L-​Iskola tat-​Taħriġ Ministerjali​—Bieb Kbir Miftuħ għax-​Xogħol

¹ Permezz tal-​profeta Ġeremija, Jehovah bassar: “Nqiegħed fuqhom [in-nies tiegħi] rgħajja li jirgħuhom, u ma jitbeżżgħux aktar, ma jitwaħħxux; u ħadd minnhom ma jonqos.” (Ġer. 23:4) Xogħol taʼ indokrar bħal dan qiegħed jitwettaq illum fost nies mill-​ġnus kollha. Dan qiegħed isir minn eluf t’anzjani fil-​kongregazzjoni. Barra minn hekk, irġiel żgħażagħ kotrana daqs in-​nida offrew lilhom infushom minn rajhom fis-​servizz taʼ Jehovah. (Salm 110:​3, Saydon) Dawn l-​aħwa umli huma tassew barka għall-​kongregazzjonijiet tal-​poplu t’Alla! Hekk kif ikompli x-​xogħol tal-​ġbir spiritwali, għad hemm il-​bżonn taʼ rġiel kwalifikati li joffru li jaqdu lil ħuthom.

² L-​Iskola tat-​Taħriġ Ministerjali hija provvediment mill-​isbaħ sabiex anzjani u qaddejja ministerjali mhux miżżewġin jiġu mħarrġin għal iktar responsabbiltajiet. Mindu bdiet din l-​iskola fl-​1987, kien hemm total taʼ 22,000 student minn xi 140 pajjiż li rċivew dan it-​taħriġ fid-​999 klassi li saru s’issa. Għal dawn l-​aħwa, l-​iskola kienet “bieb kbir miftuħ” għax-​xogħol.​—1 Kor. 16:9. 

³ L-​Iskop taʼ l-​Iskola: L-​għan taʼ l-​Iskola tat-​Taħriġ Ministerjali huwa li tħarreġ u tħejji rġiel għal responsabbiltajiet kulfejn jistaʼ jkun hemm bżonn fl-​organizzazzjoni. L-​iskola ttejjeb l-​abbiltajiet tagħhom biex ikunu minn taʼ quddiem fix-​xogħol taʼ l-​evanġelizzar, jieħdu sehem fl-​indokrar tal-​merħla, u jgħallmu fil-​kongregazzjoni. Wara li jiggradwaw, xi studenti jiġu inkarigati bħala pijunieri speċjali jew indokraturi li jivvjaġġaw f’art twelidhom jew f’pajjiż ieħor. Oħrajn jirċievu inkarigi biex jaqdu fil-​kongregazzjonijiet fejn kienu qabel jew inkella f’xi parti mit-​territorju tal-​fergħa fejn hemm iktar bżonn.

⁴ Matul il-​kors taʼ tmien ġimgħat, l-​istudenti jagħmlu studju intensiv tal-​Bibbja. Huma jikkunsidraw bir-​reqqa ammont kbir taʼ tagħlim Bibliku kif ukoll ir-​responsabbiltajiet tar-​rgħajja u linji taʼ gwida fuq kif jittrattaw problemi fil-​ħajja Kristjana. Huma jitgħallmu wkoll x’tgħallem l-​Iskrittura dwar kwistjonijiet amministrattivi, ġudizzjarji, u organizzazzjonali. Dawn jirċievu taħriġ speċjalizzat fuq kif jitkellmu fil-​pubbliku u jingħataw għajnuna persunali biex jiżviluppaw iktar malajr spiritwalment.

⁵ X’Inhu Meħtieġ: M’għandniex xi ngħidu, il-​ħtiġijiet biex jattendu l-​iskola huma restrittivi. L-​applikanti jridu jkunu qdew bħala anzjani jew qaddejja ministerjali għal mill-​inqas sentejn wara xulxin. Ilkoll kemm huma ma jridux ikunu miżżewġin u jrid ikollhom bejn 23 u 50 sena. L-​applikanti jridu jkunu jafu jaqraw, jiktbu, u jitkellmu tajjeb il-​lingwa li se tintuża fl-​iskola, u jridu jkunu f’saħħithom, mhux jeħtieġu xi kura jew dieta speċjali. Tingħata preferenza lil dawk li jkunu fis-​servizz taʼ pijunier regulari.

