Ikkultiva l-​Interess Permezz taʼ Rotta bir-​Rivisti

1. Kif nistgħu nużaw rotta bir-​rivisti biex nikkultivaw l-​interess?

¹ Ħafna nies li niltaqgħu magħhom fil-​ministeru jilqgħu ż-​żjajjar tagħna u b’ferħ jaċċettaw il-​letteratura tagħna imma joqogħdu lura milli jaċċettaw studju tal-​Bibbja regulari. Mod wieħed kif nikkultivaw l-​interess tagħhom hu permezz taʼ rotta bir-​rivisti. Meta tħalli xi rivisti, ħu nota taʼ l-​isem u l-​indirizz tal-​persuna, id-​data taż-​żjara, il-​ħarġiet li ħadet, u l-​iskrittura li ddiskutejtu, kif ukoll kwalunkwe ħaġa li nnotajt li tistaʼ tindika l-​interessi tal-​persuna. Kull darba li jaslu l-​ħarġiet ġodda tar-​rivisti, fittex punti li se jinteressaw lil dawk fir-​rotta tiegħek, u iġbed l-​attenzjoni lejhom meta tagħmel iż-​żjara. (1 Kor. 9:​19-​23) Maż-​żmien, xi ħaġa li jaqraw fir-​rivisti tagħna tistaʼ tqanqal l-​interess tagħhom u ġġagħalhom ikunu jridu jitgħallmu iżjed.

2. Għala huwa urġenti li n-​nies ifittxu lil Ġeħova issa, u x’nistgħu nagħmlu iktar biex ngħinuhom?

² Però, aħna nafu li l-​maġġuranza min-​nies mhux se jsiru qaddejja taʼ Ġeħova sempliċement għax jaqraw ir-​rivisti. Ladarba hu urġenti li n-​nies ifittxu lil Ġeħova issa, x’nistgħu nagħmlu iktar biex ngħinuhom? (Sof. 2:​2, 3; Riv. 14:​6, 7) Nistgħu nikkultivaw l-​interess tagħhom billi naqsmu magħhom skrittura magħżula bir-​reqqa kull darba li niħdulhom ir-​rivisti.

3. (a) Kif nistgħu nippreparaw serje taʼ diskussjonijiet bi skrittura waħda? (b) Liema suġġetti huma l-​iktar taʼ interess għan-​nies fit-​territorju tiegħek?

³ Diskussjonijiet bi Skrittura Waħda: Aħseb dwar dawk li tiħdilhom ir-​rivisti, u ipprepara serje taʼ diskussjonijiet bi skrittura waħda għall-​bżonnijiet speċifiċi taʼ kull persuna. (Flp. 2:4) Per eżempju, jekk xi ħadd reċentement tilef lil xi maħbub fil-​mewt, forsi tistaʼ tagħmel diversi żjajjar lura biex tiddiskuti dak li tgħid il-​Bibbja dwar il-​kundizzjoni tal-​mejtin u t-​tama taʼ l-​irxoxt. Materjal fil-​ktieb Reasoning taħt is-​suġġett prinċipali “Death” (Mewt) u “Resurrection” (Irxoxt) jistaʼ jintuża biex tipprepara dawn id-​diskussjonijiet bi skrittura waħda. Diskussjonijiet oħra dwar suġġetti relatati, bħal kif il-​mard, ix-​xjuħija, u l-​mewt se jispiċċaw għalkollox, imbagħad forsi jiġu b’mod naturali. Iċ-​ċavetta hi li ssib suġġett li hu taʼ interess għall-​individwu u pass pass turih dak li tgħid il-​Bibbja dwaru.

4. Għala huwa importanti li ngħinu lil oħrajn jifhmu meta nużaw l-​Iskrittura, u dan kif nistgħu nagħmluh?

⁴ Għinhom Jifhmu: Għalkemm ġeneralment huwa aħjar li żżomm dawn id-​diskussjonijiet sempliċi u qosra, hemm bżonn iktar milli sempliċement taqra l-​iskrittura li tkun għażilt. Satana għema l-​imħuħ tan-​nies biex ma jifhmux l-​aħbar tajba. (2 Kor. 4:​3, 4) Anki dawk li huma familjari mal-​Bibbja għandhom bżonn għajnuna biex jifhmuha. (Atti 8:​30, 31) Għalhekk, ħu l-​ħin biex tispjega l-​vers u tagħti tixbiha, bħalma tagħmel f’taħdita fl-​Iskola tal-​Ministeru Teokratiku. (Atti 17:3) Kun żgur li l-​individwu jara l-​valur prattiku tal-​Kelma t’Alla fil-​ħajja tiegħu stess.

5. Żjara taʼ rotta bir-​rivisti kif tistaʼ ssir studju tal-​Bibbja?

⁵ Jekk l-​individwu jieħu gost b’dak li qed jitgħallem, ibda tawwal id-​diskussjonijiet bil-​mod il-​mod billi żżid żewġ skritturi jew tlieta mill-​Bibbja f’kull żjara. Fittex opportunità biex tintroduċi l-​browxer X’Jirrikjedi jew il-​ktieb Għarfien. B’dan il-​mod, żjara taʼ rotta bir-​rivisti tistaʼ eventwalment issir studju tal-​Bibbja.