Xogħol Appoġġat minn Alla
1 Fost il-qaddejja t’Alla llum, ftit għandhom edukazzjoni, ġid, jew prominenza li jispikkaw f’din is-sistema dinjija. Minħabba dan, xi nies jirrifjutaw il-ministeru tagħna billi jqisuh li m’għandu l-ebda importanza. (Is. 53:3) Madankollu, ix-xogħol edukattiv mill-Bibbja li nagħmlu aħna ġab faraġ u tama lil miljuni taʼ nies madwar il-globu. Nies ordinarji kif irnexxielhom jiksbu riżultati li jispikkaw bħal dawn? Irnexxielhom biss bl-appoġġ t’Alla. (Mt. 28:19, 20; Atti 1:8) Alla “għażel id-dgħajfa tad-dinja,” spjega l-appostlu Pawlu, “biex iħawwad il-qawwija.”—1 Kor. 1:26-29.
2 L-appostli u Kristjani oħrajn taʼ l-ewwel seklu fil-maġġorparti “kienu sempliċi u bla tagħlim.” (Atti 4:13) Madankollu, bil-qlubija huma segwew l-ordni li kellhom biex jippridkaw l-aħbar tajba, u Jehovah bierek l-isforzi tagħhom. Minkejja t-tfixkil u l-oppożizzjoni, “il-kelma tal-Mulej baqgħet tikber u tissaħħaħ bil-qawwa kollha.” Xejn ma setaʼ jwaqqaf ix-xogħol għax dan kien appoġġat minn Alla. (Atti 5:38, 39; 19:20) L-istess ġara fi żmienna. Lanqas l-oppożizzjoni determinata li kkaġunaw ħakkiema setgħana ma rnexxielha żżomm l-aħbar tajba milli tikber u tinfirex.—Is. 54:17.
3 Il-Kredtu Kollu għal Alla: Għandna aħna raġuni biex niftaħru bina nfusna minħabba l-pożizzjoni favorita li għandna bħala ministri t’Alla? Xejn affattu. Billi rrefera għall-ministeru Kristjan, Pawlu kiteb: “Dan it-teżor qiegħed għandna f’ġarar tal-fuħħar, ħalli b’hekk jidher sewwa li l-kobor taʼ din il-qawwa ġej minn Alla, u mhux minna.” (2 Kor. 4:7) Pawlu rrikonoxxa li hu kien kapaċi jkompli bil-ministeru tiegħu grazzi biss għas-saħħa li tah Alla.—Efes. 6:19, 20; Flp. 4:13.
4 Aħna bl-istess mod nirrikonoxxu li huwa biss minħabba ‘l-għajnuna mingħand Alla’ li x-xogħol taʼ l-ippridkar qiegħed jitwettaq. (Atti 26:22) Bi proklamazzjoni bħal din madwar id-dinja, Jehovah qiegħed jużana b’mod setgħan biex iqanqal theżżiża fost il-ġnus—sinjal bil-quddiem tat-tifrik li ġej dalwaqt fil-ġudizzju. (Ħag. 2:7) Kemm aħna privileġġati li nkunu “ħaddiema maʼ Alla” fil-ħsad spiritwali kbir!—1 Kor. 3:6-9.