Ix-Xogħol tal-Akbar Importanza
1. L-apprezzament profond tagħna għall-ministeru se jġegħelna nagħmlu liema sagrifiċċji?
1 Għala niġu inkuraġġiti regolarment biex nagħtu mill-ħin, mill-enerġija, u mir-riżorsi tagħna fil-ministeru? Għax ebda xogħol m’għandu valur akbar! Jekk nirriflettu fuq l-effetti estensivi tiegħu, ix-xewqa tagħna biex nieħdu sehem f’dan ix-xogħol li qatt ma se jerġaʼ jsir se tiżdied.—Atti 20:24.
2. L-ippritkar tagħna kif jgħin biex jitqaddes l-isem kbir taʼ Ġeħova?
2 Iqaddes l-Isem taʼ Ġeħova: Ix-xogħol tal-ippritkar jenfasizza li s-Saltna taʼ Ġeħova permezz taʼ Kristu Ġesù se tieħu post il-gvernijiet umani kollha u tipprovdi soluzzjoni għall-problemi kollha tal-umanità. (Mt. 6:9, 10) Ġeħova hu glorifikat bħala l-uniku wieħed li kapaċi jeħlisna mill-mard u l-mewt. (Is. 25:8; 33:24) Ladarba nġorru ismu, oħrajn li josservaw il-kondotta mill-aħjar u ż-żelu tagħna għandhom mnejn jigglorifikawh. (1 Pt. 2:12) Kemm hu sodisfaċenti li nagħmlu magħruf madwar l-art kollha l-isem tal-Mulej Sovran Ġeħova!—Salm 83:18.
3. Liema barkiet jesperjenzaw dawk li jwieġbu b’mod favorevoli għall-messaġġ tas-Saltna?
3 Isalva l-Ħajjiet: Ġeħova “ma jixtieqx li xi ħadd jinqered imma jixtieq li kulħadd jasal għall-indiema.” (2 Pt. 3:9) Madankollu, jekk ma jkun hemm ħadd li jgħallimhom, in-nies kif jistgħu qatt jitgħallmu dak li Ġeħova jqis bħala kondotta xierqa jew mhix? (Ġona 4:11; Rum. 10:13-15) Meta individwi jwieġbu għall-aħbar tajba, il-kwalità taʼ ħajjithom titjieb hekk kif jabbandunaw prattiki taʼ ħsara. (Mik. 4:1-4) Barra minn hekk, jiksbu l-prospett taʼ ferħ taʼ ħajja taʼ dejjem. L-ippritkar u t-tagħlim attiv tagħna jsalvaw lilna u lil dawk li jisimgħuna. (1 Tim. 4:16) Xi rwol privileġġat ferm għandna f’dan ix-xogħol importanti ħafna!
4. Għala għandna nkunu involuti b’mod attiv fl-ippritkar tas-Saltna u fix-xogħol taʼ li nagħmlu dixxipli?
4 Dalwaqt, it-tribulazzjoni l-kbira se ġġib tmiem taʼ malajr għal din id-dinja inġusta. Dawk li jżommu man-naħa taʼ Ġeħova se jsalvaw. B’hekk, l-ippritkar u li nagħmlu dixxipli huma l-iktar xogħol urġenti, importanti, u taʼ benefiċċju li qed iseħħ illum. Ejja nagħtuh l-ewwel post f’ħajjitna!—Mt. 6:33.