Imita l-Attitudni Mentali taʼ Ġesù
1. Ġesù liema attitudni mentali wera?
1 Għalkemm qatt ma rajna lill-Iben t’Alla, permezz taʼ dak li tniżżel bil-miktub dwar il-ħajja u l-ministeru taʼ Ġesù, aħna sirna verament inħobbuh. (1 Pt. 1:8) Sabiex jobdi r-rieda taʼ Missieru, hu ħalla l-pożizzjoni għolja li kellu fis-sema u ġie fuq l-art. Bħala bniedem, hu qeda lil oħrajn bla ebda egoiżmu u ta ħajtu għan-nom taʼ l-umanità. (Mt. 20:28) Il-Kelma t’Alla tħeġġiġna: “Żommu din l-attitudni mentali fikom li kienet ukoll fi Kristu Ġesù.” Kif nistgħu nimitaw l-ispirtu taʼ sagrifiċċju persunali li wera?—Flp. 2:5-8, New World Translation.
2. Ħafna Kristjani liema sfida jiffaċċjaw, u x’jistaʼ jgħinhom jegħlbuha?
2 Meta Ħassu Għajjien: Għalkemm Ġesù kien perfett, xorta kien jgħejja. Darba minnhom, meta kien ‘għajjien mill-mixi,’ hu ta xiehda bir-reqqa lil waħda mara Samaritana. (Ġw. 4:6) Ħafna Kristjani llum jiffaċċjaw sfida simili. Wara ġimgħa xogħol li jgħejjik, tistaʼ ssibha diffiċli biex tikseb is-saħħa ħalli tieħu sehem fix-xogħol taʼ l-ippridkar. Madankollu, jekk nagħmlu dan regolarment, se nsibu li l-ministeru Kristjan jirrifreskana spiritwalment.—Ġw. 4:32-34.
3. Kif nistgħu nimitaw lil Ġesù għall-fatt li dejjem kien lest biex jgħallem?
3 F’okkażjoni oħra, Ġesù u d-dixxipli tiegħu marru f’post imwarrab biex ikunu jistgħu jistrieħu ftit. Imma kotra kbira taʼ nies saru jafu b’dan u marru jiġru qabilhom biex jiltaqgħu magħhom. Minflok ma ddejjaq, Ġesù “tħassarhom” u “qabad jgħallimhom ħafna ħwejjeġ.” (Mk. 6:30-34) Sabiex inkunu nistgħu nibdew studji tal-Bibbja u nikkonduċuhom, hemm bżonn li jkollna attitudni simili. Irridu nagħmlu sforz persistenti u jkollna mħabba ġenwina għan-nies. Jekk bħalissa m’intix tikkonduċi xi studju tal-Bibbja, taqtax qalbek milli tipprova ssib wieħed.
4. Ix-xogħol taʼ pijunier awżiljarju kif jistaʼ jgħinna nimitaw l-attitudni mentali taʼ Kristu?
4 Poġġi l-Interessi Spiritwali l-Ewwel: Ix-xogħol taʼ pijunier awżiljarju jistaʼ jgħinna niffokaw iżjed fuq attivitajiet spiritwali. Waħda oħt żagħżugħa kitbet: “Omm waħda mill-ħbieb tiegħi inkuraġġietna t-tnejn biex inkunu pijunieri awżiljarji magħha għal xahar. Jien vera ferħana li ngħaqadna magħha. Ħadt pjaċir insir naf lill-aħwa aħjar, u ma damux ma saru qishom tal-familja. Ħadt gost ukoll li kelli ħafna iktar opportunitajiet biex nitkellem maʼ oħrajn dwar Jehovah u ngħallimhom veritajiet meraviljużi dwar is-Saltna. Dan kollu għenni nħossni iktar qrib Jehovah u l-organizzazzjoni tiegħu.”—Salm 34:9 (34:8, NW).
5. Għala għandna dejjem nagħmlu sforz biex nimitaw l-attitudni mentali taʼ Kristu?
5 Ilkoll kemm aħna niffaċċjaw ġlieda bejn il-ġisem imperfett tagħna u x-xewqa li nogħġbu lil Jehovah. (Rum. 7:21-23) Irridu niġġieldu l-ispirtu bla ħeġġa li naraw fid-dinja. (Mt. 16:22, 23) Permezz taʼ l-ispirtu qaddis tiegħu, Jehovah jistaʼ jgħinna nirnexxu f’dan. (Gal. 5:16, 17) Hekk kif nistennew il-ħelsien tagħna fid-dinja l-ġdida ġusta t’Alla, jalla nimitaw l-attitudni mentali taʼ Ġesù billi npoġġu l-interessi tas-Saltna u dawk taʼ l-oħrajn qabel tagħna.—Mt. 6:33; Rum. 15:1-3.