Xogħol li Jġib Serħan
1 Il-messaġġ tal-Bibbja jserraħ lil dawk kollha li jaċċettawh u japplikawh f’ħajjithom. (Salm 19:8, 9 [19:7, 8 New World Translation]) Dan jgħinhom jeħilsu mit-tagħlim falz u mill-prattiċi li huma taʼ ħsara u jagħtihom tama għall-futur li jistgħu joqogħdu fuqha. Madankollu, dawk li jirċievu l-aħbar tajba m’humiex l-uniċi li jibbenefikaw minnha. Dawk li joffru serħan lil oħrajn billi jaqsmu magħhom il-veritajiet Bibliċi jħossu s-serħan huma wkoll.—Prov. 11:25.
2 Imsaħħin bil-Ministeru: Ġesù qal li min jaċċetta l-madmad biex ikun dixxiplu Kristjan, li jinkludi x-xogħol taʼ li jippriedka u jagħmel dixxipli, kien se ‘jsib il-mistrieħ għal ruħu.’ (Mt. 11:29) Hu nnifsu ħassu msaħħaħ meta ta xiehda lil oħrajn. Kien bħal ikel għalih. (Ġw. 4:34) Meta bagħat lis-70 dixxiplu biex jippridkaw, huma ferħu hekk kif raw lil Jehovah jappoġġa l-isforzi tagħhom.—Lq. 10:17.
3 Bl-istess mod, ħafna Kristjani llum jissaħħu meta jieħdu sehem fix-xogħol taʼ l-ippridkar. Waħda oħt qalet: “II-ministeru jipprovdi serħan għaliex jagħtini fuqiex niffoka u skop f’ħajti. Il-problemi persunali u ttensjoni taʼ kuljum ma jibqgħux daqshekk importanti meta nieħu sehem fis-servizz.” Oħt żeluża oħra qalet: “Il-ministeru . . . jfakkarni kuljum li Jehovah huwa reali, u jagħtini s-sliem u ammont taʼ ferħ ġewwieni li ma jistaʼ jinkiseb bl-ebda mod ieħor.” Kemm aħna onorati li nistgħu nkunu “ħaddiema maʼ Alla”!—1 Kor. 3:9.
4 Il-Madmad taʼ Ġesù Huwa Ħelu: Waqt li l-Kristjani jiġu mħeġġin biex ‘jitħabtu,’ Ġesù ma jeħtieġx minna iktar minn kemm nifilħu nagħtu. (Lq. 13:24) Tabilħaqq, hu jistidinna bl-imħabba kollha biex ‘nieħdu fuqna l-madmad tiegħu,’ jew skond in-nota taʼ taħt fin-New World Translation ‘nidħlu taħt il-madmad miegħu.’ (Mt. 11:29) Dawk li jridu jissieltu maʼ ċirkustanzi diffiċli jistgħu jkunu fiduċjużi li s-servizz li jagħtu b’ruħhom kollha, anki jekk hu limitat, jogħġob ħafna lil Alla.—Mk. 14:6-8; Kol. 3:23.
5 Kemm huwa taʼ serħan li aħna naqdu Alla li japprezza dak kollu li nagħmlu għall-glorja taʼ ismu! (Lhud 6:10) Jalla dejjem inħabirku biex nagħtuh l-aħjar li nistgħu.