Farraġ lill-Imnikktin
1. Min mietlu xi ħadd għala għandu bżonn il-faraġ?
1 It-telfa taʼ xi ħadd maħbub fil-mewt hi esperjenza trawmatika, b’mod speċjali għal dawk li m’għandhomx it-tama tas-Saltna. (1 Tess. 4:13) Ħafna spiss jistaqsu: ‘In-nies għala jmutu? Fejn imorru? Qatt se nerġaʼ nara lill-persuna maħbuba tiegħi?’ Hawn taħt hawn xi suġġerimenti biex infarrġu lil dawk li niltaqgħu magħhom fis-servizz taʼ l-għalqa u li jinsabu mnikktin minħabba l-mewt taʼ xi qarib jew ħabib.—Is. 61:2.
2. Jekk inkwilin jgħidilna li hu mnikket, għandna dejjem nipprovaw nagħtuh xiehda fit-tul?
2 Minn Bieb għal Bieb: Inkwilin jistaʼ jgħidilna li għadu kif miet xi ħadd fil-familja tiegħu. Jidher hu mnikket emozzjonalment? Hi d-dar mimlija bi qraba mnikktin? F’każi bħal dawn, forsi jkun l-aħjar li ma nagħtuhx xiehda fit-tul. (Koħ. 3:1, 7) Forsi nkunu nistgħu nesprimu s-simpatija tagħna, nagħtuh fuljett, rivista, jew browxer adattat, u nitilqu bil-pulit. Imbagħad inkunu nistgħu mmorru lura fi żmien iktar xieraq biex naqsmu miegħu iktar faraġ mill-Bibbja.
3. Jekk jippermettu ċ-ċirkustanzi, liema skritturi nistgħu nuruh lil inkwilin li jkun imnikket?
3 F’okkażjonijiet oħrajn forsi nindunaw li nistgħu nitħaddtu iktar fit-tul fl-ewwel żjara. Għalkemm dan ma jkunx iż-żmien li nuruhom li l-ideat tagħhom huma żbaljati, forsi nkunu nistgħu naqraw magħhom il-wegħdi tal-Bibbja rigward l-irxoxt. (Ġw. 5:28, 29) Jew nistgħu naqsmu magħhom dak li tgħid il-Bibbja dwar il-kundizzjoni tal-mejtin. (Koħ. 9:5, 10) Nistgħu wkoll nużaw rakkont Bibliku dwar irxoxt biex infarrġuhom. (Ġw. 11:39-44) Għażla oħra tistaʼ tkun li tikkunsidra l-kliem taʼ tama f’Ġeħova li qal il-leali Ġob. (Ġob 14:14, 15) Qabel nitilqu, nistgħu noffru l-browxer X’Jiġrilna Meta Mmutu?, Meta Xi Ħadd Li Tħobb Imut, jew browxer jew fuljett ieħor li jkun adattat. Jew nistgħu nħallu l-ktieb Il-Bibbja X’Tgħallem?, niġbdu l-attenzjoni lejn l-informazzjoni li hemm f’kapitlu 6, u nagħmlu appuntament biex niddiskutu s-suġġett iktar fid-dettall meta mmorru lura.
4. Liema okkażjonijiet oħrajn għandna biex nagħtu l-faraġ?
4 F’Okkażjonijiet Oħrajn: Jekk ikun qed isir xi funeral fis-Sala tas-Saltna, hemm xi wħud li m’humiex Xhieda taʼ Ġeħova? Letteratura li tfarraġhom tistaʼ tintgħamel disponibbli għalihom. Xi postijiet fejn jippreparaw il-mejtin għad-difna apprezzaw il-fatt li kellhom disponibbli xi letteratura adattata għall-familji li tilfu lil xi ħadd fil-mewt. Xi drabi, avviżi dwar funerali li dehru fil-gazzetta fetħu t-triq biex jinkitbu ittri qosra taʼ faraġ lill-membri tal-familja tal-mejjet. F’każ partikulari, wara li rċivew ittra b’xi fuljetti, armel u bintu marru d-dar tal-pubblikatur u staqsewh: “Intom dawk li bgħattuli din l-ittra? Għax nixtieq inkun naf iktar dwar il-Bibbja!” Ir-raġel u bintu qablu li jibdew studju tal-Bibbja u bdew jattendu l-laqgħat tal-kongregazzjoni.
5. Għala għandna nfittxu opportunitajiet biex infarrġu lil dawk li tilfu lil xi ħadd fil-mewt?
5 Koħèlet 7:2 jgħid: “Aħjar tmur f’dar il-vistu milli f’dar fejn hemm festa.” Normalment, il-persuna f’dar il-vistu tkun iktar lesta li tismaʼ l-Kelma t’Alla milli dawk li moħħhom biss biex jiddevertu. Ilkoll kemm aħna għandna nfittxu opportunitajiet xierqa biex infarrġu lil dawk li huma mnikktin minħabba li tilfu fil-mewt lil xi ħadd maħbub.