Kun Persważiv fit-Tagħlim Tiegħek
1. Spiss x’jinvolvi l-użu effettiv tal-Kelma t’Alla fil-ministeru?
1 Ministri effettivi, bħall-appostlu Pawlu, jifhmu illi li “timmaniġġa sew il-kelma tal-verità” jinvolvi iktar milli sempliċement tikkwota mill-Iskrittura Mqaddsa. (2 Tim. 2:15) Meta nużaw il-Kelma t’Alla, kif nistgħu nużaw il-‘persważjoni’ fit-tagħlim tagħna?—Atti 28:23.
2. Kif nistgħu nkabbru l-apprezzament għall-Kelma t’Alla?
2 Ħalli l-Kelma t’Alla Titkellem: L-ewwel, idderieġi l-attenzjoni lejn il-Bibbja b’tali mod li jqanqal rispett għall-għerf divin li fiha. Il-fiduċja tagħna fil-Kelma t’Alla tistaʼ tqanqal lis-semmiegħ tagħna biex joqgħod attent sew għall-qari taʼ skrittura. (Ebr. 4:12) Nistgħu ngħidu sempliċement: “Sibt li hu taʼ benefiċċju li nara kif jaħsibha Alla fuq din il-kwistjoni. Innota x’tgħid il-Kelma tiegħu.” Kull meta jkun possibbli, ħalli l-Kelma t’Alla titkellem billi taqra minnha direttament.
3. Wara li tinqara skrittura, x’nistgħu nagħmlu biex ngħinu lis-semmiegħ tagħna jifhem it-tifsir tagħha?
3 It-tieni, spjega l-iskrittura li tkun qed tintuża. Ħafna nies isibuha diffiċli biex jifhmu vers l-ewwel darba li jinqara. Spiss ikollna nispjegaw kif l-iskrittura għandha x’taqsam mas-suġġett. (Lq. 24:26, 27) Enfasizza l-punti prinċipali. Tistaʼ tintuża mistoqsija biex tikkonferma li l-punt ġie mifhum sew.—Prov. 20:5; Atti 8:30.
4. Liema pass tal-aħħar hu neċessarju biex inkunu persważivi fit-tagħlim tagħna?
4 Irraġuna fuq l-Iskrittura: It-tielet, stinka biex tilħaq il-moħħ u l-qalb. Għin lill-inkwilin jara kif il-vers japplika għalih personalment. L-irraġunar fuq l-Iskrittura jistaʼ jipperswadi lil persuna biex tbiddel il-mod taʼ ħsib tagħha. (Atti 17:2-4; 19:8) Pereżempju, wara li jinqara Salm 83:18 nistgħu nirraġunaw dwar kemm hu fundamentali li nitgħallmu isem xi ħadd biex niżviluppaw relazzjoni persunali miegħu. Imbagħad forsi tistaʼ tistaqsi, “Taħseb li l-fatt li taf l-isem t’Alla se jagħmel it-talb tiegħek iktar sinifikanti?” Li torbot l-iskrittura mal-ħajja persunali tal-inkwilin b’dan il-mod juri l-valur prattiku tagħha. Tagħlim persważiv bħal dan mill-Kelma t’Alla jressaq lil dawk li għandhom attitudni xierqa biex iqimu lill-Alla l-veru u ħaj, Ġeħova.—Ġer. 10:10.