L-​Għoti taʼ Xiehda minn Dar għal Dar

1. Liema mistoqsija tqum rigward il-​ministeru minn dar għal dar, u għala?

¹ “Dawk li għandhom esperjenza fid-​diversi modi tat-​tqassim tal-​Verità jaqblu li l-​kampanja taʼ l-​ippridkar minn dar għal dar bil-​MILLENNIAL DAWN hija, fil-​preżent, l-​iktar mod effettiv kif il-​Verità tiġi pridkata.” Din l-​istqarrija mill-​ħarġa taʼ l-​1 taʼ Lulju, 1893, taʼ Zion’s Watch Tower, enfasizzat il-​valur tal-​ministeru minn dar għal dar. In-​nies madwar id-​dinja jikkunsidrawh bħala l-​karatteristika li tidentifika lix-​Xhieda taʼ Ġeħova. Għadu taʼ valur dan il-​metodu, ladarba qed isir iktar u iktar diffiċli biex in-​nies jinsabu d-​dar f’ċerti pajjiżi?

2. X’inhi l-​bażi Skritturali għall-​għoti taʼ xiehda minn dar għal dar?

² Skritturali u Importanti: Lgħoti taʼ xiehda minn dar għal dar għandu bażi Skritturali. Ġesù dderieġa lis-​70 dixxiplu biex imorru tnejn tnejn fid-​djar tan-​nies. (Luqa 10:​5-7) Ftit wara l-​mewt taʼ Ġesù, il-​Bibbja tgħid hekk dwar id-​dixxipli tiegħu: “Kuljum fit-​tempju u minn dar għal dar baqgħu jgħallmu u jxandru bla heda l-​aħbar tajba.” (Atti 5:42) L-​appostlu Pawlu wkoll għallem b’mod żeluż minn dar għal dar.​—Atti 20:20.

3. Liema huma xi vantaġġi taʼ l-​għoti taʼ xiehda minn dar għal dar?

³ L-​għoti taʼ xiehda minn dar għal dar għadu metodu importanti fit-​tixrid taʼ l-​aħbar tajba llum. Jgħinna ‘nfittxu’ b’mod sistematiku u organizzat lil dawk li jistħoqqilhom. (Mt. 10:11) In-​nies ġeneralment ikunu iktar rilassati meta jkunu d-​dar. Meta nkellmuhom wiċċ imbwiċċ​—nisimgħu leħinhom, naraw l-​espressjonijiet taʼ wiċċhom, u nosservaw l-​ambjent li joqogħdu fih—niġu megħjunin insiru nafu dak li jinteressahom u jinkwetahom. Ġeneralment jagħtina l-​aqwa opportunità biex ikollna konversazzjoni fit-​tul.

4. Kif nistgħu nagħmlu l-​għoti taʼ xiehda minn dar għal dar iktar produttiv?

⁴ Agħmel Aġġustamenti Persunali: L-​appostlu Pawlu kien lest li jagħmel aġġustamenti persunali “minħabba l-​aħbar tajba.” (1 Kor. 9:23) Forsi aħna nistgħu naġġustaw l-​iskeda tagħna biex nippridkaw meta iktar nies x’aktarx li jkunu d-​dar, bħal iktar tard fil-​ġurnata, fi tmiem il-​ġimgħa, jew fi ġranet taʼ festi. Żomm nota taʼ dawk li m’humiex id-​dar, u erġaʼ pprova żurhom ġurnata oħra jew f’ħin differenti.

5. Dawk li huma limitati minħabba s-​saħħa kif jistgħu jkunu inklużi fix-​xogħol taʼ l-​ippridkar minn dar għal dar?

⁵ Anki dawk li huma limitati minħabba s-​saħħa għandhom mnejn jistgħu jieħdu sehem fl-​għoti taʼ xiehda minn dar għal dar. Forsi nistgħu nippjanaw biex nieħdu lil uħud bħal dawn fi djar li huma iktar aċċessibbli, u nħalluhom jaħdmu b’pass komdu għalihom. Waħda oħt, minħabba li tbati minn qtugħ taʼ nifs, setgħet tħabbat bieb wieħed kull nofs siegħa biss. Madankollu, kemm ħassitha ferħana u sodisfatta wara li kienet ħadmet flimkien mal-​grupp!

6. Għala għandu l-​għoti taʼ xiehda minn dar għal dar ikun aspett regulari fil-​ministeru tagħna?

⁶ Ħafna wħud bħal nagħaġ għadhom qed jinstabu fix-​xogħol taʼ l-​ippridkar minn bieb għal bieb. Wieħed pubblikatur ħabbat fuq bieb u xi ħadd qallu: “Idħol. Naf min int. Kont qed nitlob lil Alla biex jibgħat lil xi ħadd biex jgħinni, u mbagħad smajt il-​bieb iħabbat. Hu semagħni u bagħat lilek.” Ir-​riżultati juru li Ġeħova qed ibierek dan il-​metodu taʼ l-​ippridkar. (Mt. 11:19) Kun determinat li tagħmel l-​għoti taʼ xiehda minn dar għal dar aspett regulari tal-​ministeru tiegħek.