Tistaʼ Tieħu Sehem fl-​Għoti taʼ Xhieda Filgħaxijiet?

1. Skont wieħed studjuż, l-​appostlu Pawlu meta kien joħroġ jipprietka minn dar għal dar?

¹ Skont il-​ktieb Daily Life in Bible Times, l-​appostlu Pawlu normalment kien joħroġ fil-​ministeru minn dar għal dar “mill-​erbgħa taʼ waranofsinhar sa tard bil-​lejl.” Ma nafux jekk din kinitx proprju l-​iskeda taʼ Pawlu, iżda nafu żgur li Pawlu kien lest li ‘jagħmel kollox minħabba l-​aħbar tajba.’ (1 Kor. 9:19-​23) Dan kien jinkludi li jirranġa l-​iskeda tiegħu biex joħroġ jipprietka minn dar għal dar meta dan kien jagħtih l-​opportunità li jitkellem maʼ iktar nies.

2. Għala filgħaxijiet ikun l-​aħjar ħin biex tieħu sehem fil-​ministeru?

² Il-​pubblikaturi f’ħafna postijiet normalment imorru minn dar għal dar filgħodujiet matul il-​ġimgħa. Madankollu, fl-​inħawi fejn tgħix int, għadu dan l-​aħjar ħin? Pijunier jgħid hekk dwar it-​territorju tiegħu: “Bilkemm issib nies id-​dar matul il-​ġurnata. Iżda l-​maġġoranza tan-​nies ikunu d-​dar filgħaxijiet.” L-​għoti taʼ xhieda filgħaxijiet jistaʼ joffri l-​aqwa opportunità biex jintlaħqu b’mod partikulari l-​irġiel bl-​aħbar tajba. L-​inkwilini spiss ikunu iktar rilassati u lesti li jibnu konversazzjoni. Jekk ikun taʼ benefiċċju, l-​anzjani għandhom jagħmlu arranġamenti biex ikun hemm laqgħat għas-​servizz filgħaxija.

3. Kif nistgħu nuru d-​dixxerniment meta nkunu qed nieħdu sehem fl-​għoti taʼ xhieda filgħaxijiet?

³ Uża d-​Dixxerniment: Meta tieħu sehem fl-​għoti taʼ xhieda filgħaxijiet, huwa importanti li tuża d-​dixxerniment. Pereżempju, jekk tinzerta tħabbat għand xi ħadd f’ħin li ma jkunx konvenjenti għall-​inkwilin, bħal pereżempju waqt li jkun qed jiekol, ikun aħjar li toffri li tmur lura iktar tard. Jekk ikun dalam, oqgħod fejn l-​inkwilin ikun jistaʼ jarak, u kun pront biex tintroduċi lilek innifsek u tgħidlu r-​raġuni għala mort iżżuru. Ikun għaqli wkoll li taħdem maʼ xi ħadd ieħor jew fi gruppi u toqgħod f’toroq li jkunu mdawlin sew fejn ma tkunx fl-​imwarrab. Tmurx tħabbat tard ħafna, tant li tiddisturba lill-​inkwilini li jkunu deħlin jorqdu. (2 Kor. 6:3) Jekk xi akkwati jkunu perikolużi wara li jkun dalam, ipprietka fihom kmieni filgħaxija.—Prov. 22:3.

4. Liema barkiet jiġu meta tagħti xhieda filgħaxija?

⁴ Il-​Barkiet: Il-​ministeru jkun bil-​wisq iktar pjaċevoli meta nkunu nistgħu nagħtu xhieda. U iktar ma nagħtu xhieda, iktar ikollna opportunitajiet biex ngħinu lil oħrajn “jiġu salvati u jaslu għall-​għarfien eżatt dwar il-​verità.” (1 Tim. 2:3, 4) Tistaʼ taġġusta l-​iskeda tiegħek biex tkun tistaʼ tieħu sehem fl-​għoti taʼ xhieda filgħaxijiet?