Spirtu Volontarju Jġib il-Barkiet
1. David u Neħemija kif urew spirtu volontarju?
1 Meta Gulija beda jgħajjar lill-qtajjaʼ taʼ Iżrael, kulmin ried mis-suldati kollha setaʼ joffri lilu nnifsu biex jiġġilidlu. Imma kien ragħaj żagħżugħ u li ma kienx imħarreġ għall-gwerra li offra li jiġġilidlu. (1 Sam. 17:32) Meta l-eżiljati Lhud marru lura Ġerusalemm, imma naqsu li jerġgħu jibnu s-swar, kien il-kuppier tas-sultan tal-Persja li offra li jħalli l-pożizzjoni taʼ privileġġ li kellu fil-palazz u jivvjaġġa lejn Ġerusalemm biex jorganizza x-xogħol. (Neħ. 2:5) Ġeħova berikhom lil dawn iż-żewġt irġiel, David u Neħemija, għall-ispirtu li wrew.—1 Sam. 17:45, 50; Neħ. 6:15, 16.
2. Il-Kristjani għala għandhom juru spirtu volontarju?
2 Illum, fid-dinja ma tantx hawn spirtu volontarju. F’dawn l-“aħħar jiem,” in-nies huma mħabbtin ħafna, u ħafna “jħobbu lilhom infushom.” (2 Tim. 3:1, 2) Huwa faċli għal dak li jkun li tant jintilef wara l-interessi persunali tiegħu li jinjora opportunitajiet biex joffri l-għajnuna tiegħu meta xi wħud ikollhom bżonn. Madankollu, bħala Kristjani, aħna nixtiequ nimitaw lil Ġesù, li ħa l-inizjattiva biex jgħin lil oħrajn. (Ġw. 5:5-9; 13:12-15; 1 Pt. 2:21) Kif nistgħu nuru spirtu volontarju, u liema barkiet nistgħu nirċievu?
3. L-ispirtu volontarju kif jistaʼ jkun t’għajnuna fil-laqgħat tal-kongregazzjoni?
3 Għal Ħutna: Aħna nistgħu nagħtu ‘għotjiet spiritwali’ lil oħrajn billi noffru li nikkummentaw meta jkun hemm taħditiet fil-laqgħa li jirrikjedu l-parteċipazzjoni mill-udjenza. (Rum. 1:11) Meta nikkummentaw inkunu qed nonoraw lil Ġeħova, innaqqxu l-verità iktar fis-sod f’moħħna u f’qalbna, u l-laqgħat isiru iktar pjaċevoli għalina. (Salm 26:12) Nistgħu noffru wkoll li nagħtu taħditiet fl-Iskola tal-Ministeru Teokratiku meta jkun hemm bżonn taʼ sostitut. Dan se jgħinna ntejbu l-abbiltajiet tagħna biex ngħallmu.
4. B’liema modi oħra nistgħu nuru spirtu volontarju?
4 L-aħwa rġiel jistgħu juru spirtu volontarju billi jirsistu biex ikollhom responsabbiltajiet fil-kongregazzjoni. (Is. 32:2; 1 Tim. 3:1) Ilkoll nistgħu ngħinu biex fl-assembleat u l-konvenzjonijiet imur kollox ħarir meta noffru li naħdmu fid-diversi dipartimenti li hemm. Meta noffru li naħdmu maʼ l-indokratur li jivvjaġġa fil-ministeru jew nipprovdulu xi ikla, dan iwassal biex “ninkuraġġixxu lil xulxin.” (Rum. 1:12) Meta noffru li nipprovdu għajnuna prattika lill-iltiema, ir-romol, dawk li huma morda u neqsin minn saħħithom, ommijiet bi tfal żgħar, u oħrajn fil-kongregazzjoni, aħna nesperjenzaw il-ferħ u l-approvazzjoni taʼ Ġeħova.—Prov. 19:17; Atti 20:35.
5. Liema kwistjonijiet li jinvolvu s-Sala tas-Saltna jeħtieġu volontieri li joffru ruħhom mill-qalb?
5 Mod ieħor kif nistgħu noffru l-ħin u l-isforzi tagħna hu billi nnaddfu u ngħinu fil-manutenzjoni tas-Sala tas-Saltna. Barra minn hekk, minħabba li ħafna nies qed jidħlu fil-verità, hemm bżonn li dejjem jikber għal Swali tas-Saltna ġodda u għal volontieri biex jibnuhom. Koppja waħda għamlu lilhom infushom disponibbli sabiex jgħinu lill-Kumitat Reġjonali tal-Bini tal-lokal avolja l-koppja ma kellhomx xi sengħa fil-bini. Maż-żmien, il-koppja ġew imħarrġin u issa qed jgħinu biex ipoġġu l-briks. Il-mara kkummentat: “Il-fatt li naħdmu m’oħrajn irriżulta fi ħbiberiji tassew mill-qrib. Fl-aħħar tal-ġurnata aħna nkunu għajjenin fiżikament, imma spiritwalment inkunu rifreskati.”
6. Il-ministeru għala huwa l-iktar xogħol volontarju importanti li nistgħu nagħmlu?
6 Bl-Ippridkar: L-iktar xogħol volontarju importanti li nistgħu nagħmlu llum hu x-xogħol taʼ l-ippridkar tas-Saltna. Hekk kif in-nies jiġu megħjunin biex jifhmu u japplikaw il-pariri tal-Bibbja, huma jiksbu skop fil-ħajja u s-saħħa biex jegħlbu vizzji li jagħmlu l-ħsara. Huma jitgħallmu dwar it-tama inkuraġġanti li l-Bibbja toffri dwar il-futur. Billi nipprovdu edukazzjoni Biblika, aħna nkunu qed nagħmlu servizz volontarju bil-ferħ li jġib benefiċċji dejjiema. (Ġw. 17:3; 1 Tim. 4:16) Forsi ċ-ċirkustanzi tagħna għandhom mnejn jippermettu li jkollna sehem iktar sħiħ f’dan ix-xogħol billi naqdu bħala pijunieri awżiljarji jew regulari, billi mmorru naqdu fejn il-bżonn hu akbar, jew billi nitgħallmu lingwa oħra.
7. L-ispirtu volontarju għala huwa importanti b’mod speċjali llum?
7 Is-Sultan David ipprofetizza li l-poplu t’Alla kien se ‘joffri lil nnifsu’ fiż-żmien li l-Messija kien se jibda l-ħakma tiegħu. (Salm 110:3, NW) Minħabba li Ġeħova se jgħaġġel il-ħsad spiritwali finali, hemm ħafna xogħol li għalih nistgħu noffru lilna nfusna bħala volontieri. (Is. 60:22) Għedt int: “Hawn jien: ibgħat lili”? (Is. 6:8) Tabilħaqq, billi nuru spirtu volontarju, aħna nkunu qed nogħġbu lil Ġeħova u naħsdu barkiet kbar.