Tistaʼ Tadatta l-Iskeda Tiegħek?
1. Għala għandna nadattaw l-iskeda tagħna għall-ippridkar?
1 Bħala Kristjani veri, aħna aċċettajna l-istedina biex inkunu “sajjieda tal-bnedmin.” (Mt. 4:19) Bħas-sajjieda letterali, x’aktarx li jkollna riżultati aħjar fix-xogħol taʼ li nistadu għall-bnedmin jekk nagħmlu skeda biex nippridkaw meta n-nies ikunu d-dar. F’diversi pajjiżi, ix-xhur li ġejjin se jġibu magħhom ġranet itwal, u għalhekk iktar imdawlin. Fit-tard wara nofsinhar u kmieni fil-għaxija għandna nsibu iktar nies id-dar. Spiss, huma jkunu iktar rilassati, u b’hekk ikunu iktar lesti biex jirċievu xi viżitaturi. Tistaʼ tadatta l-iskeda tiegħek biex tippriedka f’dawn il-ħinijiet?—1 Kor. 9:23.
2. X’inhuma xi modi li bihom nistgħu nilħqu iktar nies bl-aħbar tajba?
2 Għoti taʼ Xiehda fil-Għaxija: Forsi nkunu nistgħu nilħqu iktar nies bl-aħbar tajba meta nippjanaw bil-quddiem biex nagħtu xiehda kmieni fil-għaxija. (Prov. 21:5) Iż-żgħażagħ forsi jistgħu jippridkaw wara l-iskola. Oħrajn jistgħu jagħmlu dan wara x-xogħol. Xi gruppi taʼ l-istudju tal-ktieb jistgħu jirranġaw biex jippridkaw għal xi siegħa, qabel l-istudju taʼ kull ġimgħa.
3. B’liema modi tistaʼ tippriedka tard wara nofsinhar u kmieni fil-għaxija fit-territorju tiegħek?
3 Meta nippridkaw minn dar għal dar fit-tard wara nofsinhar u kmieni fil-għaxija jistaʼ jirriżulta f’li nitkellmu maʼ wħud li normalment ma jkunux id-dar. F’ħafna territorji, ix-xogħol fit-toroq u forom oħra taʼ ppridkar pubbliku jistgħu wkoll isiru fil-għaxija. Ħafna jsibu li fil-għaxija jkun l-aħjar ħin biex jagħmlu ż-żjajjar lura u jibdew studji tal-Bibbja.
4. Għala huwa importanti li tuża d-dixxerniment u turi konsiderazzjoni meta tieħu sehem f’għoti taʼ xiehda fil-għaxija?
4 Hemm Bżonn id-Dixxerniment: Għandna bżonn nuru l-għaqal meta nieħdu sehem fl-għoti taʼ xiehda fil-għaxija. Normalment, ikun aħjar jekk nillimitaw l-għoti taʼ xiehda tagħna kmieni fil-għaxija milli mmorru għand l-inkwilini meta huma jkunu qed jaħsbu biex imorru jorqdu. (Flp. 4:5) Meta tħabbat il-bieb, ħu ħsieb li toqgħod fejn jistgħu jarawk, u b’mod li jinftiehem identifika lilek innifsek. Iddumx biex tgħidilhom għala qed iżżurhom. Jekk iż-żjara tiegħek tkun f’ħin skomdu, bħal per eżempju waqt li l-familja tkun qed tiekol, offri li tmur lura darb’oħra. Dejjem uri konsiderazzjoni.—Mt. 7:12.
5. Kif nistgħu aħna nevitaw sitwazzjonijiet perikolużi meta nkunu qed nippridkaw?
5 Aħna għandna bżonn ukoll li nkunu konxji taʼ xi sitwazzjonijiet perikolużi. Jekk int tkun qed tagħti xiehda fil-għaxija jew meta jkun dalam, ikun għaqli li tkun maʼ xi ħadd ieħor jew fi gruppi. Ara li tkunu f’postijiet imdawla u mhux iżolati. Agħti xiehda biss fejn tħossok fis-sigurtà. Evita postijiet li jistgħu jkunu taʼ periklu wara li jidlam.—Prov. 22:3.
6. Liema benefiċċji oħrajn hemm meta nieħdu sehem f’xiehda tard wara nofsinhar jew kmieni fil-għaxija?
6 L-għoti taʼ xiehda tard wara nofsinhar u kmieni fil-għaxija jistaʼ jagħtina l-opportunità biex naħdmu fis-servizz mal-pijunieri awżiljarji u regulari. (Rum. 1:12) Tistaʼ int tadatta l-iskeda tiegħek biex tieħu sehem f’dan l-aspett tas-servizz?