“Il-​Kelma t’Alla Hi . . . Qawwija”

¹ “Il-​kelma taʼ Alla hi ħajja u qawwija,” kiteb l-​appostlu Pawlu. (Lhud 4:12) X’ried ifisser b’dan il-​kliem? Il-​Kelma t’Alla, jew il-​messaġġ, li jinsab fil-​Bibbja jistaʼ jħalli effett qawwi fuq in-​nies. L-​għerf li fiha l-​Bibbja għandu l-​qawwa li jbiddel il-​ħajja taʼ dak li jkun għall-​aħjar. Is-​serħan u t-​tama li toffri jressqu lin-​nies lejn id-​Donatur tal-​ħajja, Alla Jehovah. Il-​messaġġ tagħha jistaʼ jqabbad lil dawk taʼ qalb onestà t-​triq li twassal għall-​ħajja taʼ dejjem. Madankollu, biex naraw lil dawn l-​uħud jiġu effettwati b’dan il-​mod, irridu nużaw il-​Bibbja meta nagħtu xiehda lil oħrajn.

² Aqra Skrittura f’Kull Ċans li Ssib: Milli jidher ħafna pubblikaturi m’għadx għandhom id-​drawwa li jużaw il-​Bibbja fuq il-​bibien. Int hekk ġralek? Peress li ħafna nies milli jidher m’għandhomx ċans għal konversazzjoni fit-​tul, forsi int waqajt fir-​rutina li toffri biss il-​letteratura jew tikkwota xi skrittura fi kliemek. Inħeġġu lill-​pubblikaturi kollha biex jagħmlu sforz sinċier sabiex jaqraw minn taʼ l-​inqas vers wieħed mill-​Bibbja meta jkunu qed jippreżentaw l-​aħbar tajba. B’dan il-​mod il-​persuna tkun tistaʼ tara li l-​messaġġ tagħna jinstab verament fil-​Bibbja.

³ Għalkemm ftit huma dawk li jaqraw il-​Bibbja regolarment, ġeneralment xorta waħda jistmawha. Anki nies li jkunu mħabbtin bix-​xogħol ikunu lesti li jwarrbu minuta jew tnejn sabiex jisimgħu messaġġ jinqara direttament mill-​Kelma t’Alla. Meta skrittura addattata tinqara b’entużjażmu u tiġi spjegata fil-​qosor, il-​qawwa tal-​Kelma taʼ Jehovah tistaʼ teffettwa lis-​semmiegħ b’mod pożittiv. Imma kif tistaʼ tgħaqqad l-​introduzzjoni tiegħek mal-​qari taʼ vers mill-​Bibbja?

⁴ Ipprova Agħmel Dan fix-​Xogħol tat-​Tqassim tar-​Rivisti: Indokratur li jivvjaġġa juża l-​Iskrittura b’mod effettiv meta jieħu sehem fix-​xogħol tat-​tqassim tar-​rivisti. Hu jġorr Bibbja żgħira fil-​but. Wara li jippreżenta r-​rivisti u jispjega fil-​qosor fuq xiex ikun ċertu artiklu, malajr malajr jiftħilhom il-​Bibbja u jaqralhom vers li jkollu x’jaqsam maʼ l-​artiklu. Dan jistaʼ jsir billi int sempliċement tistaqsi, “X’taħseb dwar din il-​wegħda inkuraġġanti?” u mbagħad tkompli billi taqra l-​iskrittura li tkun għażilt.

⁵ Agħmilha mira li taqsam vers jew tnejn mill-​Bibbja maʼ kull semmiegħ li ssib. Il-​qawwa li tqanqal li għandha tistaʼ tiftaħ it-​triq għal iktar nies biex jinġibdu lejn Alla.​—Ġw. 6:​44.