Uża l-ħin tiegħek bl-aħjar mod fil-ministeru

Ix-​Xhieda taʼ Ġeħova qattgħu 1,945,487,604 sigħat fil-​ministeru matul is-​sena taʼ servizz 2014—evidenza ċara li aħna determinati li nibqgħu beżlin fis-​servizz taʼ Ġeħova! (Salm 110:3; 1 Kor. 15:58) Ladarba “ż-​żmien li fadal tqassar,” huwa possibbli li nużaw il-​ħin prezzjuż li nqattgħu fil-​ministeru biex nikkuntattjaw lil saħansitra iktar nies?—1 Kor. 7:29.

Hemm bżonn li tkun flessibbli biex tuża l-​ħin tiegħek bl-​aħjar mod fil-​ministeru. Pereżempju, jekk b’mod regulari tqattaʼ siegħa jew iktar f’aspett partikulari tal-​ministeru u ma jirnexxilekx titkellem man-​nies, tistaʼ int tagħmel aġġustamenti biex issib u tkellem lil iktar nies? Iċ-​ċirkustanzi jvarjaw minn post għall-​ieħor. Madanakollu, is-​suġġerimenti li ġejjin jistgħu jgħinuk tuża l-​ħin tiegħek bl-​aħjar mod ħalli b’hekk ma tkunx qed ‘tagħti fl-​arja.’—1 Kor. 9:26.

• Għoti taʼ xhieda minn dar għal dar: Għal ħafna għaxriet taʼ snin, il-​pubblikaturi kellhom id-​drawwa li jibdew il-​ġurnata tagħhom fil-​ministeru billi jippritkaw minn dar għal dar. Però, peress li ħafna individwi jaħdmu matul il-​ġurnata, għala ma tipprovax tipprietka minn dar għal dar tard waranofsinhar jew kmieni filgħaxija, meta jkun hemm iktar nies id-​dar jirrilassaw? Matul il-​ġurnata, għandek mnejn ikollok iktar suċċess jekk tagħti xhieda fit-​toroq jew f’postijiet taʼ negozju.

• Ippritkar f’postijiet pubbliċi: L-​istands u l-​imwejjed tal-​letteratura għandhom jitpoġġew f’postijiet fejn jgħaddu ħafna nies fit-​territorju tal-​kongregazzjoni. (Ara Il-​Ministeru tas-​Saltna taʼ Lulju 2013, p. 5.) Jekk jibda jonqos l-​ammont taʼ nies li jgħaddu minn fejn jitpoġġa l-​istand, il-​Kumitat tas-​Servizz tal-​Kongregazzjoni jistaʼ jiddeċiedi li jressaq l-​istand jew il-​mejda tal-​letteratura f’post ieħor fejn jgħaddu iktar nies.

• Żjajjar lura u studji tal-​Bibbja: Huwa possibbli li tiftiehem biex tagħmel iż-​żjajjar lura u l-​istudji tal-​Bibbja f’ħinijiet meta aspetti oħra tal-​ministeru ma tantx ikunu produttivi? Pereżempju, jekk il-​ministeru minn dar għal dar ikun produttiv is-​Sibtijiet filgħodu, tistaʼ tagħmel l-​istudju tal-​Bibbja waranofsinhar jew filgħaxija? Meta jsiru żjajjar lura, jistgħu l-​pubblikaturi jinqasmu fi gruppi iżgħar fil-​karozzi ħalli jwettqu iktar fil-​ministeru?

Filwaqt li hu minnu li nistgħu ngħoddu l-​ħin kull meta noħorġu fil-​ministeru, il-​ferħ tagħna jiżdied meta nkunu produttivi. Jekk tinduna li xi aspett tal-​ministeru tiegħek ma jkunx effettiv f’ċerti ħinijiet, ipprova aspett ieħor. Itlob lil Ġeħova, “Sid il-​ħsad,” għall-​gwida tiegħu ħalli tkun tistaʼ tuża l-​ħin tiegħek bl-​aħjar mod fil-​ministeru!—Mt. 9:38.