Għożż il-​Privileġġ Tiegħek taʼ Ppritkar

1. Ħafna nies fid-​dinja kif iħarsu lejn ix-​xogħol tagħna taʼ ppritkar?

¹ Ħafna nies fid-​dinja taʼ Satana jqisu x-​xogħol tagħna taʼ ppritkar bħala “bluha.” (1 Kor. 1:18-​21) Jekk ma noqogħdux attenti, din il-​ħarsa mgħawġa tistaʼ tikkaġuna l-​iskuraġġiment u tnaqqsilna ż-​żelu. (Prov. 24:10; Is. 5:20) Liema raġunijiet hemm biex ngħożżu l-​privileġġ tagħna taʼ li nkunu Xhieda taʼ Ġeħova?—Is. 43:10.

2. Għala nistgħu ngħidu li l-​ministeru hu “xogħol qaddis”?

² “Xogħol Qaddis”: L-​appostlu Pawlu rrefera għall-​ministeru bħala “xogħol qaddis.” (Rum. 15:15, 16) Il-​ministeru f’liema sens hu “xogħol qaddis”? Li nieħdu sehem fih jagħmilna “ħaddiema sħab” mal-​“Qaddis,” Ġeħova, u jikkontribwixxi għat-​taqdis t’ismu. (1 Kor. 3:9; 1 Pt. 1:15) Ġeħova jħares lejn l-​ippritkar tagħna bħala “sagrifiċċju taʼ tifħir,” allura l-​ministeru hu aspett vitali tal-​qima tagħna.—Ebr. 13:15.

3. X’jagħmel l-​ippritkar tal-​aħbar tajba unur grandjuż?

³ L-​ippritkar tal-​aħbar tajba hu unur grandjuż li ftit nies igawdu. L-​anġli kieku bil-​ferħ jieħdu ħsieb inkarigu bħal dan u mingħajr dubju kieku jagħmluh b’mod effettiv ħafna. (1 Pt. 1:12) Madanakollu, Ġeħova għażel lilna l-​bnedmin imperfetti, “reċipjenti tal-​fuħħar,” għal dan il-​privileġġ tal-​għaġeb!—2 Kor. 4:7.

4. Kif nistgħu nuru li ngħożżu l-​ministeru?

⁴ Prijorità: Peress li tassew ngħożżu l-​privileġġ tagħna, aħna nħarsu lejn il-​ministeru bħala wieħed mill-​affarijiet “iktar importanti” f’ħajjitna. (Flp. 1:10) Għalhekk, aħna nwarrbu ħin kull ġimgħa biex nieħdu sehem fih. Mużiċist li jgħożż il-​privileġġ tiegħu li jdoqq f’orkestra magħrufa mad-​dinja kollha, jipprepara għal kull kunċert u jaħdem biex jiżviluppa s-​sengħa tiegħu. B’mod simili, aħna nippreparaw qabel ma mmorru fil-​ministeru ħalli nkunu nistgħu ‘nimmaniġġaw sew il-​kelma tal-​verità,’ u se naħdmu biex intejbu “l-​arti tat-​tagħlim” tagħna.—2 Tim. 2:15; 4:2.

5. Il-​ministeru tagħna hu apprezzat minn min?

⁵ Tħallix il-​ħarsa tal-​biċċa l-​kbira min-​nies tiskuraġġik. Ftakar li għad hemm ħafna nies fit-​territorju tagħna li jieħdu pjaċir biż-​żjajjar li nagħmlu. Però, aħna ma nfittxux l-​approvazzjoni tal-​bnedmin. Ħafna iktar importanti hu kif iħossu Ġeħova, u hu japprezza ferm l-​isforzi ħabrieka tagħna.—Is. 52:7.