Qalbenin, Madankollu Paċifiċi
1 Ħafna nies li nippridkawlhom jesprimu twemmin sinċier li jmur kontra l-verità tal-Bibbja. Għalkemm irridu nippridkaw bil-qlubija, aħna nixtiequ wkoll ‘inżommu l-paċi mal-bnedmin kollha’ u nevitaw li noffenduhom għalxejn. (Rum. 12:18; Atti 4:29) Kif nistgħu nkunu kuraġġużi, u madankollu paċifiċi, hekk kif nippreżentaw il-messaġġ tas-Saltna?
2 Sib Aspetti li Taqblu Dwarhom: Individwu li jżomm il-paċi jevita l-argumenti. Jekk joqgħod jisfida għalxejn it-twemmin li jkun għal qalb l-inkwilin żgur li mhux se jgħinu jaċċetta l-messaġġ. Jekk jgħid xi ħaġa li tkun żbaljata, forsi bit-tattika kollha nistgħu nintroduċu punt li nistgħu naqblu dwaru. Billi nenfasizzaw dak li naqblu dwaru, għandu mnejn inkunu nistgħu nneħħulu kwalunkwe sentiment negattiv u nilħqulu qalbu.
3 Jekk ma nikkoreġux il-ħarsa żbaljata taʼ l-inkwilin, inkunu aħna qed nagħmlu kompromess jew naħbu l-verità? Le. L-inkarigu tagħna bħala ministri Kristjani m’huwiex li mmeru kwalunkwe ħarsa żbaljata li niffaċċjaw, imma li nippridkaw l-aħbar tajba tas-Saltna t’Alla. (Mt. 24:14) Minflok ma niħduha bi kbira minħabba l-ħarsa żbaljata li jesprimi l-inkwilin, aħna nistgħu nħarsu lejha bħala opportunità biex insiru nafu kif jaħsibha l-individwu.—Prov. 16:23.
4 Nittrattaw bid-Dinjità: Ikun hemm drabi meta rridu nuru qlubija u kuraġġ meta nipprovdu evidenza li ċertu tagħlim huwa falz. Madankollu, bħala wħud li nżommu l-paċi, aħna noqogħdu lura milli nirridikolaw lin-nies kif ukoll milli nużaw termini li jnaqqsu d-dinjità taʼ dawk li jemmnu u jgħallmu tagħlim żbaljat. Attitudni superjuri se tbiegħed lin-nies, imma attitudni umli u taʼ qalb tajba tiftaħ il-moħħ taʼ min iħobb il-verità. Meta nuru rispett għas-semmiegħa tagħna u t-twemmin tagħhom se nittrattawhom bid-dinjità, u b’hekk nagħmluhielhom iktar faċli biex jaċċettaw il-messaġġ tagħna.
5 L-appostlu Pawlu kkunsidra t-twemmin taʼ dawk li kien jippridkalhom u għamel kulma setaʼ biex jippreżenta l-aħbar tajba b’tali mod li jmissilhom qalbhom. (Atti 17:22-31) Hu minn jeddu sar minn “kollox għal nies taʼ kull xorta.” (1 Kor. 9:22) Aħna nagħmlu l-istess billi nżommu l-paċi hekk kif nippridkaw l-aħbar tajba bil-kuraġġ.