⁶ Dawk li jagħtu isimhom iridu jkunu lesti u kapaċi jaqdu kulfejn hemm bżonnhom. Dan jitlob spirtu bħalma wera l-​profeta Isaija, li offra lilu nnifsu bil-​ħerqa sabiex jagħmel xogħol speċjali, billi qal: “Hawn jien: ibgħat lili!” (Is. 6:8) Hu wera wkoll l-​umiltà matul ħajtu. Dawk li japplikaw għall-​Iskola tat-​Taħriġ Ministerjali għandhom ikunu mqanqlin minn imħabba għal ħuthom u xewqa li jaqduhom minflok ma jkollhom xewqa għal prominenza jew pożizzjoni speċjali. Wara li jirċievu taħriġ mill-​aħjar bħal dan, il-​gradwati huma mistennijin li japplikaw dak li jkunu tgħallmu għall-​ġid taʼ ħaddieħor.​—Lq. 12:48.

⁷ Benefiċċji: Matul it-​tmien ġimgħat taʼ taħriġ intensiv, il-​gradwati jiġu ‘mrawmin fil-​kliem tal-​fidi u fit-​tagħlim tajjeb.’ (1 Tim. 4:6) Dan jikkwalifikahom biex jgħinu u jinkuraġġixxu lil oħrajn fil-​kongregazzjonijiet u fis-​circuits fejn jiġu inkarigati. F’ħafna mill-​postijiet fejn intbagħtu gradwati taʼ l-​Iskola tat-​Taħriġ Ministerjali, l-​attività fis-​servizz taʼ l-​għalqa żdiedet; ġie inkuraġġit is-​servizz taʼ pijunier, speċjalment fost iż-​żgħażagħ; u ngħatat iktar attenzjoni persunali lill-​ħafna wħud ġodda li jissieħbu mal-​poplu t’Alla.

⁸ Int anzjan jew qaddej ministerjali li għadek ma żżewwiġtx u li għandek bejn 23 u 50 sena? Għala ma taħsibhiex biex tapplika għall-​Iskola tat-​Taħriġ Ministerjali? Int ħu żagħżugħ li qed tikkunsidra x’se jkunu l-​miri tiegħek għall-​futur fis-​servizz taʼ Jehovah? Għala ma żżommx ħajtek sempliċi u mingħajr tfixkil sabiex tkun tistaʼ tgħaddi minn dan il-​“bieb kbir miftuħ” għax-​xogħol? Dan jistaʼ jġiblek ħafna ferħ u sodisfazzjon. Tabilħaqq, l-​Iskola tat-​Taħriġ Ministerjali wriet li hija barka mhux biss għall-​gradwati taʼ l-​iskola imma wkoll għall-​kongregazzjonijiet tal-​poplu t’Alla madwar id-​dinja.

[Kaxxa f’paġna 3]

Kif Ibbenefikaw mit-​Taħriġ

“It-​taħriġ verament tejjibli l-​ministeru tiegħi u l-​abbiltà li nindokra bl-​għerf, billi nuża l-​Iskrittura.”

“L-​iskola tatni ħafna iktar kunfidenza biex nieħu ħsieb ir-​responsabbiltajiet differenti fil-​kongregazzjoni.”

“Tistaʼ tgħid li biddlitli kważi kull aspett taʼ ħajti, inkluż il-​mod kif inħossni dwar it-​teokrazija u l-​organizzazzjoni t’Alla.”

“It-​taħriġ li rċivejt għenni nirrealizza kemm għandi bżonn noffri li naqdi fejn jeħtieġ.”