‘Agħmel Kollox Minħabba l-​Aħbar Tajba’

1. Predikatur tas-​Saltna x’inhu lest li jagħmel għal oħrajn, u għala?

¹ L-​appostlu Pawlu ħass obbligu persunali biex jiddikjara l-​aħbar tajba lil oħrajn. (1 Kor. 9:16, 19, 23) B’mod simili, it-​tħassib tagħna għall-​benesseri etern tan-​nies iqanqalna biex noħorġu barra minn triqitna ħalli naqsmu l-​aħbar tajba magħhom.

2. Meta nippridkaw, liema aġġustamenti aħna lesti li nagħmlu, u għala?

² Ippriedka Fejn u Meta Tistaʼ Ssib in-​Nies: Sajjied tajjeb ma jitfax ix-​xlief tal-​qasba jew ix-​xibka fejn u meta jkun konvenjenti għalih, imma fejn u meta x’aktarx li jkun hemm il-​ħut. Aħna wkoll, bħala “sajjieda tal-​bnedmin,” forsi jkollna bżonn nagħmlu xi aġġustamenti persunali sabiex insibu n-​nies fit-​territorju tagħna, u għalhekk ingawdu iktar bis-​sħiħ il-​privileġġ li niġbru “ħut taʼ kull xorta.” (Mt. 4:19; 13:47) Nistgħu nużaw il-​ħin kmieni fil-​għaxija biex nikkuntattjaw lin-​nies fi djarhom jew kmieni fil-​għodu biex nagħtu xiehda fit-​toroq? Il-​mira taʼ Pawlu kienet li ‘jagħti xiehda bir-​reqqa dwar l-​aħbar tajba,’ u hu ħa vantaġġ minn opportunitajiet adattati biex jagħmel dan.—Atti 17:17; 20:20, 24.

3, 4. Waqt li nkunu fil-​ministeru, b’liema modi nistgħu nadattaw ruħna, u b’liema riżultati?

³ Adatta l-​Preżentazzjoni Tiegħek Skond in-​Nies fit-​Territorju: Is-​sajjieda spiss jaġġustaw il-​metodi tagħhom sabiex jaqbdu tip taʼ ħut partikulari. Kif nistgħu nippreżentaw l-​aħbar tajba tas-​Saltna b’mod li jiġbed lin-​nies fit-​territorju tagħna? Bit-​tattika, irridu nintroduċu suġġett li jkun jinteressa lin-​nies b’mod ġenerali u mbagħad nisimgħu bir-​reqqa dak li għandhom x’jgħidu dwar is-​suġġett. (Ġk. 1:19) Forsi nistaqsu xi ħaġa li titlob l-​opinjoni tagħhom biex naraw x’jaħsbu. (Prov. 20:5) B’dan il-​mod, se nkunu nistgħu nadattaw il-​preżentazzjoni tagħna taʼ l-​aħbar tajba b’mod li jolqot lil ħajjithom personalment. Pawlu sar “kollox għal nies taʼ kull xorta.” (1 Kor. 9:22) Huwa fundamentali li nadattaw ruħna biex nilħqu l-​qlub tan-​nies.

⁴ Kemm iġibilna ferħ li naqsmu man-​nies l-​“aħbar tajba taʼ xi ħaġa aħjar”! (Is. 52:7) Jalla nagħmlu “kollox minħabba l-​aħbar tajba” sabiex nilħqu lil kemm jistaʼ jkun nies.—1 Kor. 9:23.