Programm Ġdid tal-​Jum t’Assemblea Speċjali

Illum il-​ġurnata hawn ħafna informazzjoni disponibbli fuq kif inżommu l-​qalb letterali tagħna f’saħħitha sabiex inkunu nistgħu ngawdu ħajja iktar pjaċevoli u itwal. Biss li nżommu l-​qalb figurattiva tagħna f’saħħitha huwa taʼ iktar importanza. Mela kemm hija xierqa t-​tema tal-​programm ġdid tal-​jum t’assemblea speċjali li se jibda f’Settembru taʼ l-​2003: “Naqdu lil Jehovah b’Qalb Sħiħa.” (1 Kron. 28:9) Għal liema tagħlim nistgħu nħarsu bil-​quddiem?

L-indokratur tas-​circuit se jiddiskuti s-​suġġett “Ngħinu lil Oħrajn Jaqdu lil Jehovah bil-​Ferħ.” L-​intervisti se jenfasizzaw il-​ferħ li jiġi meta nikkultivaw l-​interess u nikkonduċu studji tal-​Bibbja maʼ individwi li jridu jaqdu lil Jehovah. Bla ebda dubju, kulmin jattendi se jikseb il-​faraġ u l-​inkuraġġiment mill-​ewwel taħdita tal-​kelliemi li jkun qed iżurna, “Ngħassu lil Qlubna f’Dinja Kollha Inkwiet.” Is-​sessjoni taʼ fil-​għodu se tikkonkludi bit-​taħdita tal-​magħmudija.

Wara nofsinhar, il-​parti “Offri l-​Għajnuna Tiegħek” se tikkunsidra kif nistgħu ngħinu lil oħrajn. Il-​ġenituri x’jistgħu jagħmlu sabiex jipproteġu qalb uliedhom minn influwenzi ħżiena u jgħinuhom jersqu qrib Jehovah? Il-​parti “Għin lil Uliedek Jitgħaxxqu b’Jehovah” se tipprovdi suġġerimenti prattiċi u se turi kif dan jistaʼ jsir.

Qegħdin nieħdu vantaġġ minn kull provvediment li Jehovah jagħmel sabiex iżommilna l-​qalb figurattiva tagħna qawwija u b’saħħitha? L-​aħħar taħdita tal-​kelliemi li jiġi jżurna, “Żomm Qalb Sħiħa Waqt li Taqdi lil Jehovah,” se tiffoka fuq erbaʼ aspetti essenzjali fir-​rutina tagħna li fiha nsaħħu l-​ispiritwalità tagħna. Kemm qed niddedikaw ħin u sforz biex nitolbu bil-​ħerqa, nistudjaw il-​Kelma t’Alla, nippridkaw bil-​ħeġġa, u nissieħbu maʼ Kristjani oħrajn? Nistgħu nitjiebu f’xi wieħed minn dawn l-​aspetti?

Jehovah jestendi dan l-​invit: “Żomm moħħok fit-​tagħlim, agħti widen għal kliem id-​dehen.” (Prov. 23:12) Ippjana minn issa biex tattendi din il-​ġurnata premjanti taʼ tagħlim Skritturali. Jekk tagħmel hekk, se tissaħħaħ sabiex tibqaʼ taqdi lil Jehovah b’qalb sħiħa u bil-​ferħ.