Kif Tibda Studji bil-​Ktieb X’Tgħallem il-​Bibbja?

Ħafna minna kieku nieħdu gost nikkonduċu studji tal-​Bibbja li kieku biss nistgħu nibdew l-​istudju. Il-​ktieb il-​ġdid Il-​Bibbja X’Tgħallem Verament? jistaʼ jgħinna. L-​introduzzjoni f’paġni 3-7 hija disinjata biex iddaħħal lill-​inkwilin f’diskussjoni dwar il-​Bibbja billi tuża l-​ktieb. Anki dawk li għandhom esperjenza limitata fil-​ministeru se jsibuha faċli li jużawh biex jibdew studji.

◼ Tistaʼ tipprova dan il-​metodu billi tuża paġna 3:

Wara li ssemmi xi ġrajja li hemm fl-​aħbarijiet jew xi problema li qiegħda fl-​imħuħ tan-​nies fit-​territorju tiegħek, idderieġi l-​attenzjoni taʼ l-​inkwilin għall-​mistoqsijiet b’tipi grassi f’paġna 3, u stiednu jikkummenta fuqhom. Imbagħad dawwar għal paġni 4-5.

◼ Jew forsi tippreferi tibda billi toħroġ xi punti minn paġni 4-5:

Tistaʼ tgħid, “Ma tkunx xi ħaġa mill-​isbaħ kieku l-​bidliet li jidhru hawn verament iseħħu?” Jew forsi tistaqsi, “Liema minn dawn il-​wegħdi tixtieq li tara titwettaq?” Ismaʼ t-​tweġiba b’attenzjoni.

Jekk l-​inkwilin juri interess speċjali f’waħda mill-​iskritturi, urih x’tgħallem il-​Bibbja fuq dan is-​suġġett billi tikkunsidra l-​paragrafi li jiddiskutu dik l-​iskrittura. (Ara l-​kaxxa f’din il-​paġna taʼ l-​insert.) Ikkunsidra l-​materjal daqslikieku kien studju tal-​Bibbja. Tistaʼ tagħmel dan f’ħames jew għaxar minuti fl-​ewwel żjara, fuq l-​għatba tal-​bieb.

◼ Metodu ieħor hu li tgħin lill-​inkwilin jesprimi ruħu billi tuża paġna 6:

Idderieġi l-​attenzjoni taʼ l-​inkwilin lejn il-​mistoqsijiet fl-​aħħar tal-​paġna, u staqsi, “Ġieli ħsibt dwar xi waħda minn dawn il-​mistoqsijiet?” Jekk jesprimi interess f’waħda mill-​mistoqsijiet, mur fil-​paragrafi tal-​ktieb li jwieġbu dik il-​mistoqsija. (Ara l-​kaxxa f’din il-​paġna taʼ l-​insert.) Hekk kif tikkunsidraw l-​informazzjoni flimkien, int tkun qed tikkonduċi studju tal-​Bibbja.

◼ Tistaʼ tuża paġna 7 biex turi kif isir studju tal-​Bibbja:

Aqra l-​ewwel tliet sentenzi fil-​paġna u mbagħad mur f’kapitlu 3 u uri kif isir studju billi tuża paragrafi 1-3. Agħmel arranġamenti biex terġaʼ tmur u tiddiskuti t-​tweġibiet għall-​mistoqsijiet f’paragrafu 3.

◼ Kif tiftiehem biex terġaʼ tmur:

Meta tkun qed tikkonkludi l-​ewwel studju, irranġa biex tkompli d-​diskussjoni. Tistaʼ sempliċement tgħid: “Fi ftit minuti, aħna sirna nafu x’tgħallem il-​Bibbja fuq suġġett importanti. Darb’oħra nistgħu niddiskutu [ħallih b’mistoqsija li se tkun kunsidrata]. Nistaʼ ngħaddi dal-ħin il-​ġimgħa d-​dieħla?”

Hekk kif nersqu qrib iż-​żmien stabbilit taʼ Ġeħova, hu jkompli jarmana għax-​xogħol li għandna nagħmlu. (Mt. 28:​19, 20; 2 Tim. 3:​17) Ejjew nużaw b’mod effettiv din l-​għodda meraviljuża ġdida biex nibdew studji tal-​Bibbja.

[Kaxxa f’paġna 3]

Diskussjoni taʼ l-​Iskritturi f’Paġni 4-5

◻ Rivelazzjoni 21:4 (pġi. 27-8, pari. 1-3)

◻ Isaija 33:24; 35:​5, 6 (pġ. 36, par. 22)

◻ Ġwanni 5:​28, 29 (pġi. 72-3, pari. 17-​19)

◻ Salm 72:16 (pġ. 34, par. 19)

Tweġibiet għall-​Mistoqsijiet f’Paġna 6

◻ Għala nsofru? (pġi. 108-9, pari. 6-8)

◻ Kif nistgħu nkampaw maʼ l-​ansjetajiet tal-​ħajja? (pġi. 184-5, pari. 1-3)

◻ Kif jistaʼ jkollna ħajja tal-​familja iktar ferħana? (pġ. 143, par. 20)

◻ X’jiġrilna meta mmutu? (pġi. 58-9, pari. 5-6)

◻ Qatt se nerġgħu narawhom l-​għeżież tagħna li mietu? (pġi. 72-3, pari. 17-​19)

◻ Kif nistgħu nkunu żguri li Alla se jwettaq il-​wegħdi tiegħu għall-​futur? (pġ. 25, par. 17)