f’ħajti, ma kellix bżonn iktar inserraħ fuq l-alkoħol jew id-drogi. U peress li minn qalbi xtaqt inkun ħabiba maʼ Jehovah, kont determinata li ngħix mal-livelli tiegħu. Li kieku ma kienx għall-għerf prattiku tal-Kelma t’Alla, jien ċerta li kieku s’issa kont inkun neħħejt ħajti b’idejja.”—Salm 119:92.
3. Għala m’għandniex inżommu lura milli naqsmu l-messaġġ tal-Bibbja maʼ oħrajn?
3 Kuntrarju għal ħafna kotba taʼ llum, il-Bibbja tappella għal nies “minn kull ġens u tribù, minn kull poplu u lsien.” (Apk. 7:9) Ir-rieda t’Alla hija li “l-bnedmin kollha jsalvaw u jaslu biex jagħrfu l-verità.” (1 Tim. 2:4) Għalhekk, m’għandna qatt naħsbu li persuna m’hijiex se taċċetta l-aħbar tajba sempliċement minħabba l-ambjent li tkun ġejja minnu. Minflok, meta jkun possibbli aqsam il-messaġġ tas-Saltna maʼ kulħadd, u agħmel dan direttament minn fuq il-Bibbja.
4. Kif nistgħu nużaw il-Bibbja meta nagħtu xiehda?
4 Enfasizza l-Iskritturi: Hemm ħafna opportunitajiet biex tuża l-Bibbja fil-ministeru. Meta toffri r-rivisti, ipprova inkludi l-iskrittura li jkun hemm fil-preżentazzjoni suġġerita. Meta jużaw l-offerta taʼ letteratura għax-xahar, xi wħud isibuha effettiva jekk fl-introduzzjoni tagħhom jaqraw xi skrittura li jkunu għażlu bir-reqqa minn qabel. Kulmeta tagħmel iż-żjajjar lura, uri xi skrittura jew tnejn biex tgħin lill-inkwilin jikseb l-għarfien eżatt bil-mod il-mod. Meta tikkonduċi studju tal-Bibbja, iffoka d-diskussjoni fuq l-iskritturi prinċipali. Meta ma tkunx qiegħed fil-ministeru, żomm Bibbja fuqek biex tużaha meta tiġi xi opportunità biex tagħti xiehda informali.—2 Tim. 2:15.
5. Għala għandna nħabirku biex nużaw il-Bibbja fil-ministeru tagħna?
5 Jalla ngħinu lil oħrajn jibbenefikaw mill-qawwa li tqanqal li għandha l-Kelma t’Alla mimlija verità billi nużaw il-Bibbja f’kull opportunità xierqa fil-ministeru tagħna.—1 Tess. 2:13.